Ko e Tohi ʻi he Funga Laupapá

Fai ʻe ʻEletā Walter F. González

ʻO e Kau Fitungofulú

“Fekumi, fifili pea mo lotu ʻa e ngaahi meʻa kuo pau ke u faí” (Tohi Hiva ʻa e Fānaú, 66).

Naʻá ku taʻu 12 he taimi ne u fanongo ai ʻo kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u fetaulaki mo ha ongo faifekau Siasi ʻi he pasí. Ne na kole mai pe te nau haʻu ʻo akoʻi hoku fāmilí.

Naʻe tuku mai ʻe he ongo faifekaú ha tatau ʻo e Tohi ʻa Molomoná pea mo ha tohitufa ʻo e fakamoʻoni ʻa Siosefa Sāmitá. Ko ha kakai lelei ʻeku ongomātuʻá. Ka naʻe ʻikai ke na kau ki he Siasí he taimi ko iá.

Naʻe taʻu lahi e hili e ongo tohí ni ʻi heʻemau tukuʻanga tohí. Pea ʻi he ʻaho ʻe taha ʻi heʻeku kei taʻu 18, ne u fakasio he tukuʻanga tohí ha tohi lelei ke u lau. Ne u toʻo hake ʻa e Tohi ʻa Molomoná ʻo lau e ʻuluaki vahé. Naʻe lōmekina au ʻe ha ongo makehe ʻi heʻeku lautohí.

Ne u maʻu ha aʻusia makehe ʻaki ʻa ʻeku ʻiloʻi naʻe moʻoni ʻa e tohí. Naʻe ʻi ai ha pōpoaki makehe ʻi he Tohi ʻa Molomoná ʻo fekauʻaki mo e Fakalelei ʻa Sīsū Kalaisí. Ne u ako lahi ange ki heʻeku moʻuí pea mo e ngaahi tāpuaki ʻa e Tamai Hēvaní.

Ne u ako kimui ange he neongo naʻe kei taʻu 14 pē ʻa Siosefa Sāmita, ka naʻá ne lototoʻa ke lau e ngaahi folofolá pea fehuʻi ki he Tamai Hēvaní pe ko e fē siasi moʻoní.

Talu mei ai mo ʻeku muimui maʻu pē ki he sīpinga ʻa Siosefa Sāmitá. ʻOku ou lau e folofolá peá u kole ki he Tamai Hēvaní ha tokoni mo ha tataki. ʻOku hoko ʻa e lotú mo e Tohi ʻa Molomoná ko ha konga mahuʻinga ʻo ʻeku moʻuí.

Ko ʻene ʻi ai pē haʻo palopalema, lau e Tohi ʻa Molomoná peá ke lotu. Te ke ʻilo lahi ange ai ki he ongoongoleleí pea mo maʻu e ngaahi tali ʻokú ke fie maʻú, hangē ko ia ne hoko kiate aú. Manatuʻi e ongo te ke maʻú ʻi hoʻo ongoʻi iá.