ʻE Lava ʻe he Malimalí ʻo Fai ha Liliu

Ko hono fakamahinoʻi mai ʻe Palesiteni Utchdorf ha ongo taumuʻa ʻe ua ʻoku totonu ke tau ngāueʻi: ko e ʻofa ki he ʻOtuá pea mo e ʻofa ki hotau kāingá. Ka ko e taimi ʻe niʻihi ʻoku faingataʻa pē ia ke ʻofa he niʻihi kehé. ʻI he kotoa hoʻo moʻuí, mahalo ʻe ʻi ai ha ngaahi taimi te ke faingataʻaʻia ai ke feohi mo e niʻihi kehé—mahalo naʻe fakamamahiʻi koe ʻe ha taha pe naʻe faingataʻa ke ke fetuʻutaki pe vālelei mo ha taha. ʻI he ngaahi momeniti ko ʻení, feinga ke ke manatuʻi ha ʻofa naʻá ke ongoʻi mei ho kaungāmeʻá, fāmilí, Tamai Hēvaní pea mo Sīsū Kalaisi. Manatuʻi ʻa e fiefia ne ke ongoʻi he ngaahi tuʻunga ko iá peá ke feinga ke ke fakakaukauloto atu fēfē kapau ʻe maʻu ʻe he taha kotoa pē ha faingamālie ke ne ongoʻi ai ha ʻofa pehē. Manatuʻi ko e tokotaha kotoa pē ko ha ʻofefine pe foha ʻo e ʻOtuá pea ʻoku taau ke ne maʻu ʻEne ʻofá mo hoʻo ʻofá.

Fakakaukau ki ha tokotaha pau ʻi hoʻo moʻuí ʻoku faingataʻa ke mo vālelei. Fakakau ia ʻi hoʻo ngaahi lotú peá ke kole ki he Tamai Hēvaní ke ne fakaava ho lotó kiate kinautolu. He ʻikai hano taimi kuó ke kamata vakai kiate kinautolu ʻo hangē ko ʻEne vakai kiate kinautolú: ko e taha ʻo ʻEne fānaú ʻoku taau ke ʻofaʻi.

Hili hoʻo lotú, fai leva ha meʻa lelei maʻanautolu! Mahalo te ke fakaafeʻi kinautolu ki ha ʻekitivitī ʻa e Mutualé pe ko e ʻeva mo hao kaungāmeʻa. Fakahā ange hoʻo fie tokoni ki heʻene homueká. Pea naʻa mo haʻo foʻi fakalea “mālō e lelei” ange pē mo malimali ki ai. ʻE lava ʻe he fanga kiʻi meʻa īkí ʻo fai ha fuʻu liliu lahi … ʻi hoʻomo moʻuí fakatouʻosi!