Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Ha Lotu ʻa ha Pule Sikauti
Tā fakatātā ʻa Allen Garns
Ko ha pule sikauti au pea ne u taki ha kau talavou ʻe toko 20 pea mo ha ongo taki ʻe toko ua, ʻi ha ʻekitivitī ʻo mau fononga ki he fakatonga ʻo ʻIutaá, USA.
ʻI heʻemau aʻu ki he afe ke mau aʻu ai ki he feituʻu faiʻanga kemí, ne u tuʻu ʻo vakavakaiʻi ʻa e fuʻu toafa ʻi muʻa ʻiate aú. Kuo tuʻo lahi ʻeku fai ha fononga peheni, ka naʻe ʻi ai pē ha faʻahinga ʻuhinga, naʻe ʻikai ke u lava ai ʻo fakatokangaʻi ha meʻa ne u sio ki ai. Ne u fakasio ki toʻohema mo toʻomataʻu, ke u sio ki ha meʻa ne u anga ki ai.
Neongo pe ko e hā e lahi e ngaahi hala ne mau afe aí, naʻe ngata kotoa pē ʻū halá ia.
Naʻe fakaʻau ke fakapoʻuli. Faifai peá u kiʻi tuʻu hifo ʻo talaange ki he taha kotoa ke nau tuʻu maʻu. Ne u toʻo mai ha kasa peá u talaange te u lue lalo ʻo kumi e halá pea te u toki fakaʻilonga ange heʻeku maʻu iá.
Ka ko e meʻa naʻá ku faí ko ʻeku tūʻulutui hifo ki lalo ʻo tautapa ki he Tamai Hēvaní ke tokoni mai ki he tuʻunga fakamamahi ne mau ʻi aí. Ne u lilingi hoku lotó kiate Ia, ʻo fakaikiiki ange ʻemau teuteu naʻe faí, ʻeku ʻofa ʻi he fānau tangatá ni, kae pehē ki heʻeku houngaʻia ʻi he ongo tamai ne omi mo kimautolú, pea mo ʻeku tui fakapapau te Ne tali vave mai ʻeku lotú. Ne u fakaʻosi ʻeku lotú peá u tuʻu hake ki ʻolunga. Ne u ʻamanaki aú te u tuʻu hake pē ʻo huluʻi atu e kasá ki he fakapoʻulí pea ʻasi mai leva ʻa e hala totonú.
Ka naʻe ʻikai ke hoko ha meʻa ia.
Ne u hulu fakalongolongo pē kimuʻa ki he mamaʻo taha ʻe aʻu ki ai e hulu ʻa e kasá.
Kei hala pē.
Ne ʻikai ke u faʻa tui ki ai. Naʻá ku ʻiloʻi ko ʻeku tuʻú hake pē, te u sio ki he halá. Naʻá ku ʻiloʻi he ʻikai tuku ʻe he ʻEikí ke u tuēnoa, tautautefito ki he kakai tokolahi ʻoku fakafalala mai kiate aú.
Ne pau ke u fehangahangai mo ha ongo tamai loto hohaʻa ne fonu ʻena vēní ha kau talavou loto tailiili ne nau fehuʻi kotoa mai, “Kuo tau mei aʻu?”
Ne u kole fakamolemole mo fakapapauʻi ange ko e tuʻo 20 ʻeni ʻeku haʻu heni pea ne u ʻiloʻi ʻoku ʻi heni e halá. Ka ʻoku ʻikai ke u lava ʻo sio ki ai.
Faifai pea mau pehē ke mau ō ki kolo ʻo mohe ai ʻi ha ongo loki he mōtelé. Te mau toki kamata fakalelei he pongipongi Tokonakí.
Koeʻuhí naʻe ʻikai ke mau lava ʻo tafu ha fanga kiʻi afi ke ʻai ai ʻemau meʻatokoni efiafi ne mau omi mo iá, ko ia ne mau ō ki he fale pisa he muikoló.
Naʻe ifo e pisá pea fiefia e kau talavoú, ka ne u kei ongoʻi tautea pē koeʻuhí ko e tohi moʻua ʻo e mōtelé mo e meʻatokoni efiafí.
ʻI heʻemau kaí, ne u fifili pe ko e hā nai naʻe ʻikai tali mai ai ʻe he Tamai Hēvaní ʻeku lotú, fakafokifā pē kuo mau fanongo ki ha haʻulu leʻolahi.
Ne u tuʻu hake ʻo fakaava e matapaá ʻo e fale pisá, peá u vakai atu ki he ʻuha lōvai lahi moʻoni kuó u mamata ai. Naʻe fatulisi ʻa e tafaʻaki tokelau-hihifó—ʻi he feituʻu tonu pē ko ia ne u lotu ai kimuʻa ange ke maʻu ha talí. ʻI he momeniti ko iá, naʻe nofoʻia au ʻe he Laumālié peá u ʻiloʻi kuo tali mai ʻe he ʻEikí ʻeku lotú!
ʻI he pongipongi hokó, kuo tafitonga e langí pea mau foki leva ki he fanga kiʻi hala ko ia ne mau ʻi aí, peá u hangatonu atu pē ki he foʻi afe ne mau ʻi ai he pō kimuʻá. ʻOku ou ʻiloʻi he taimí ni e founga ʻoku faʻa tali ʻikai mai ai ki heʻetau ngaahi lotú, ka ʻoku tali mai maʻu pē kinautolu.