Nuitaka na Yalo Oya Ka Muataka na Caka Vinaka
Mai vei President Henry B. Eyring
Matai ni Daunivakasala ena Mataveiliutaki Taumada
Eda toso volekata na iVakabula ni da qaravi ira na tani ena Vukuna, mai na loloma uasivi sara.
Au marautaka niu tiko kei kemuni ena bogi ni sokalou, navunavuci, kei na gugumatua oqo. Eda sa masu vakatautauvata. Sa rogoci keda na Tamada Vakalomalagi dauloloma. Eda sa nanuma na noda iVakabula, na Turaga o Jisu Karisito, ni da sa mai vakauqeti ena veisere ni vakacaucau ki Vua. Eda sa vakauqeti meda veicuqeni vakalevu ni vukea na noda Vakavuvuli ena Nona cakacaka ena nodra laveti cake ka vakacegui na luvena na Tamada Vakalomalagi.
Na noda gagadre ni vukei ira na tani e sa vakalevutaki mai na noda vakavinavinaka ena veika sa cakava vei keda na iVakabula. Oya na vuna eda reki vakalevu kina ni da rogoca na veivosa e lagati: “Nai solisoli sa soli mai meu vota.”1 Na Tui o Penijamini, ena nona vunau levu ka volai ena iVola i Momani, a yalataka na vakanananu oya ni vakavinavinaka ena lako mai (raica na Mosaia 2:17–19).
Ni sa muataki keda na noda vakabauti Jisu Karisito meda rawata na reki ni Nona veivosoti, eda vakila e dua na gagadre meda qaravi ira na tani ena Vukuna. A vakatavulica na Tui o Penijamini ni veivosoti e sega ni vakataucokotaki ena dua ga na gauna.
A kaya vakaoqo o koya: “Ia au na lesuva tale na veika au sa tukuna oti vei kemuni—me rawa ni bokoci na nomuni ivalavala ca ena veisiga, ka mo ni dodonu kina ena mata ni Kalou—Au sa kaya tale vei kemuni, mo ni vakacegui ira na dravudravua ena veika ko ni sa rawata, mo ni vakani ira sa viakana, vakasulumi ira sa luvawale, sikovi ira na tauvimate ka vukea na nodra leqa, vakayago ka vakayalo talega” (Mosaia 4:26).
Na itokani i Alama, o Amuleki, a vakatavulica talega na dina meda na tomana voli ena noda qaravi Koya meda taura dei kina na veivosoti: “Oi kemudou na wekaqu lomani, au sa kaya vei kemudou, dou kakua ni nanuma ni sa ikoya ga oqori; raica kevaka dou sa kitaka rawa na veika oqo, dou qai sega ni vukei ira sa dravudravua, vakasulumi ira sa luvawale, ka sega ni vukei ira sa tauvimate ka rarawa tu, ka wasea na veika sa tu vei kemudou vei ira sa dravudravua—au sa kaya vakaidina vei kemudou, kevaka dou sa sega ni kitaka na veika oqo, sa tawayaga na nomudou masu, ia dou sa vakataki ira ga na dauveivakaisini, ni ra sa cakitaka na ka dina” (Alama 34:28).
Ena bogi nikua au vakasamataki ira na marama ena noqu bula. E tiko e 31 na marama kei na goneyalewa ena neitou matavuvale, me tekivu vei watiqu ka toso yani oka kina e tolu na makubui keirau yalewa vou vakarua. E so sa tiko vata kei keda ena bogi oqo. E lima se bera ni yabaki 12. Oqo kena irairai na matai ni nodra soqoni ena Vale ni Koniferedi vata kei ira na tuakadra ena Lotu ni iVakabula. Ena tiko na nodra vakanananu duidui yadua ka cakava na nodra dui veidinadinati mai na veika era sotava eke.
E tolu na vakanananu ka tolu na veidinadinati au sa nuitaka eratou na nanuma ena nodratou bula taucoko ka sivia yani. Na vakanananu e sa baleta na nanuma e so. Kei na veidinadinati e sa baleta na veika me caka.
Na nanuma bibi levu duadua na loloma. O sa vakila na nodra loloma na marama iliuliu lelevu sa ra vosa oti. Ka o sa vakila ena Yalotabu ni ra sa lomani iko ena nodra sega madaga ni kilai iko baleta ni ra a vakila na loloma ni Tamada Vakalomalagi kei na iVakabula me baleti iko. Oya na vuna era sa vinakata kina vakalevu mera qaravi iko ka ciqoma na veivakalougatataki e vinakata na Kalou kivei iko.
O sa vakila na loloma me baleti ira na tani ena bogi oqo—ira na veitokani, itokanivuli, veiwekani, ka vakakina e dua o se qai kila vakadua, dua na vulagi. Na nanuma oya e sa isolisoli mai vua na Kalou. Era vakatoka na ivolanikalou na “loloma cecere” kei “na loloma sa uasivi sara i Karisito” (Moronai 7:47). O sa vakila na loloma oya ena bogi oqo, ka sa rawa ni o ciqoma wasoma kevaka o vakasaqara.
