Hotau Ngaahi ʻApí, Hotau Ngaahi Fāmilí
ʻOku ou Fie Nofo Fakataha mo Koe ʻo Taʻengata!
ʻOku nofo ʻa e tokotaha naʻá ne faʻú ʻi Santo Domingo, Dominican Republic
Naʻe tokoni ha tui ʻa ha kiʻi taʻahine taʻu ono ke u toe maʻu foki ʻeku tuí.
ʻI hoku taʻu 22, naʻe hoko ha meʻa taʻeʻamanekina: naʻe mālōlō ʻeku faʻeé. Ko ha fefine tui lahi ia mo ʻeku tamaí, pea ne na ʻohake au he ongoongoleleí. Hili ʻene mālōloó, naʻe hiki ʻeku tamaí mei homau fonuá ki he ʻIunaiteti Siteití. Ne fakalau atu e taimí, pea kamata ke u ongoʻi tuēnoa he ʻoku ou ʻulutefua. Naʻe ʻikai kei moʻui ʻeku faʻeé pea nofo mamaʻo ʻeku tamaí; pea ʻoku ou toki sio pē kiate ia ʻi ha uike ʻe tolu mei he taʻú kakato.
Ko e faʻahinga ongo ia ne fakautuutu ai ʻeku kumi hūfanga ki hoku ngaahi “kaungāmeʻa” he akó pea mo e ʻōfisi ne u ngāue aí. Ne kamata māmālie pē ke u maʻu ha fiefia fakataimi ʻi he ngaahi meʻa fakaemāmaní. Ne ʻikai ke u toe ʻalu ki he lotú, pea kamata māmālie pē ke u māmālohi he siasí. Kimui ange aí, ne u mali mo ha talavou lelei, neongo naʻe lelei ʻene ngaahi tefitoʻi moʻoní, ka naʻe ʻikai ke ne ʻilo fekauʻaki mo e ongoongoleleí. Ne ʻi ai haʻama fānau ʻe toko tolu: ko Lia, ʻAisake mo ʻIsimeʻeli.
Tā fakatātaaʻi ʻe Kelley McMorris
ʻI ʻOkatopa ʻo ha taʻu ʻe taha, naʻe haʻu ai ʻeku tamaí ke ʻaʻahi mai mo sio ki he pēpē foʻoú. Lolotonga ʻene ʻaʻahi maí, naʻe fehuʻi ange ʻe Lia ki heʻene kuitangata pe ko e hā ʻoku ʻikai ai pē ke haʻu ia ha taimi mo ʻene kuifefiné. Naʻe fakamatalaʻi ange ʻe heʻeku tamaí ʻoku nofo ʻene Kuifefiné ʻaʻana ʻi ha feituʻu makehe ʻo ofi ki he Tamai Hēvaní. ʻI he mavahe pē ʻeku tamaí, naʻe lea leʻolahi mai ʻa Lia kiate au, “ʻE Mami, ʻoku ou fie ʻalu ki heʻeku Kuifefiné. ʻOku ou ʻilo ʻokú ne ʻi hēvaní, ka ʻoku ou lotu ke tau nofo fakataha ʻi ha ʻaho—ʻa ʻeku Kuifefiné mo e Kuitangatá, Teti, ʻAisake, ʻIsimeʻeli, mo koe pea mo au. ʻOku ou fie nofo fakataha mo kimoutolu ʻo taʻengata! ʻOku ou loto ke tau nofo ko ha fāmili ʻi langi, ʻo hangē ko ia ʻoku tau fai hení ke mau lava ʻo vaʻinga mo ʻemau Kuifefiné!”
Ne u moʻutāfuʻua ʻo ʻikai ke u ʻilo pe te u lea fēfē ange. Ne u ala atu ki hono fofonga fakaʻofoʻofa mo haohaoá, peá u hū leva ki hoku loki mohé. Ne u tūʻulutui ʻo tangi halotulotu ke ʻosi hoku loʻimatá. Ne u kole ki he Tamai Hēvaní ke Ne fakamolemoleʻi au. ʻOku ou ʻilo ne u mavahe mei he hala te mau lava ai ʻo nofo fakataha ko ha fāmili taʻengatá. Kuó u tōnounou ʻi hoku fatongia ke tataki kinautolu ʻi he hala totonú, pea kuo ʻikai ke u talanoa mo hoku malí ki he ongoongoleleí.
ʻI heʻeku lava pē ʻo tuʻu ki ʻolungá, ne u fetuʻutaki ki ha taki ʻo e Siasí, pea naʻá ne fakafetuʻutaki ai mo e kau ʻeletā ʻi hoku uōtí. ʻI he pō hono hokó, naʻa nau omi ʻo akoʻi hoku husepānití. Talu mei he pō ko iá mo e liliu ʻemau moʻuí. ʻI he taimi ní, ʻoku maʻulotu homau fāmilí he Sāpate kotoa pē. ʻOku ʻi ai hoku uiuiʻi ke tokoni ki he kau fafine māmālohí. ʻOku mau teuteu atu foki ke hū ki he temipalé.
ʻOku faʻa tataki kitautolu ʻe he Laumālie ʻo e ʻOtuá ʻo fakafou ʻi ha niʻihi ʻoku taʻeʻamanekina. Naʻe hoko ia ʻo fakafou ʻi heʻeku kiʻi taʻahine taʻu onó. ʻOku ou ʻiloʻi he taimí ni ʻi heʻeku sila ko ia he temipalé, te u lava ʻo nofo fakataha mo hoku fāmilí ʻo taʻengata.