Ngaahi Tali mei he Kau Taki ʻo e Siasí
Founga Hono Vahevahe Atu ʻo e Ongoongoleleí
Fai ʻe ʻEletā M. Russell Ballard
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻEpeleli 2000.
ʻOku ʻikai fie maʻu ia ke tau kole fakamolemole koeʻuhí ko ʻetau ngaahi tui fakalotú pe te tau holomui mei he meʻa ʻoku tau ʻiloʻi ʻoku moʻoní. Ka te tau lava ʻo vahevahe atu ia ʻi he laumālie ʻo e ʻofa mo e loto mahino—mālohi pea ʻi he lototoʻa, mo e mata ʻoku sio tāfataha ki hono fakalāngilangiʻi ʻo e ʻOtuá—pea ʻikai fakamālohiʻi ʻetau kau fanongó pe ongoʻi kuo tōnounou ʻetau faifatongiá kapau he ʻikai ke nau tali leva e meʻa ʻoku tau tui ki aí.
ʻI heʻetau maʻu e takaua ʻo e Laumālie Māʻoniʻoní, te tau lava ai ʻo fai ha fanga kiʻi meʻa faingofua ke maʻu ʻe he kāingalotu māmālohi ʻo e Siasí ha mahino lahi ange ki he ongoongoleleí kae pehē ki he niʻihi ʻoku ʻikai tatau ʻetau tui fakalotú. ʻOku ʻikai fie maʻu ha polokalama foʻou ke fai ʻeni. ʻOku ʻikai fie maʻu ha tohi tuʻutuʻuni pe ko ha uiuiʻi pe ko ha fakataha fakaako ki ai. Ko e meʻa pē ʻoku fie maʻu ki he kāingalotu lelei ʻo e Siasí, ke nau ako ke fakafalala ki he mālohi ʻo e Laumālie Māʻoniʻoní pea nau ala atu ʻi he mālohí ni ʻo faitokonia e moʻui ʻa e fānau ʻetau Tamai Hēvaní. ʻOku ʻikai ha tokoni maʻongoʻonga ange te tau lava ʻo fai, ka ko ʻetau vahevahe ko ia ʻetau fakamoʻoni fakatāutahá ki he niʻihi ʻoku siʻi ʻenau mahino ki he ongoongolelei ʻo Sīsū Kalaisi kuo toe fakafoki maí.
Ko ia kāinga, kuo tau maau nai ke fai ha meʻa? Te tau takitaha lava nai ʻo fakapapau he ʻahó ni ke fakatupulaki ʻetau tuʻunga mateuteu fakalaumālie fakatāutahá ʻaki ʻetau kumia e tataki ʻa e Laumālie Māʻoniʻoní pea ʻi heʻetau maʻu ko ia Hono mālohí ko hotau takauá, ke tau faitāpuekina muʻa e fānau ʻetau Tamaí ʻaki e loto mahino mo e ʻilo ʻoku moʻoni ʻa e Siasí?
ʻOku ou fakamoʻoni ʻoku moʻui ʻa e Fakamoʻuí pea te Ne tāpuekina fakatāutaha kitautolu kapau te tau fai e meʻa kotoa te tau lavá ke ʻunuakiʻi kimuʻa e ngāue maʻongoʻonga ko ʻeni ʻo Hono Siasí. ʻOfa ke tau takitaha fakapapau ke fai ha ngāue ʻoku lahi angé.