Ai karua ni nanuma o sa sotava ena bogi oqo oya na veivakayarayarataki ni Yalo Tabu. Sa ra yalataka vei iko na sisita ena bogi oqo ni na tuberi iko na Yalo Tabu mo raica na veiqaravi e vinakata na Turaga mo solia vei ira na tani ena Vukuna. O sa vakila mai na Yalotabu ni sa mai vua na Turaga na nodra yalayala ka sa dina sara.
A kaya na Turaga: “E dina, e dina, au sa kaya vei iko, mo vakarorogo vua na Yalo Tabu ni na tuberi iko ena sala dodonu—io ena vukei iko mo kitaka na veika vinaka, mo yalomalumalumu, mo lewa vakadodonu; raica oqori ga na noqu Yalo Tabu” (V&V 11:12).
O sa na rairai ciqoma na veivakalougatataki oya ena bogi oqo. Me ivakaraitaki, e dua na yaca se mata ni dua na tamata e leqa tu o na rairai nanuma rawa donuya na soqoni oqo. Ena rawa ni dua ga na nanuma lekaleka, ia baleta na ka o sa rogoca ena bogi oqo, o na masulaka, ka nuitaka ni na liutaki iko na Kalou mo cakava na ka vinaka e vinakata o Koya kivei ira. Ni yaco me dua na ivakarau ni nomu bula na masu vakaoqori, ko na veisau mo vinaka cake sara kei ira na tani.
Na ikatolu ni nanuma o sa sotava ena bogi oqo oya na nomu via volekata sara na iVakabula. Na yalewa gone duadua sara madaga eke sa na vakila na dina taucoko ni veisureti ena sere: “Muri au mai, sa kaci tu. Muri we ni yavai Jisu.”2
Io, ena veinanuma oya, na matai ni ka mo vakadeitaka ni cakava oya mo lako ka veiqaravi ni kilai tu ni o sega ni lako duadua. Ni o lako mo vakaceguya ka qarava e dua ena vuku ni iVakabula, e vakarautaka o Koya kivei iko na sala. Me vaka era na tukuna vei iko na lesu mai na kaulotu ena bogi oqo, oya e sega ni kena ibalebale ni tamata kecega ena daku ni katuba kecega e sa vakarau tu me ciqomi iko se na tamata kecega o tovolea mo qarava ena vakavinavinakataki iko. Ia na Turaga ena liutaki iko me vakarautaka na sala.
Vakavuqa nona dau tukuna o Peresitedi Thomas S. Monson ni sa kila na dina taucoko ni yalayala ni Turaga: “Ia ko koya sa vakacegui kemudou, sa vakacegui au talega, niu sa lako vata tiko kei kemudou. Au na tiko ena yasamudou imatau ka tiko talega ena yasamudou imawi, ia na noqu Yalo Tabu ena tiko e yalomudou, era na vakavolivoliti kemudou na noqu agilosi, ka laveti kemudou cake” (V&V 84:88).
Dua na sala e lako vata tiko kina kei keda o Koya oya me vakarautaka na yalo ni dua na tamata e sa kerei iko o Koya mo qarava. Ena vakarautaka talega o Koya na yalomu.
O na raica talega ni sa biuti ira na dauveivuke na Turaga ena yasamu—ena yasamu imatau, yasamu imawi, ka vakavolivoliti iko taucoko. O sega ni lako duadua mo qaravi ira na tani ena Vukuna.
O Koya e cakava vei au oya ena bogi oqo. A vakarautaka na Turaga “e lewe vuqa e vaka na o” (Iperiu 12:1), ena vosa kei na ivakatagi, me cokota vata ka vakalevutaka na kaukauwa ni ka e vinakata o Koya meu tukuna. Au via vakadeitaka ga ni sa veiganiti kaya na ka au a vakarautaka ki na itukutuku e vinakata o Koya meu wasea. Au nuitaka ka masulaka ni ko na vakila na vakacegu kei na reki ni sa biuti iko na Turaga vata kei ira na tani mo veiqaravi ena Vukuna.
Ni ko sa vakamatautaki iko ena veika oya, ena yacovi iko, ko na vakatakila ena matadredredre, me vakataki au, ena gauna cava ga eda lagata, “Talei na liga ni Kalou.”3
O na matadredredre talega ni o nanuma na tikina oqo: “Ena qai vosa na Tui ka kaya vei ira, Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au” (Maciu 25:40).
Na ikarua ni ka mo cakava oya mo nanuma na Turaga ni ko veiqaravi voli ena Vukuna. E sega walega ni lako vata kei keda na Turaga ka talai ira mai na agilosi mera veiqaravi vata kei keda, ia e vakila talega o Koya na vakacegu eda solia kivei ira na tani me vaka eda a solia ki Vua.
