Kole

Sēmisi 1:5–6

Stephen W. Owen

Palesiteni Lahi ʻo e Kau Talavoú

Bonnie L. Oscarson

Palesiteni Lahi ʻo e Kau Finemuí

“Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia.

“Ka ʻe lelei ʻene kole ʻi he tuí, ʻo taʻefakataʻetaʻetui. He ko ia ʻoku fakataʻetaʻetuí ʻoku hangē ia ko e peau ʻo e tahí ʻoku fakateka mo felīlīaki ʻe he matangí.”

Sēmisi 1:5–6

Ko e hā naʻe fili ai e kaveinga ko ʻení, pea ko e hā ʻene ʻuhinga kiate koé? Ko e vahevahe mai ʻe Brother Stephen W. Owen, Palesiteni Lahi ʻo e Kau Talavoú pea mo Sister Bonnie L. Oscarson, Palesiteni Lahi ʻo e Kau Finemuí, ʻena fakakaukaú.

Ko e hā ne fili ai e potu folofola ko ʻení?

Sister Oscarson: ʻOku ʻafioʻi ʻe he ʻEikí ʻa e pōpoaki te mou fie maʻú, pea ʻoku fakaofo e founga ʻoku hanga ai ʻe he kaveingá ni ʻo tali e ngaahi palopalema ʻoku hoko he taʻú, kae pehē ki heʻene kaungatonu ki he ngaahi meʻa ʻoku hoko ʻi hoʻomou moʻuí.

ʻI heʻetau talanoa ki he Sēmisi 1:5–6 ke hoko ko ha kaveinga ki he taʻu ní, naʻe nofoʻia e lokí ʻe he Laumālié. Pea ne mau lototaha kotoa ʻe hoko ia ko ha potu folofola maʻongoʻonga maʻá e toʻu tupú he ʻoku lahi hono ngaahi fakafehokotakí. ʻOku fakafehokotaki ia ki he hisitōlia ʻo e Siasí—ko e potu folofola ia naʻe lau ʻe Siosefa Sāmita pea ueʻi ai ia ke ne ʻalu ki he Vaoʻakau Tapú ʻo lotú. Pea ko e fehokotaki hono uá, ʻoku fakamoʻoni ia ki he misiona fakalangi ʻo Siosefa Sāmitá, ko ha meʻa ʻoku tau fie maʻu ʻi ha taimi ʻoku toutou fehuʻia ai ʻe he māmaní hono ongoongó pea mo e hisitōlia ʻo e Siasí. Ko ha pōpoaki foki ia ki he founga ʻoku tau maʻu ai ha fakahā fakafoʻituitui heʻetau moʻuí, ka ʻoku fie maʻu ke ʻilo ʻe he taha kotoa pē.

Brother Owen: Lahi fau e meʻa ʻoku hoko ʻi hoʻomou moʻuí, pea lahi mo hoʻomou ngaahi fehuʻí. ʻI he mītia fakasōsiale mo e ngaahi polokalama kumi ʻoku tau maʻú, ʻoku lahi fau e ngaahi maʻuʻanga tokoni te ke maʻu mei ai ha ngaahi tali ki hoʻo fehuʻi fekauʻaki mo e tuí. ʻOku ʻasi he potu folofola mahuʻingá ni e founga maʻu fakahā ʻa Siosefa Sāmitá, ʻa ia ko ha sīpinga te tau ala muimui ki ai.

ʻE hanga fēfē ʻe he toʻu tupú ʻo ʻai ke fakatāutaha mo nau fakaʻaongaʻi e Sēmisi 1:5–6?

Sister Oscarson: ʻOku ʻi ai ha pōpoaki maʻongoʻonga he potu folofolá ni. ʻOku pehē ai, “Kole ʻi he tuí, ʻo taʻe fakataʻetaʻetui” (Sēmisi 1:6). ʻOku mahuʻinga makehe ʻeni. ʻOku fie maʻu ke ke kole ʻi he tuí, kae ʻikai ʻi he loto veiveiua.

Brother Owen: Pea ʻoku ʻuhinga e kole ʻi he tuí ke kole ʻi he loto fakamātoato. ʻI he maʻu ʻe Siosefa Sāmita e tali ki he siasi ke kau ki aí, naʻe ʻikai pehē ange ia, “ʻIo, sai ke tau ʻilo, ka …” Naʻá ne laka atu ʻi he loto tui.

Sister Oscarson: Manatuʻi ko e lotu māʻoniʻoní ʻoku ʻikai ko ha kole pē meʻa ʻoku tau fie maʻú ka ko hono ʻiloʻi ia e finangalo ʻo e ʻOtuá maʻatautolú.

Ko e hā ha faleʻi te mo fai ki he toʻu tupú ʻo kau ki hono fakaʻaongaʻi e lotú heʻenau moʻuí?

