Moʻui Taau ʻa Mini-Suné
ʻOku nofo ʻa e tokotaha naʻá ne fai e talanoá ʻi Kololato, USA.
“Sīsū hotau kaumeʻa ʻofá. [… Mahuʻinga e fānau kotoa]” Tohi Hiva ʻa e Fānaú, 58).
Naʻe moʻusioa ʻa Mini-Sune kituʻa ki he ngaahi konga ʻaó. Naʻá ne pehē ange, “Hangē ka ʻuha ʻapongipongí.”
Naʻe sio hake ʻa e Kuitangatá mei heʻene lau nusipepá ʻo kamokamo mai. Ko e ofi ia ki he fakaʻosinga ʻo e faʻahitaʻu māfaná ʻi Soulu, Kōlea Tonga pea kuo kamata e faʻahitaʻu ʻuhá.
Naʻe fokotuʻu ʻe Mini-Sune ʻa e fakamalú he tafaʻaki hono valalotu ki he Sāpaté. “ʻOku ou tui ʻoku totonu ke tau ō vave ʻapongipongi.”
Naʻe malimali pē ʻene Kuitangatá. “Fakakaukau lelei ia. Te tau ʻalu he hala lōloa angé, naʻa faifai kae tāfea e hala te ta tā-kolosi aí.”
“ʻOkú ke pehē ʻe sai pē ʻa ʻapisiasi?” Ko e fehuʻi atu ia ʻa Mini-Suné. Naʻe tāfea e peisimení he taʻu kuoʻosí lolotonga e faʻahitaʻu ʻuhá.
Naʻe pehē ange ʻene Kuitangatá, “ʻIo.” “Ka ʻoku ʻikai kovi ia ke ta lotu.”
“Te u lotua leva e ʻapisiasí he pooni. Pea ke ta aʻu lelei ki ai. Jal-ja-yo (poʻuli ā).” Naʻe punou ange ʻa Mini-Suné pea ʻalu ia ʻo mohe.
ʻI he pongipongi hokó, ne na mavahe pongipongia mei hona ʻapi-nofoʻangá. Naʻe sio hake ʻa Mini-Sune ki he langí kuo fakapōpōʻuli.
Naʻe pehē ange ʻene Kuitangatá, “ʻAi e tuí ke lahi.”
Naʻe muimui atu ʻa Mini-Sune heʻene Kuitangatá ki he kiʻi sitepu he foʻi tafungofunga hona veʻe ʻapi-nofoʻangá. Ne na kiʻi mālōlō ʻi ʻolunga ke fakatau ʻena mānavá. Ne ngaʻungaʻu hona sote hiná mei he hauhau e ʻeá.
Ne ala atu ʻene Kuitangatá ke ne ongoʻi e ʻuhá ʻi hono nimá. “ʻOkú ke ongoʻi ē? ʻOku kamata ke ʻuha.”
Ne na teke leva hona ongo fakamalú. ʻI heʻena aʻu ko ia ki he sitepu hokó, kuo lolo hifo e ʻuhá. Naʻe feinga e kiʻi mata ʻo Mini-Suné ke sio lelei ki he sitepú ʻi he ʻuhá. “ʻOiauē!” ko ʻene kaila ia heʻene hekea ʻo tō ʻaki hono tuí.
“ʻOkú ke lavea?” ko e ʻeke ange ia ʻe heʻene Kuitangatá. Naʻá ne punou hifo ke ne sio ki he mahae he talausese ʻo Mini-Suné.
Naʻe tete pē leʻo ʻo Mini-Suné mo ne pehē ange, “Ko e kiʻi mamulu pē.”
Naʻe pehē ange ʻe heʻene Kuitangatá, “Te tau faitoʻo heʻeta aʻu ki ʻapisiasí.”
Naʻe kaka hake ʻa Mini-Sune mo ʻene Kuitangatá he toenga ʻo e sitepú peá na afe atu ki he hala lahí.
Naʻe puke maʻu ʻe heʻene Kuitangatá e fakamalú mo ne pehēange, “ʻOku toe kovi ange havilí ia heni.” Naʻe ʻikai kei lava ʻa Mini-Sune ʻo mapuleʻi hono fakamalú. Fakafokifā pē kuo tō mai ha tuʻoni matangi ʻo fulihi hono fakamalú, ʻo mahae. Naʻe fakatoupīkoi mai e ongo uma ʻo Mini-Suné.
Naʻe puke mai ʻe heʻene Kuitangatá ʻa hono fakamalú. “ʻUnu mai ki heni. ʻOkú ta mei aʻu.”
Naʻe fakamalu taha pē ʻa Mini-Sune mo ʻene Kuitangatá, ka naʻe ʻikai fuʻu tokoni ia ke taʻofi e ʻuhá. ʻI heʻena fakaofi atu ki ʻapisiasí, naʻe fanongo ʻa Mini-Sune ki ha hiva ʻoku tā mai.
“Kuo nau kamata kinautolu!” Naʻe lele ʻa Mini-Sune ki he matapā ʻi muʻá. Peá ne sio atu ki hono ʻatá ʻi he sioʻatá. Naʻe moveuveu hono ʻulú pea pīponu, mahae hono talausesé pea pelepela mo hono suú. Naʻá ne toe holomui mei he matapá ʻo hifo ki lalo he sitepú.
Naʻe pehēange ʻa Mini-Sune, “He … he ʻikai ke u lava ʻo hū ki loto.”
Naʻe pehēange ʻene Kuitangatá, “ʻOkú ke sai pē koe ia.”
“Ka ʻoku ou ʻuli mo pīponu!”
Naʻe sio atu ʻene Kuitangatá kia Mini-Sune peá ne sio atu ki he meʻafua vai ʻoku haʻi ki he ʻaá.
“ʻOku faingofua ke tau fua e lahi ʻo e ʻuhá, ka te tau fua fēfē kitautolu Mini-Sune?”
Naʻe sio fakakuikui hake ʻa Mini-Sune ki heʻene Kuitangatá.
Naʻe pehēange ʻene Kuitangata, “ʻOkú ke sio ki he sū pelepelá, tui mamulumulú pea mo e ʻulu moveuveú, peá ke fakakaukau ʻoku ʻikai ke ke feʻunga. “Ka ʻoku ʻi ai ha founga lelei ange ʻoku fuatautau ai kitautolu ʻe Sīsū Kalaisi. ʻOkú Ne ʻafio ki ho lotó mo Ne ʻafioʻi ʻoku tonu hoʻo meʻa ʻoku faí. Kapau te ke vakai kiate koe ʻi Heʻene foungá, te ke sio ai ʻoku hake kituʻa e meʻafua vai.”
Naʻe sio atu ʻa Mini-Sune ki he meʻafua vaí. ʻOku tupu pē ʻo lahi he tō hifo ʻa e ʻuhá. Naʻá ne fakakaukau ki he ngāue lahi kuó ne fai ke aʻu mai ai ki he lotú pea mo e ongoʻi māfana mo fakafiefia naʻá ne maʻu heʻene aʻu mai ki aí. Naʻá ne fakakaukau ki he lahi ʻo ʻene ʻofa ki he Fakamoʻuí mo e lahi e ʻofa ʻa e Fakamoʻuí ʻiate iá.
Naʻe fāʻofua ʻa Mini-Sune ki heʻene Kuitangatá peá na lue fakataha atu ki he lotú.