Talaʻofa ʻe 5 ʻo e Lotú
ʻOku nofo ʻa e taha naʻá ne faʻú ʻi ʻIutā, USA.
Naʻe tuku mai ʻe he Tamai Hēvaní e lotú ko ha founga ke tau fetuʻutaki hangatonu ai mo Ia kae lava ke tau fai ha fakafetaʻi, kole ha ngaahi tāpuaki pea mo tupulaki fakalaumālie ai. Taimi ʻe niʻihi ko e meʻa pē ʻoku fie maʻú ke punou hotau ʻulú, kūnima pea tau lea ʻaki ha fanga kiʻi lea faingofua mo fakamātoato. Tōatu ē? Ko ha ngaahi talaʻofa pe tāpuaki ʻeni ʻe nima ʻe lava ke tau maʻu kapau te tau lotu:
1 Ko ha Mālohi ke Ikunaʻi
ʻI heʻetau hoko ko ha tangatá, ʻoku tau lava ke ongoʻi vaivai ʻi ha ngaahi founga lahi—fakatuʻasino, fakaeloto, fakalaumālie pea mo fakaʻatamai. Te tau lava ʻo fefaʻuhi mo e lele ʻi ha lova pe lava ʻi ha sivi pe matuʻuaki ha ʻahiʻahi pe ongoʻi e Laumālié. Ka ʻoku lava ke ʻomi ʻe he lotú ʻa e mālohinga ʻoku tau fie maʻu ke ikunaʻi ʻaki ha faʻahinga meʻa pē ʻoku tau fehangahangai mo ia he moʻuí.
Naʻe pehē ʻe Nīfai, “ʻOku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7). ʻE lava ke ʻomi ʻe he ʻEikí ha mālohinga ke tau lavaʻi ʻaki ha faʻahinga meʻa lelei ʻoku tau feinga ke fai kapau ko Hono finangaló ia.
Lotu ke maʻu ha mālohi ke ikunaʻi e ʻahiʻahí. Lotu ke maʻu ha mālohi ke ke tokanga pea lelei hoʻo ako ki ha sivi. Lotu ke maʻu ha mālohi ke ke lele kae ʻikai ongosia. Lotu ke maʻu ha mālohi pea te Ne ʻai koe ke ke mālohi.
Ngaahi tā fakatātā ʻa Clayton Thompson
2 Faʻa Fakamolemole
ʻOku ʻikai ke tau haohaoa, neongo ʻoku ʻikai ke tau fie fakakaukau pehē. ʻOku tau fai ha ngaahi fehalaaki, pea ko ha konga pē ia ʻo e moʻuí. Ka ʻoku ʻomi ʻe he ʻEikí ha founga ke fakaleleiʻi ʻaki kinautolu: ko e mālohi ia ʻo e Fakalelei ʻa Sīsū Kalaisí. Pea ko e founga ʻe taha ke maʻu ai Hono mālohí, ko e lotú.
ʻI heʻetau kolea ha fakamolemole ʻi heʻetau lotú, ʻe lava ke fakamolemoleʻi ʻetau ngaahi angahalá ʻo fakafou ʻi he Fakalelei ʻa e Fakamoʻuí. Neongo ʻe fie maʻu e tokoni ia ʻa e pīsopé pe palesiteni fakakoló ʻi he ngaahi angahala lalahí, ka ʻe hoko maʻu pē ʻa e lotu fakatāutahá pea mo e lotu fakamātoató ko e taha ʻo e ngaahi fuofua sitepu ki he faʻa fakamolemolé—tatau ai pē pe ko ʻetau kole ki he Tamai Hēvaní ke ne fakamolemoleʻi kitautolu pe tokoni mai ke tau fakamolemoleʻi ha taha kehe. Te Ne tokoni foki ke tau ako ke fakamolemoleʻi pē kitautolu.
