Tatala le Lagi e ala i Galuega o Malumalu ma Talafaasolopito o Aiga
Saunia e Peresitene Russell M. Nelson
Peresitene o le Korama a Aposetolo e Toasefululua
Ma na saunia e Wendy W. Nelson
Mai se aoaoga i le RootsTech 2017 Konafesi a le Talafaasolopito o Aiga i le Aai o Sate Leki, Iuta, ISA, i le aso 11 o Fepuari, 2017. Ina ia maimoa i le puega o le aoaoga i le Igilisi, Potukale, po o le FaaSipaniolo, asiasi i le lds.org/go/1017Nelson.
I le taimi o le la aoaoga i le RootsTech2017, na valaaulia ai e Peresitene Russell M. Nelson ma lona faletua o Wendy, le Au Paia o Aso e Gata Ai ina ia mafaufau ma le agaga tatalo po o a ni ituaiga o osigataulaga e mafai ona latou faia ina ia mafai ona latou faia ai ni galuega e sili atu o le malumalu ma talafaasolopito o aiga.
Peresitene Nelson: A o avea lo’u tamamatua o A. C. Nelson ma se tane talavou ma se tama, sa na o le 27 tausaga o lona soifua, sa faapea ona maliu ai lona tama. Pe a ma le tolu masina mulimuli ane, na sau ai lona tama ua maliu, o le tama o lo’u tamamatua, e asi o ia. O le aso o lena asiasiga o le po o le aso 6 o Aperila, 1891. Sa matuai faagaeetia tamamatua Nelson i le asiasi mai o lona tama, o lea na ia tusia ai le aafiaga i lana api talaaga mo lona aiga ma uo.
Sa tusia e Tamamatua Nelson e faapea, “Sa ou i ai i le moega i le taimi na ulufale mai ai Tama i le potu.” “Na sau ma saofai i le pito o le moega. Sa ia faapea mai, ‘Ia, lo’u atalii e, ona e i ai nai a’u minute ia e avanoa, ua ou maua ai le faatagaga e sau e vaai oe mo ni nai minute. O lea ou te manuia, lo’u atalii e, ma e tele ni mea na ou faia talu ona ou oti.’”
Ina ua fesili atu Tamamatua Nelson po o a ana mea sa fai, sa tali mai lona tama, sa pisi lava i le aoaoina atu o le talalelei a Iesu Keriso i le lalolagi o agaga.
“Lo’u atalii e, e le mafai ona e iloaina, le tele o agaga o loo i ai i le lalolagi o agaga, o e e lei mauaina lava le talalelei,” sa ia fai mai ai. “Ae e toatele ua taliaina, ma ua ausia ai se galuega maoae. O le toatele o loo vaavaai mai ma le naunautai i a latou uo o e o loo ola pea e galulue mo i latou i totonu o malumalu.”
Na tau atu e tamamatua Nelson i lona tama, “Ua matou fuafua e o atu i le malumalu ma faamauina ia te oe, Tama, i se vave matou te mafaia ai.”
Sa tali mai le tama o lo’u tamamatua: “O le mea lena, lou atalii e, o se vaega lea o le mea na ou sau ai e vaai oe. O le a tatou faia ai loa se aiga ma ola ai i le faavavau atoa.”
Ona fesili atu lea o tamamatua Nelson, “Tama, pe moni ea le talalelei e pei ona aoaoina ai e lenei Ekalesia?”
Sa tusi atu lona tama i se ata o le Au Peresitene Sili na tautau i le puipui o le potumoe.
“Lo’u atalii e, e pei lava le mautinoa o lou vaai atu i lena ata, e faapena foi le mautinoa o le moni o le talalelei. Ua i ai i totonu o le talalelei a Iesu Keriso le mana e laveai ai alii ma tamaitai uma o e o le a usitai i ai, ma e leai lava se isi auala e mafai ona latou maua ai le faaolataga i le malo o le Atua. Lo’u atalii e, ia pipii pea e le aunoa i le talalelei. Ia lotomaualalo, ia agaga tatalo, ia usitai i le perisitua, ia amiosao, ia faamaoni i feagaiga ua oulua osia ma le Atua. Ia aua lava nei faia se mea o le a le fiafia ai le Atua. Oka, o se matuai faamanuiaga le talalelei. Lo’u atalii e, ia e tama lelei.”
A. C. Nelson, o le tamamatua o Peresitene Russell M. Nelson.
Ata ma saunia e Bjorn Thorkelson; tua atu, ata o le telefoni feaveai, ma le tamai komepiuta feaveai mai le Getty Images
Sister Nelson: E ese lo’u fiafia i na Ia uma. “Ia lotomaualalo, ia agaga tatalo, ia usitai i le perisitua, ia amiosao, ia faamaoni i feagaiga ua oulua osia ma le Atua. … Ia e tama lelei.” O Ia e ono na aumai ia te oe e le tama o lou tamamatua ua fai i lagi le folauga. E pei uma ua ou faalogo ia Peresitene Gordon B. Hinckley (1910–2008) ma ana Ia e ono.1
Peresitene Nelson: Ae sao, a ea? E ese le pele ia te au o le faapea ona tuua ai e lo’u tamamatua o lena faamaumauga mo i matou. Sa matou iloaina, sa faapea ona faamauina mulimuli ane le fanau a lona tama ia te ia. O lea la, sa faapea ona ausia le pogai o lana asiasiga.