Sister Oscarson: Toʻonga moʻui ʻaki ia. He ʻikai lava ke ngalo. He ʻikai lava ke ke liʻaki ia. ʻOku ʻomi ha sīpinga ʻe he tokoua ʻo Sēletí (vakai, ʻEta 2:14).

Brother Owen: Ko e meʻa kehe faʻa ngalo ia ke fai ha lotú, ka ʻoku fakamamahi e tafoki mei he ʻEikí ʻo taʻe fie lotú. Ko hoʻo ongoʻi pē ʻoku ʻikai totonu ke ke lotú, ko e taimi ia ʻoku fuʻu fie maʻu ai ke ke lotú. Pea kapau ʻoku fai hoʻo ngaahi lotú mo lau e folofolá, te ke ongoʻi maʻu pē Laumālié. Kapau ʻoku ʻikai ke ke fai ia, te ke mamaʻo ange ai.

Sister Oscarson: Te tau lava ʻo fefolofolai hangatonu mo e ʻOtuá. ʻOku ʻikai ke ne taʻotaʻofi mai. Meʻa fungani moʻoni ke ʻiloʻi te tau lava ʻo fai ia pea ʻokú Ne ʻi ai maʻu pē.

Ko e hā ha founga kuó ke ako ai ke lotu ʻi ha founga ʻoku mahuʻingamālie angé?

Sister Oscarson: ʻOku ʻikai ke u fakakaukau ki ha aʻusia pē ʻe taha; ka ko e moʻuí kotoa. Kuo hoko e lotú ko ha taha e ngaahi konga mahuʻingamālie taha hoku ʻahó he ʻoku ou feinga ke fakahoko maʻu pē ia. ʻOku toe lelei ange ai ʻeku fakafanongó mo maʻu e ngaahi talí. ʻOku tau ako pea tau toe lelei ange heʻetau toutou fakahoko ha meʻa. Ka ko hono fai maʻu pē ia he ʻaho kotoa pē, ʻo fakapapauʻi ʻoku ʻikai ke u tuku ke mole ha faingamālie ke u fefolofolai ai mo ʻeku Tamai Hēvaní. Ko e lahi ange ʻetau lotú, ko e lelei ange ia ʻetau fakafanongo ki he ngaahi talí.

Brother Owen: ʻI heʻeku kei ʻi he toʻu tupú, ko e taimi ko ē ne u fuʻu fie ʻilo ai ki ha meʻá, ne u manatuʻi ʻa e ʻUluaki Mata-meʻa-hā-maí peá u fakakaukau, “Naʻe fai ia ʻe Siosefa Sāmita. ʻOku ʻikai ke u fie maʻu ke fakahaaʻi peheʻi mai, ka ʻoku ou fie maʻu ha tali.” Peá u muimui leva ki he sīpinga ko iá ʻi he loto tui. ʻOku ou manatuʻi ʻeku tūʻulutui ʻo punou hoku ʻulú ʻo lotu leʻolahi. Kuo hanga ʻe heʻeku muimui ki he sīpinga ko iá ʻo tāpuekina ʻeku moʻuí ʻi ha ngaahi taimi lahi ke u maʻu ha fakahā fakatāutaha.

Ko e hā ha meʻa mahuʻinga ʻe lava ke ako ʻe he toʻu tupú mei he potu folofolá ni?

Brother Owen: ʻOku ou fie fakamamafaʻi ʻa e sīpinga ʻo e lotú naʻe fokotuʻu ʻe Siosefa Sāmitá. ʻI hono taʻu 14, naʻe puputuʻu peá ne lau ʻene folofolá. Ko e ʻUluaki Mata-meʻa-hā-maí ʻoku ʻikai ko ha momeniti noaʻia pē ia ne tūʻulutui hifo ai ʻa Siosefa. Naʻe ʻi ai ha ngāue lahi ne fai kimuʻa ai. Naʻá ne toutou fakakaukau ki heʻene fehuʻí. ʻI heʻene maʻu ʻa e Sēmisi 1:5–6 naʻá ne pehē, “Naʻe teʻeki ai ke hū mamafa ha potufolofola ki he loto ʻo ha tangata ʻo lahi ange ʻi he mālohi naʻe hū ʻaki ʻa e meʻá ni ki hoku lotó ʻi he taimi ko ʻení” (Siosefa Sāmita—Hisitōlia 1:12). Naʻe hū ia ʻi he mālohi lahi ki hono lotó pea naʻá ne ngāue leva ki ai. Naʻá ne lotu ʻi he loto fakamātoato peá ne ngāue leva ʻi he loto tui. Ko e meʻa ia ʻoku mau fakaʻamu te mou lava ʻo ongoʻi ʻi he potu folofola ko ʻení ʻi he taʻu 2017.