Ko e Meʻa ʻOku Tau Tui Ki Aí

ʻOku Tau Tui ʻe Fakafonu ʻe he Siasí ʻa e Māmaní

Naʻe toko ono pē kau mēmipa ʻo e Siasí he taimi naʻe fokotuʻu ai he 1830 ʻi ha kiʻi kolo ʻi Niu ʻIoke, USA. Talu mei ai mo e tupu ʻa e Siasí ʻo aʻu hono tokolahí ki he kāingalotu ʻe toko 15.5 miliona tupu pea mo ha ngaahi uooti mo ha ʻū kolo ʻi ha ngaahi fonua ʻe 150 tupu. Ko e tupulaki ko ʻení, ko hono fakakakato ia e kikite ʻi he Fuakava Motuʻá ʻe teka atu e Siasí ʻo kāpui e funga ʻo e māmaní (vakai, Taniela 2:31–45). ʻOku fakatatau e Siasí —ʻa e puleʻanga ʻo e ʻOtuá he māmaní—ko ha maka “naʻe tā mei he moʻungá taʻe kau ai ha nimá” (Taniela 2:45), ʻo fakahaaʻi ai ko ha ngāue fakaʻotua ʻeni kae ʻikai ko ha ngāue ʻa e tangata.

Neongo ai pē ka kāpui ʻe he Siasí ni ʻa e māmaní, ʻe kei toko siʻi pē hono kāingalotú. Naʻe tomuʻa mamata ʻa Nīfai ki he meʻá ni peá ne tohi ai ʻo kau ki hotau kuongá ʻo pehē, “Naʻá ku mamata ki he siasi ʻo e Lami ʻa e ʻOtuá, pea naʻe tokosiʻi” koeʻuhí ko e faiangahala mo e ngaahi anga fakalieliá (1 Nīfai 14:12). ʻI he fakaofi atu ki he Hāʻeleʻanga Ua mai ʻa Sīsū Kalaisí, ʻe toe fakautuutu ange ai e anga fakalieliá, pea “ʻe fakaʻau ke hōloa ʻa e manakoa ʻo ʻete hoko ko ha mēmipa ʻo e siasí.”¹

Ka naʻe tomuʻa mamata foki ʻa Nīfai ia ko e “siasi ʻo e Lamí, ʻa ia ko e kau māʻoniʻoni ʻa e ʻOtuá, naʻa nau ʻi he funga ʻo e māmaní foki” (1 Nīfai 14:12) ʻOku lava ke maʻu ʻa e ngaahi uōtí mo e ngaahi koló ʻi he funga ʻo e māmaní, pea ʻoku liliu e konifelenisi lahí ki ha ngaahi lea fakafonua ʻe 90 tupu, pea ʻoku feʻunga mo ha kau faifekau taimi kakato ʻe toko 75,000 ʻoku nau vahevahe atu e ongoongoleleí ʻi ha ngaahi misiona ʻe 418. ʻOku mafola foki ʻa e ongoongoleleí ʻi he funga ʻo e māmaní ʻo fakafou ʻi he mītia fakasōsialé mo e ngaahi uepisaiti hangē ko e Mormon.org pea mo e LDS.org.

ʻOku mahuʻinga mo lahi e ngaahi feinga ko ʻeni ʻoku faí ka ʻoku faʻa fai fakalongolongo pē. “Ko e moʻoni ʻoku lahi mo fakaofo ʻa e ngāue ko ʻeni ʻa e ʻEikí, ka ʻoku laka atu ia ki muʻa ʻo ʻikai ke fakatokangaʻi hono mahuʻingá ʻe ha tokolahi ʻo e kau taki fakapolitikale, fakafonua, mo fakaako ʻo e māmaní. ʻOku tupulaki fakafoʻituitui mo fakafāmili, fakalongolongo mo ʻikai fuʻu fakatokangaʻi ʻa hono pōpoaki toputapú mo ʻene faitāpuekina e kakaí ʻi he feituʻu kotoa pē.”²

ʻOku kei teka atu e maka naʻe kikiteʻi he kuonga muʻá, pea ʻi heʻetau fai hotau fatongiá, ʻe hokohoko atu e mafola ʻa e ongoongoleleí ʻo fakafonu ʻa e māmaní kotoa (vakai, Taniela 2:31–45).

Ke ʻilo lahi ange fekauʻaki mo e kahaʻu ʻo e Siasí, lau ʻa e Tokāteline mo e Ngaahi Fuakava 65; Gordon B. Hinckley, “Ko e Maka Naʻe Tā Mei he Moʻungá” (konifelenisi lahi ʻo ʻOkatopa 2007); L. Whitney Clayton, “ʻE Hokosia ʻa e Taimí” (ʻOkatopa. 2011 konifelenisi lahi).

Ko e hā te tau lava ʻo fai ke tokoni ki hono fakamafola ʻo e ongoongoleleí?

• ʻOku hanga ʻe hono tauhi ʻo e ngaahi fekaú pea mo hono fakamālohia ʻetau ngaahi fakamoʻoní, ʻo ʻomi kiate kitautolu ha fakavaʻe ke tokoni ki he mafola e ongoongoleleí.

• ʻOku hanga ʻe hono akoʻi e ongoongoleleí ki hotau ngaahi fāmilí, ʻo fakamālohia kinautolu ke nau moʻui faivelenga ʻi ha māmani ʻoku kehe meʻa ʻoku akoʻi ange aí.

• ʻOku tokoni hono fakahoko hotau ngaahi uiuiʻí ke fakamālohia ai ʻa e Siasí ʻi hotau ngaahi feituʻú.

• ʻE lava ke tau tokoni ke fakamafola e ongoongoleleí ʻi haʻatau talanoa pē ki ai mo e kakaí.

• Te tau lava ʻo fakahoko ʻi he temipalé ʻa e ngaahi ouaú maʻanautolu naʻe pekia teʻeki ai ke nau fanongo ki he ongoongoleleí ʻi he moʻuí ni.

Maʻuʻanga Fakamatalá

1. Russell M. Nelson, “Stand as True Millennials,” Liahona, Oct. 2016, 50.

2. L. Whitney Clayton, “E Hokosia ʻa e Taimí,” Liahona, Nōvema . 2011, 13.

Ko e Kahaʻu ʻo e Siasí

“Ko ha kiʻi tokosiʻi pē ʻo e kau Lakanga Fakataulaʻeikí ʻoku mou vakai ki ai he pōní, ka ʻe fakafonu ʻe he Siasí ni ʻa ʻAmelika Tokelau mo ʻAmelika Tonga—te ne fakafonu ʻa e māmaní.”

Ko e Palōfita ko Siosefa Sāmitá (1805–44), ʻi ha fakataha lakanga fakataulaʻeiki ʻi he 1834, ʻi he Ngaahi Akonaki ʻo e Kau Palesiteni ʻa e Siasí: Siosefa Sāmita (2007), 169.