Na luvena yalewa kece na Kalou e rogoca ka vakadinata na veitukutuku ni soqoni oqo ena taroga, “Na cava ena vinakata na Turaga meu cakava meu vukei Koya kina ena nodra vakacegui na vakaleqai tu?” Sa duidui na ituvaki ni marama yadua. E dina oya vei ira na ilala luvequ yalewa, ira na vugoqu, makubuqu yalewa kei na makubuqu yalewa vakarua. Kivei ira, kei na luvena yalewa taucoko na Tamada Vakalomalagi, au tokaruataka na ivakasala yalomatua nei Sisita Linda K. Burton.
E sa kerei iko o koya mo masu ena vakabauta mo kila na ka e vinakata na Turaga mo cakava ena nomu ituvaki e so. Ka qai tukuna o koya na yalayala ni veivakacegui kamica a solia Vakaikoya na Turaga kivua na marama ka vakalewai ena vuku ni nona lumuta na Uluna ena waiwai sau levu ka a rawa ni volitaki me vukei ira na dravudravua.
“A sa kaya ko Jisu, Laivi koya ga; dou sa saga ena vuku ni cava? Sa cakava vei au e dua na cakacaka vinaka.
“Sa tiko vakadua kei kemudou ko ira na dravudravua, ia ni dou sa via cakava na ka sa yaga vei ira, sa rawarawa ga: ia koi au, kau na sega ni tiko vakadua kei kemudou.
“Sa kitaka ko koya na ka sa rawata: sa lako mai eliu ko koya me lumuta na yagoqu me bulu.
“Au sa kaya vakaidina vei kemudou, Ena veiyasana kecega e vuravura taucoko ena vunautaki kina nai tukutuku vinaka oqo, ena bau tukuni talega kina na ka sa kitaka na yalewa oqo, me kena idivi” (Marika 14:6–9).
Na ivolanikalou lekaleka oya e sa ivakasala momona kivei ira na marama yalodina ena matanitu ni Turaga ena veigauna ni tiko yavala. O na masulaka mo kila o cei ena vinakata na Kalou mo qarava vakailoloma ena Vukuna ka vakakina na noda iVakabula. Ka ko na sega ni namaka e dua na idivi vakavanua, salamuria na ivakaraitaki ni marama ena itukutuku ni ivolanikalou nei Marika, ka sa nanumi na nona cakacaka tabu ni doka na iVakabula kei vuravura ka sega ni yacana.
Na noqu vakanuinui oya ni ra na cakava na nodra maqosa taucoko na marama ena neitou matavuvale mai na loloma ni Kalou mera qaravi ira na vakaleqai tu. Kei nai katolu ni ka au nuitaka era na cakava oya mera yalomatuataka na nodra cakacaka vinaka. Ia au na masulaka ni ra na vakadonuya na ivakasala ni Turaga, ni a kaya—kau sa yalodei eda gadreva taucoko ni rogoca:
“Dou raici kemudou vinaka mo dou kakua ni kitaka na nomudou loloma ena matadra na tamata, me ra raici kemudou kina: kevaka e vaka oqo ena sega na kemudou isau mai vua na Tamamudou sa tiko mai lomalagi.
Oti qai kaya o Koya:
“Ia ko iko ni ko sa soli ka ni loloma, me kakua ni kila na ligamu imawi na ka sa kitaka na ligamu imatau:
“Me vuni kina na nomu iloloma: ia na Tamamu sa raica na ka e vuni ena sauma votu vei iko” (Maciu 6:1, 3–4).
Na noqu masu me baleti ira na marama ena matanitu, na vanua cava ga era tiko kina se mataqali ituvaki ni bula, oya ni na muataki ira na nodra vakabauta na Turaga kei na vakavinavinakataki ni Nona Veisorovaki mera cakava na ka kece era rawata me baleti ira e sa kerei ira kina na Kalou mera qarava. Ni ra sa cakava, au yalataka ni ra na toso cake ena salatu mera sa marama vakatabui, ka na kidavaki ira ena marau na iVakabula kei na Tamada Vakalomalagi ka vakaicocovitaki ira vakataucoko.
Au vakadinadinataka ni oqo na Lotu i Jisu Karisito ka sa tucake tale. Sa vakaturi cake o Koya. Sa sauma o Koya na isau ni noda ivalavala ca taucoko. Au kila oya baleta ni ena Vukuna eda na tucake tale ka rawata na bula tawamudu. Nona parofita bula o Peresitedi Thomas S. Monson. Sa dau rogoca ka sauma na noda masu na Tamada Vakalomalagi. Au vakadinadinataka eda toso volekata na iVakabula ni da qaravi ira na tani ena Vukuna, mai na loloma uasivi sara. Au sa laiva na veivakadeitaki oya ena yaca i Jisu Karisito, emeni.