Pōpoaki ʻa e Faiako ʻAʻahí
Ko e Taumuʻa ʻo e Fineʻofá
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé.
Naʻe pehē ʻe Linitā K. Peatoni ko e Palesiteni Lahi ʻo e Fineʻofá, ko e taumuʻa ʻo e Fineʻofá ke “teuteuʻi e kau fafiné ki he ngaahi tāpuaki ʻo e moʻui taʻengatá”.1 ʻOku fakafou ʻi he tuí, fāmilí mo e fakafiemālié ʻetau kau atu ki hotau “fatongia mahuʻinga ʻi he ngāué.”2
Naʻe pehē ʻe Kalo M. Sitīveni ko e Tokoni ʻUluaki ʻi he Kau Palesitenisī Lahi ʻo e Fineʻofá, ko e Fineʻofá “ko ha ngāue fakatuʻasino mo fakalaumālie ia.” “Ko e meʻa ʻeni naʻe fai ʻe he kau fafine ʻi he kuonga ʻo e Fakamoʻuí pea ko e meʻa ia ʻoku tau hokohoko atu hono faí.”3
ʻI heʻetau vakai ki he fefine Samēlia ʻi he veʻe vaikelí, naʻá ne tuku ʻene hiná kae lele ʻo tala ki he niʻihi kehé ko Sīsuú ko ha palōfita (vakai, Sione 4:6–42), pe kia Fīpē naʻe tokoni loto fiefia ki he niʻihi kehé ʻi heʻene moʻuí (vakai, Loma 16:1–2), ʻoku tau mamata ki he ngaahi sīpinga ʻa ha kau fafine ʻi he kuonga ʻo e Fakamoʻuí, ne nau kau longomoʻui atu he haʻu kia Kalaisí. Ko Ia ʻokú Ne fakaava mai e matapā ki he moʻui taʻengatá (vakai, Sione 3:16).
ʻI heʻetau vakai ki hotau ngaahi tokoua paionia ʻi Nāvū, ʻIlinoisi, ne nau fakataha mai ki he ʻapi ʻo Sela Kimipoló he 1842 ke fokotuʻu ʻenau houalotú, ʻoku tau vakai ai ki he palani ʻa e ʻOtuá ke fokotuʻu e Fineʻofá pea ʻomi ia ke fenāpasi mo e lakanga fakataulaʻeikí. Hili hono tohi ʻe ʻĪlisa R. Sinou ʻa e konisitūtoné, naʻe vakaiʻi ia ʻe he Palōfita ko Siosefa Sāmitá. Naʻá ne ʻiloʻi naʻe teʻeki ai ke kakato hono fokotuʻu e Siasí kae ʻoua leva kuo fokotuʻutuʻu mo e houʻeiki fafiné. Naʻá ne pehē naʻe tali ʻe he ʻEikí ʻenau feilaulaú ka naʻe ʻi ai ha meʻa ia ʻe toe lelei ange. Naʻá ne pehē, “Te u fokotuʻu e houʻeiki fafiné ʻi he malumalu ʻo e lakanga fakataulaʻeikí ʻi he sīpinga ʻo e lakanga fakataulaʻeikí.”4
“Ko e Fineʻofá naʻe ʻikai ko ha foʻi kulupu kakai fefine pē ia ne nau feinga ke fai lelei ʻi he māmaní. Naʻe kehe ia. Ko ha meʻa ia naʻe ‘lelei ange’ he naʻe fokotuʻu ia ʻi he malumalu ʻo e mafai lakanga fakataulaʻeikí. Naʻe hoko ʻa hono fokotuʻú ko ha sitepu mahuʻinga ia ʻi he mafola e ngāue ʻa e ʻOtuá ʻi he māmaní.”5
Ngaahi Potu Folofola mo e Fakamatala Makehe
Tokāteline mo e Ngaahi Fuakava 25:2–3, 10; 88:73; reliefsociety.lds.org
Tuí, Fāmilí, Fakafiemālié