Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hai ʻOku Mateuteú?
Tā fakatātā ʻa Richard Mia
ʻI he ʻaho Sāpate ʻe taha hili e fakatahaʻanga fakaʻosi ʻo e konifelenisi lahí, ne u maʻu ha ueʻi makehe ke u hū ki heʻeku ʻakauni FamilySearch ʻo fai ʻeku hisitōlia fakafāmilí. Ne u fakatoupīkoi ke ngāue ki heʻeku hisitōlia fakafāmilí he kuo teʻeki ai pē ola lelei ʻeku ngaahi feinga kehé. Naʻe longomoʻui ʻaupito hoku fāmilí hono fai ʻa e hisitōlia fakafāmilí, pea ne u fakakaukau mahalo pē ʻoku ʻikai ha toe meʻa ia ke fai.
Ne u tangutu ʻo mapuhoi lotoʻita heʻeku sio atu ki he ngataʻanga ʻo e fekumí kuo laui taʻu ʻeku ngāue ki aí, mo u ʻamanaki pē ʻe ʻi ai ha ʻaho te u toe maʻu ai ha fakamatala. Ne kamata leva ʻeku ngaahi fekumi angamahení ʻi he ngaahi tohi kakaí, lekooti malí mo e fāʻeleʻí pea hili ha houa ʻe taha ne ʻikai pē ha ʻutu-ʻe-hakea. Naʻe ueʻi leva au ʻe he Laumālie tatau ko ia kuó ne fanafana mai he fakaʻosinga kotoa ʻo e uiké lolotonga e konifelenisi lahí, ke u ʻalu ʻo lotu mo kumia pe ko hai kuo mateuteu ke fakahoko ange e ngāué kiate kinautolú.
Hili ʻeku lotú, ne u toe foki ki hoku hingoá pē ʻo kamata ke u fakatotolo mai he laine ko iá. Ne u ongoʻi makehe hono tataki au ʻe he Laumālié mei he laine ʻe taha ki he laine ʻe taha, ʻo aʻu ki he tafaʻaki ʻeku kuitangatá. ʻI he houa ʻe taha ne hokó, naʻe nofoʻia ʻe he Laumālié ʻa e lokí, pea ne u maʻu ha hingoa ʻe ono ke ʻave ki he temipalé. ʻI he ʻosi ʻeku kole ke ʻave ʻa e ngaahi hingoá ki he temipalé, ne u sio hifo ki he ʻū lekooti ne u maʻu mei ai ʻa e fakamatalá. Ne u fakatēloʻimata pea fonu hoku lotó ʻi he fiefia—ne maʻu e fakamatalá mei ha niʻihi ʻo e kau fakahokohoko fakamotuʻalea ne nau foaki taʻetotongi honau taimí ke nau fakahū ʻa e ngaahi lekooti ʻeku ngaahi kuí. ʻI he loto houngaʻia moʻoni, ne u fakahokohoko fakamotuʻalea ai ha ngaahi hingoa ki ha niʻihi kehe ʻi he houa ʻe taha hono hokó.
Naʻe fakatupulaki ʻeku fakamoʻoní he ʻaho ko iá ʻi he loto fakafetaʻi moʻoni ʻi ha ʻuhinga ʻe ua. ʻUluakí, lolotonga ʻa e konifelenisi lahí, naʻe tataki au ʻe he Laumālié ke fai ʻeku hisitōlia fakafāmilí pea mo ʻiloʻi e ngaahi hingoa ke kumí. Uá, ki he kāingalotu ʻo e Siasí he funga ʻo e māmaní ʻoku nau fakahokohoko fakamotuʻalea e ngaahi hingoá, ke lava ha kakai hangē ko aú ʻo ʻiloʻi mahino mo vave ʻemau ngaahi kuí pea fakavaveʻi ai ʻenau ngāué. Naʻe mahino pea ongo moʻoni kiate au e fakamoʻoni ki he mafola e ngāue ʻa e ʻOtuá ʻi he funga ʻo e māmaní.