Elder Gary B. SabinVitusagavulu, Vakaitutu Raraba

E tolu na vunikau ni Siganisucu e matata vinaka tu ena vakanananu nei Elder Gary B. Sabin.

Na imatai e dua na vunikau ni Siganisucu totoka ena nona gauna vakaitabagone. Ni vakayayamo o Gary ena vunikau me tara e dua na jokeliti, qai kasauru sobu ki ra na vunikau taucoko.

Na ikarua e dua na tabana drokadroka a kunea ni kaulotu tiko mai Belgium kei na Netherlands mai na 1973 ki na 1975. Erau a kauta ki vale o Elder Sabin kei na nona itokani na tabanikau oya ka vakaduria e yasa ni kadi ni Siganisucu erau a ciqoma mai vale.

Na ikatolu e dua na vunikau caka ena cina ni Siganisucu ka vesu ena itutu ni IV tikiva nona idavodavo na luvena yalewa mai valenibula. E dua vei iratou na tolu na luvedrau na Sabin ka tauva na cystic fibrosis, a veisau vakarua na yatevuso nei luvena yalewa ni oti e dua na yabaki mai na nona mate na ganena ena mate vata oya.

“E levu cake na ka keirau vulica mai vei iratou na luvei keirau mai na ka eratou vulica vei keirau,” e kaya o Elder Sabin.

Ni Vakaitutu Raraba ena dau nanuma voli na vunikau ni Siganisucu kei na lesoni eso e vulica mai kina. Na vunikau yadua e vakatakilakilataka e dua na iwasewase ni nona ilakolako—mai na gonetagane e vinakata e dua na jokeliti ki na dua na daukaulotu vakavulica voli na ituvatuva ni veivakabulai ki na dua na tama ka vakanuinui tu ki na ituvatuva kei na loloma ni iVakabula me tokona na nona matavuvale ena veivakatovolei ni bula oqo.

A sucu o Gary Byron Sabin mai Provo e Utah, Amerika, ena 7 ni Epereli, 1954, vei rau o Marvin E. kei Sylvia W. Sabin. A vakamautaki Valerie Purdy ena Okosita 1976. Erau nodratou itubutubu e lima na gone; a sucumate na kena ikaono.

Ni oti nona taurivola mai na Brigham Young University e Provo, a rawata o Elder Sabin e dua na diqiri ni master ena veiliutaki mai na Stanford University.

Sa veiqaravi oti o Elder Sabin ena vuqa na veikacivi ni Lotu, okati kina na bisopi, peresitedi ni iteki, kei na Vitusagavulu ni iWasewase. A vakatekivuna, jeameni, ka Vakailesilesi Liu ni vicavata na kabani, okati kina na Excel Realty Trust, Price Legacy, Excel Realty Holdings, kei na Excel Trust.

Ena 1993, erau a tauyavutaka kina o Elder kei Sisita Sabin na Sabin Children’s Foundation, e dua na isoqosoqo ka dau qarava vakatabakidua nodra gagadre ni veiqaravi vakavuniwai na gone.