O Le Agaga o Elia
Peresitene Nelson: Ua faamalamalama mai e se suafa sili ona taua i tusitusiga paia le pogai e taua tele ai le aiga. O lena suafa o Elia. O EL-I-JAH i le faaEperu o lona uiga moni o “Ieova o lo’u Atua.”2 Mafaufau i ai! O loo taoto i totonu o le suafa o Elia ia upu faaEperu mo le Tama ma le Alo.
Sister Nelson: O Elia o le perofeta mulimuli lea na umiaina le mana faamau o le Perisitua Mekisateko a o lei oo i le vaitaimi o Iesu Keriso. O le misiona a Elia o le liliu lea o loto o fanau i tama, ma loto o tama i fanau, ina ia mafai ona faamauina i latou, afai e le faapea “o le a faaumatia atoa le lalolagi i lona afio mai” (Iosefa Samita—Talafaasolopito 1:39; ua faaopoopo le faamamafa). E fai lava si malosi o lena faaupuga.
Peresitene Nelson: Ou te fia mafaufau i le agaga o Elia o “se faaali mai o le Agaga Paia e molimau mai e uiga i le natura paia o le aiga.”3 E tusa ai ma le Bible Dictionary, “O le mana o Elia, o le mana faamau lea o le perisitua lea e mafai ai ona noatia pe tatalaina mea i le lalolagi pe noatia pe tatalaina i le lagi” (“Elijah”).
Sister Nelson: A tatou fai atu la, o loo fealuai le agaga o Elia i luga o tagata e uunai i latou e saili i o latou aiga ua maliliu, o le uiga moni o le faamatalaga, o loo uunaia i tatou e le Agaga Paia e fai mea na o le a mafai ai ona faamauina o tatou aiga e faavavau.
Peresitene Nelson: E ese le manaia o le liliu atu o loto o fanau i o latou tama e ala i le faamatala atu o tala taua o talafaasolopito o aiga i ni auala e maua gofie ai ma manatua ai pea. Atonu o le tatou vaai i taimi uma i pepa faamatalaga o talafaasolopito, tala, ata, ma mea faitino e manatua ai, e mafai ona faamalolosia ai a tatou molimau (tagai i le Mosaea 1:5). Pe a tatou tuu ia mea i luga o o tatou puipui, o a tatou laulau, a tatou komepiuta, a tatou iPads, faapea foi ma a tatou telefoni feaveai, atonu o le a uunaia ai i tatou e fai filifiliga e lelei atu ma faalatalata atili atu ai i le Alii ma i o tatou aiga.
Ae peitai, afai tatou te tuua ai i le tulaga lena, o le mea moni e le o lava mea na tatou faia. I le avea ai ma tagata o le Ekalesia, o lo tatou fiafia i talafaasolopito o aiga na faaosofiaina e le faatonuga mai le Alii e faapea, e le mafai ona faaatoatoaina o tatou tuaa e aunoa ma i tatou, ma e le mafai ona faaatoatoaina i tatou e aunoa ma i latou (tagai i le MF&F 128:15). O le uiga o lena mea, e tatau ona fusia faatasi i tatou e ala i sauniga paia o le faamauga o le malumalu. E tatau ona avea i tatou ma ni sooga malolosi i le filifili mai i o tatou tuaa e oo atu i a tatou fanau. Afai e tatau ona avea le aoina o tala ma ata ma se taunuuga mulimuli o mea tatou te faia—afai tatou te iloa po o ai o tatou tuaa, ma iloa mea matagofie e uiga ia i latou, ae tatou tuua ai lava i latou e paulia i le isi itu e aunoa ma o latou sauniga—o se suiga faapena o le a leai se aoga i o tatou tuaa o e o loo tumau pea ona taofia i le lalolagi o agaga.
Sister Nelson: E taua le faasaoina o tala a augatuaa, ae e le tatau lava ona aveesea ai le faataunuuina o galuega o sauniga a o tatou tuaa. E manaomia ona tatou faaavanoa le taimi mo faamatalaga a o tatou tuaa e agavaa ai mo le [faia] o o latou sauniga.
Peresitene Nelson: Ma o le uiga o lena mea, o le ositaulaga lea o taimi sa masani ona tatou faaaluina i isi gaoioiga. E manaomia ona tatou faaaluina ni taimi e tele atu i totonu o le malumalu ma i le faia o sailiga o talafaasolopito o aiga, lea e aofia ai le faasino igoa [indexing].
