Ko e hā ʻoku hoko ai ko ha angahala lahi ange ʻa e ʻikai ke te fakamolemoleʻi ha tahá, ʻo laka ia ʻi haʻate faihala ki ha tahá?

Kuo akoʻi mai ʻe he ʻEikí, “ʻOku totonu ke mou fefakamolemoleʻaki; he ko ia ia ʻoku ʻikai te ne fakamolemoleʻi hono tokouá ʻi heʻene ngaahi angahalá ʻoku halaia ia ʻi he ʻao ʻo e ʻEikí; he ʻoku nofo ʻiate ia ʻa e angahala lahi angé.

“Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” (T&F 64:9–10).

ʻI heʻetau fakatatali ʻetau fakamolemolé, ʻoku tau fokotuʻu ai ʻetau fakamaau nounoú ʻi ʻolunga he fakamaau haohaoa ʻa e ʻEikí. ʻOkú Ne ʻafioʻi lelei e loto ʻo e kakaí mo honau ngaahi tūkungá pea ko Ia tokotaha pē ʻoku totonu ke fai fakamāú. Te Ne tuhani mai e fakamaau totonú mo e ʻaloʻofa haohaoá ki he taha kotoa pē—ʻo tatau pē niʻihi ne faihala ki ha tahá pea mo e niʻihi ne fai ange kiate kinautolu ha fehalaakí.

ʻIkai ngata aí, ʻi he finangalo ko ia e ʻEikí ke tau faʻa fakamolemolé, ʻokú Ne tokoni ai ke tau fili ʻa e fiefiá kae ʻikai ko e mamahí, ke tuku hono kukuta ʻetau ʻita fakamolokaú mo ʻetau fehiʻá kae fakamoʻui kitautolu ʻo fakafou ʻi Heʻene ʻaloʻofá. Te tau toki ʻiloʻi leva, hangē ko ia ne fakamanatu mai ʻe ʻEletā Kevin R. Duncan ʻo e Kau Fitungofulú, “Ko e Fakalelei ʻa e Fakamoʻuí ʻoku ʻikai manaʻautolu pē ʻoku fie maʻu ke fakatomalá; ka ʻoku maʻanautolu foki ʻoku fie maʻu ke nau faʻa fakamolemolé” (“Ko e Faitoʻo Faifakamoʻui ʻo e Fakamolemolé,” Liahona, Mē 2016, 35).