3 ʻIlo mo e Tataki
Mahalo ʻoku kau e fakahā fakatāutahá he taha ʻo e ngaahi tāpuaki ʻoku talaʻofa mai ʻe he lotú, te ke fakakaukau ki aí, tautautefito kapau ʻokú ke fakakaukau ki he kaveinga foʻou ʻo e Mutualé. Naʻe ʻikai ʻilo lahi ʻa Siosefa Sāmita ki he siasi naʻe totonu ke ne kau ki aí, ko ia naʻá ne tūʻulutui ai ʻi he Vaoʻakau Tapú ʻo fai ʻene fehuʻí peá ne maʻu ha tali—ʻi ha founga fakaofo moʻoni.
Ka ʻoku ʻikai ko e kau palōfitá pē ʻoku maʻu fakahaá, pea ʻoku ʻikai fie maʻu ke hoko ia ko ha meʻa ʻe ngalulu ai e māmaní. Kapau ʻoku tau masiva ʻi he potó ʻi ha faʻahinga meʻa, te tau lava pea ʻoku totonu ke tau kole ki he ʻOtuá. Te Ne tali mai, kae mahalo he ʻikai fai ia he founga ʻoku tau faʻa ʻamanaki ki aí. ʻE tali ʻe he ʻEikí ʻetau ngaahi fehuʻí pea tokoni ke tataki ʻetau moʻuí, ka kuo pau ke tau ʻuluaki kole!
4 Holi ke Fai e Finangalo ʻo e ʻEikí
Mahalo ʻe faingataʻa ke tau lau ko ha tāpuaki ʻeni—he ko hono moʻoní, ʻoku tau fakaʻamu he taimi ʻe niʻihi ke maʻu ʻa e meʻa ʻoku ʻikai finangalo e ʻEikí ia ke tau maʻú. Ka ʻi heʻetau lotu ke tau ului moʻoni mo maʻu ʻa e holi ke fai e finangalo ʻo e ʻEikí, te tau fakatokangaʻi ai ha meʻa fakaofo: ʻe hangē leva ʻoku tatau e meʻa ia ʻoku tau fakaʻamu ki aí, mo e meʻa ʻokú Ne finangalo ki aí.
Ka heʻikai tupukoso hake pē liliu ko ʻeni ʻo e lotó. Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e tokolahi ʻo kitautolu, ʻoku hoko e uluí ia ko ha founga taʻetūkua pea ʻikai ko ha meʻa ʻoku hoko fakaʻangataha pē, ke iku ai ki ha aʻusia ʻoku mālohi mo makehe. ʻOku hoko ʻi he ʻotu lea ki he ʻotu lea mo e akonaki ki he akonaki, ʻo māmālie pea ʻikai faʻa fakatokangaʻi, ʻa ʻetau fakakaukaú, leá, mo ʻetau angafaí, ʻa e fakaʻau ke nau taau mo e finangalo ʻo e ʻOtuá” (“Ului ki he ʻEikí,” Liahona, Nōvema 2012, 107–8).
5 Nonga
Ko e taha e ngaahi tāpuaki kuo talaʻofa maí, kapau te tau lotu, te tau maʻu ha nonga mo e fiemālie ʻo fakafou ʻi he Laumālie Māʻoniʻoní. He ko Ia foki ʻoku ui ko e Fakafiemālié. ʻOku fakapapauʻi ʻe hoko mai ʻa e nongá ʻi he ngaahi taimi faingataʻá. Manatuʻi e talaʻofa ʻa e ʻEikí ʻi he Sione 14:27, “ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia.” ʻE hoko mai ʻa e nongá kapau te tau kole.
Ko e lotú ko ha founga fetuʻutaki fakahangatonu ia mo ʻetau Tamai ʻofá. Fakaʻaongaʻi ia pea tuku ke Ne tāpuakiʻi koe ai. Ka ʻi he hili hono maʻu e ngaahi tāpuakí ni mei he lotu fakamātoató, manatuʻi ke fakahaaʻi hoʻo loto houngaʻia moʻoní—ʻo fai haʻo lotu.