Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hono Fakatonutonu e Meʻa ʻOku ou Fakamuʻomuʻá
Hili ha kiʻi taimi nounou mei hono kamataʻi ʻemau tohinoa fakafāmili he ʻinitanetí (blog), ne u toki fakatokangaʻi hake ko hoku kiʻi taimi ʻataá ʻoku fakaʻaongaʻi ia ki hono fakahū ki ai e fakamatalá mo e fakakaukauʻi e founga ke toe mohu founga mo manakoa aí. ʻOku ou fakamoleki foki ha taimi lahi ʻi hono lau e blogs ʻa e kakai kehé.
Ne ʻikai lava ha ngaahi uike lahi, kuo toʻo kotoa ʻe he meʻá ni ia hoku taimi ako folofolá mo e taimi lautohí. Naʻe ʻikai ke u lava ʻo tukutaha ʻeku tokangá ki heʻeku akó, naʻe ʻikai ke u toe fie lautohi pea ne u ongoʻi e mavahe e Laumālié mei heʻeku moʻuí. Ne siʻi ʻeku kātakiʻi ʻeku fānaú pea ko e taimi naʻe totonu ke u fakaʻaongaʻi ke feohi mo kinautolú, naʻe fakamoleki ia he komipiutá.
Naʻe ʻikai ke pehē ia ne taʻefeʻunga ʻa e tohinoa he ʻinitanetí; he ko e founga lelei foki ia ke feʻiloaki ai mo e fāmilí mo e kaungāmeʻá. Ka ne u ongoʻi hangē naʻe hiki ʻeku tokangá mei he meʻa ne maʻu mei ai hoku mālohi fakalaumālié, pea ne u ʻiloʻi naʻe fie maʻu ke u liliu.
Ne u kamata ʻaki ʻeku pehē kiate au naʻe ʻikai fie maʻu ia ke u tohi he ʻinitanetí he ʻaho kotoa pē pea naʻe ʻikai fie maʻu ia ke u vakaiʻi maʻu pē meʻa ʻoku tohi ʻe he kakaí he ʻaho kotoa. Ne u fakapapauʻi te u lava ʻo fakamoleki hoku taimi ʻataá ʻi he komipiutá kae toki fai pē ia he ʻosi ʻeku lau folofolá mo e laukonga kehé. ʻI he taimi ne ʻosi ai hono fai e ngaahi meʻa mahuʻingá, naʻe ʻikai leva toe ʻi ai ha taimi lahi ia ki he tohi he ʻinitanetí, ka naʻe sai pē ia. Ne u toe maʻu ha taimi lahi—ko ha taimi ke u tokangaʻi mo vaʻinga ai mo ʻeku fānaú, laukonga pea mo ako foki.
Hili pē ha ngaahi ʻaho siʻi hono liliu e ngaahi meʻa ke u fakamuʻomuʻá, ne u fakatokangaʻi ne u toe ongoʻi lahi ange ʻa e Laumālié heʻeku moʻuí.
ʻOku ou ʻiloʻi ʻi heʻeku fakamuʻomuʻa ko ia e meʻa ʻe lelei fakalaumālie kiate aú, te u ongoʻi lahi ange mo fakaʻaho ai e Laumālié. ʻOku ou ʻiloʻi ko hono tuku ko ia ha taimi ke ako e folofolá, lau e ngaahi makasini ʻa e Siasí mo e ngaahi tohi lelei kehé, pea mo fakakaukau ki he meʻa ʻoku mahuʻinga taʻengatá, te u hoko ai ko ha uaifi mo ha faʻē lelei ange, pea mo ha mēmipa lelei ange ʻi he Siasi ʻo e ʻEikí.