Kae ʻOua Ke Tau Toe Fakataha Mai
Ko ha Ngāue ki ha Palōfita Moʻui
ʻI he 1939, kimuʻa pea pavaki mai e Tau Lahi ʻa Māmani Hono II, naʻe fakaafeʻi ai ʻa Misa Palauni ki he Falealea ʻo e Kakai ʻo ʻIngilaní, ke ne fai ha fakamatala taukapo ki heʻene tala ko Siosefa Sāmitá ko ha palōfita. ʻI ha lea ʻa Palesiteni Palauni naʻe fai ʻi he ʻUnivēsiti Pilikihami ʻIongí he ʻaho 4 ʻo ʻOkatopa 1955, ne ui ko e “The Profile of a Prophet,” naʻá ne fakamatalaʻi ai ʻenau fetalanoaʻakí (vakai, speeches.byu.edu).
Tā fakatātaaʻi ʻe James Johnson
Ne u kamata ʻaki … , “Mou tala ko ʻeku tui ko ia ne folofola e ʻOtuá ki ha tangata he kuonga ní ʻoku mālie mo ngalikehe?”
“Kiate au, ʻoku pehē.”
“ʻOkú ke tui ne folofola ʻa e ʻOtuá ki ha taha?”
“Ko ia hono kotoa, ʻoku tau mātā hono fakamoʻoní ʻi he Tohi Tapú.”
“Naʻá Ne folofola kia ʻĀtama?”
“ ʻIo.”
“Kia ʻĪnoke, Noa, ʻĒpalahame, Mōsese, Sēkope, Siosefa mo e kau palōfita kehé?”
“ʻOku ou tui naʻá Ne folofola kiate kinautolu takitaha.”
“ʻOkú ke tui naʻe ngata nai e fetuʻutaki ʻa e ʻOtuá mo e tangatá he taimi naʻe hā mai ai ʻa Sīsū ki he māmaní?”
“ʻIkai, ne aʻu e faʻahinga fetuʻuaki ko iá ki hono tumutumú he taimi ko iá.”
“Tangata, ʻokú ke tui nai hili e toetuʻu ʻa Sīsuú, naʻe ʻi ai ha tangata loea—ko ha tangata faʻu tēniti ko hono hingoá ko Saula ʻo Tāsisí—ʻi heʻene ʻalu ki Tāmasikusí naʻá ne talanoa ai mo Sīsū ʻo Nasaletí, ʻa ē kuo tutuki, toetuʻu pea hāʻele hake ki he langí?”
“ʻIo ʻoku ou tui ki ai.”
“Ko e leʻo ʻo hai ne fanongo ki ai ʻa Saulá?”
“Ko e leʻo ʻo Sīsū Kalaisí he naʻá Ne fakahaaʻi pē Ia.”
“Ko ia ʻoku ou fakahū atu ai ʻi he loto fakamātoato kotoa, ko e founga angamahení pē ia he kuonga ʻo e Tohi Tapú ke folofola e ʻOtuá ki he tangatá.”
“ʻOku ou tui te u talaatu ia, ka naʻe ngata pē ia hili e senituli ʻuluaki ʻo e kuonga faka-Kalisitiané.”
“ʻOkú ke pehē ko e hā naʻe ngata aí?”
“Heiʻilo.”
“ʻOkú ke pehē nai ko e talu mei ai mo e ʻikai toe folofola mai e ʻOtuá ia?”
“ʻOku ou tui kuo teʻeki ai.”
“Pau pē ʻoku ʻi ai hono ʻuhinga. Te ke lava ʻo tuku mai ha ʻuhinga?”
“ʻOku ʻikai ke u ʻilo.”
“Fēfē ke u fokotuʻu atu ha ngaahi ʻuhinga? Mahalo ʻoku ʻikai toe folofola e ʻOtuá ia ki he tangata he ʻoku ʻikai pē ke Ne lava ʻo toe fai ia. Kuo mole meiate Ia ʻa e mālohí.”
Naʻá ne pehē ange, “Ko e takuanoa ia.”
“Sai, kapau ʻoku ʻikai ke ke tali ia, mahalo ʻoku ʻikai ke Ne toe folofola ki he tangatá he ʻoku ʻikai ke Ne toe ʻofa mai kiate kitautolu pea ʻoku ʻikai ke Ne toe mahuʻingaʻia he ngaahi meʻa ʻoku hoko ki he kakaí.”
Naʻá ne pehē mai, “ʻIkai. ʻOku ʻofa e ʻOtuá ki he kakai kotoa pē, pea ʻoku ʻikai ke filifilimānako Ia.”
“Sai, kapau te Ne lava ʻo folofola mai pea kapau ʻokú Ne ʻofa mai, ta ʻoku taha pē ʻa e talí ia, ʻi he anga ʻeku vakaí, ta ʻoku ʻikai ke tau toe fie maʻu Ia. Kuo tau fakalakalaka lahi he tafaʻaki fakasaienisí pea kuo tau ako lelei, ko ia ʻoku ʻikai ke tau toe fie maʻu ai e ʻOtuá.”
Naʻá ne pehē mai leva—pea naʻe tetetete hono leʻó ʻi heʻene fakakaukau ki he tau ne teuaki maí—“ʻE Misa Palauni, kuo teʻeki ai pē ha kuonga ia he hisitōlia ʻo e māmaní ʻe fie maʻu ai e leʻo ʻo e ʻOtuá, ʻo hangē ko e taimi ní. Mahalo te ke lava ʻo talamai e ʻuhinga ʻoku ʻikai ke Ne folofola mai aí.”
Ne u tali ange: “ʻOkú Ne folofola mai, kuó Ne folofola mai; ka ʻoku fie maʻu ke tui e tangatá ka nau ongona Ia.”