ʻOtu Lea ki he ʻOtu Lea
Sēmisi 1:5–6
Naʻe akoʻi kitautolu ʻe Sēmisi ki he founga kole ki he ʻOtuá ke tau lava ʻo maʻu ha tali.
5 Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia.
6 Ka ʻe lelei ʻene kole ʻi he tuí, ʻo taʻefakataʻetaʻetuí. He ko ia ʻoku fakataʻetaʻetuí ʻoku hangē ia ko e peau ʻo e tahí ʻoku fakateka mo felīlīaki ʻe he matangí.
Kole ʻi he Tui
“Ko e fie maʻu ko ia ke kole ʻi he tuí [ʻoku ʻuhinga ia] ke ʻoua naʻa ngata pē ʻi hono leaʻakí ka ke fakahoko foki, ʻa e tufakanga ko ia ke fakatou kole mo ngāué, ʻa e fie maʻu ko ia ke fetuʻutaki pea mo ngāué.”
ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kole ʻi he Tui,” Liahona, Mē 2008, 94.
Masiva Potó
ʻOku tau masiva poto kotoa pē ʻo aʻu ki ha faʻahinga tuʻunga, ko e ʻOtuá pē taha te ne foaki mai e poto ko iá. “ ʻOku ʻikai ha tangata ʻokú ne ʻilo ʻa e ngaahi meʻa ʻa e ʻOtuá ka ko e Laumālie pē ʻo e ʻOtuá” (1 Kolinitō 2:11). Ko e ʻuhinga ia ʻoku fie maʻu ai ke tau kole kotoa kiate Iá.
Kole ki he ʻOtuá
“ʻOku tau lotu ki heʻetau Tamai Hēvaní ʻi he huafa ʻo Sīsū Kalaisí. …
“‘Oku ‘ikai ko e taumuʻa ʻo e lotú ke liliu ‘a e finangalo ‘o e ʻOtuá, ka ke maʻu mai maʻatautolu mo ha niʻihi kehe foki ‘a e ngaahi tāpuaki kuo ‘osi finangalo pē ‘a e ‘Otuá ke foaki maí, ka kuo pau pē ke tau kole pea tau toki maʻu ia.”
Fakahinohino ki he Ngaahi Folofolá “Lotú,” scriptures.lds.org.
ʻOku Foaki ki he Kakai Kotoa Pē
“ʻOku ʻikai te ne taʻofi ha tokotaha ʻoku haʻu kiate ia, … pea ʻoku tatau ʻa e kakai fulipē ʻi he ʻao ʻo e ʻOtuá.”
Foaki lahi
Foaki lahi—Ko e foʻi lea faka-Kalisi ko e toʻo mei he foʻi lea ko e “faingofua,” ʻa ia ʻoku ʻuhinga ia ki he tukutaha e fakakaukaú ʻi he taumuʻa ʻa e ʻOtuá ke Ne foaki tauʻatāina mo lahi kiate kitautolú.
ʻIkai Valokiʻi
ʻE tali atu ʻe he ʻOtuá pea he ʻikai ke Ne teitei valokiʻi (fakaangaʻi, tafuluʻi pe fofonga ʻita atu kiate) koe ʻi hoʻo fakahoko loto fakatōkilalo ange kiate Ia ha fehuʻi fakamātoató.
Taʻefakataʻetaʻetui
“ʻI he ngaahi taimi ʻo e loto-hohaʻá, tuku ke muʻomuʻa hoʻo ngaahi fuakavá pea fakapatonu ki ai hoʻo talangofuá. Peá ke kole leva ʻi he tui ʻo ʻikai fakataʻetaʻetui, ʻo fakatatau mo hoʻo fie maʻú, pea ʻe tali atu ʻe he ʻOtuá.”
ʻEletā D. Todd Christofferson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Mālohi ʻo e Ngaahi Fuakavá,” Liahona Mē 2009, 22.