Sister Nelson: E aumai moni e le ositaulaga faamanuiaga o le lagi.4 Ua faamanuiaina au i le mauaina o le toatele o tuaa o e ua ou lagona le mautinoa ua saunia e osia feagaiga ma le Atua ma ia maua o latou sauniga e tatau ai. Na ou iloaina i le mavae ai o se taimi, afai sa ou galue i se galuega faatino lofituina ma ua uma lou taimi, malosi, ma manatu, afai o le a ou faia se ositaulaga o le taimi e ala i le sueina o faamatalaga e agavaa ai mo sauniga mo nisi o tuaa po o le alu i le malumalu e sui mo i latou, e faapea ona matala le lagi ma amata ona solo mai le malosi ma manatu. Na i ai lava le ala na ou maua ai le taimi e ausia ai le aso atofaina e faauma ai [se galuega]. Sa matuai faigata lava, ae e tupu lava i taimi uma. E aumaia e galuega o malumalu ma talafaasolopito o aiga ia te au se olioli lea e le i ai moni i lenei lalolagi.
Talafaasolopito o Aiga ma le Galuega Faafaifeautalai
Peresitenet Nelson: A na faapea o au o se faifeautalai i le taimi nei, o au uo sili lava e toalua i le uarota po o le paranesi o ou galue ai, o le taitai misiona a le uarota ma le faufautua a le uarota mo le malumalu ma talafaasolopito o aiga.
E i ai i tagata se manao moni ia iloa se mea e uiga i o latou tuaa. E avea lena mea o se avanoa masani mo o tatou faifeautalai. A o aoao a tatou faifeautalai e alolofa i tagata latou te aoaoina, o le a avea ma se mea masani lo latou fesili atu e uiga i o latou auaiga. “O soifua ou matua? O soifua matua o ou matua? E te silafia matua o ou matua e toafa?” E faigofie lava ona see le talanoaga pe a valaaulia i latou o e e tosina atu e talanoa ma faifeautalai e talanoa e uiga i tagata latou te alolofa i ai.
O le taimi lena, o se mea ua masani ai faifeautalai, e aofia ai foi tagata faamisiona a le uarota, e fesili atu, “E te silafia se isi o matua o ou matua matutua? E te silafia o latou suafa?” Atonu o le a le iloa e tagata sailiili ia suafa o le toavalu o matua o o latou matua matutua.
Ona mafai lea ona fai atu e faifeautalai le fautuaga lenei: “E i ai sau uo i le lotu e mafai ona fesoasoani mai. Afai e mafai ona tatou maua ia suafa o nisi pe atonu foi o matua uma o ou matua matutua, mata o le a alu aoga ai ni itula se lua o lou taimi e sue ai po o ai matua o ou matua matutua?” Ioe, o lena uo i le lotu, o le faufautua o le malumalu ma talafaasolopito o aiga.
Sister Nelson: Ou te manatu e mafai ona lagona e faifeautalai le mafanafana i le iloa, e le mafai lava ona tuua nao i latou pe a latou maua ma aoaoina i latou o e e fiafia i upumoni o le talalelei toefuataiina a Iesu Keriso. Na aoao mai e Peresitene George Q. Cannon (1827–1901), o le sa auauna atu o se fesoasoani i le toafa o Peresitene o le Ekalesia e faapea, i nei aso e gata ai, o i latou o e ua auai i le Ekalesia ua auai tonu mai ona na tatalo o latou tuaa ina ia auai se tasi o a latou fanau i le Ekalesia ina ia mafai e i latou, o tuaa, ona maua o latou sauniga e tatau ai e ala i sauniga sui.5
Faaeaga: O Se Mataupu e Faaleaiga
Peresitene Nelson: O le faaeaga o se mataupu e faaleaiga. E nao sauniga faaola o le talalelei a Iesu Keriso e mafai na faaeaina ai aiga. O le faaiuga tupito lea o loo tatou taumafai i ai o le, ia tatou fiafia o se aiga—maua faaeega paia, faamauina, ma saunia mo le ola e faavavau i le afioaga o le Atua.
Sister Nelson: O vasega taitasi o le Lotu tatou te auai atu i ai, o taimi taitasi tatou te auauna atu ai, o feagaiga taitasi tatou te osia ma le Atua, o sauniga taitasi o le perisitua tatou te mauaina, o mea uma tatou te faia i le Ekalesia e taitai atu ai i tatou i le malumalu paia, o le maota o le Alii. E tele naua se mana o loo avanoa mo se ulugalii ma mo a laua fanau e ala i le sauniga o le faamauga pe a latou tausia a latou feagaiga.
Peresitene Nelson: Tatou te filifili i aso uma lava po o fea tatou te fia nonofo ai e faavavau e ala i le ala tatou te mafaufau, manatu, tautala, ma amio ai. Ua folafola mai e lo tatou Tama Faalelagi, o Lana galuega ma Lona mamalu o le auamaia o le tino ola pea ma le ola e favavau o Lana fanau (tagai i le Mose 1:39). Ae e finagalo o Ia ia tatou filifili e toe foi atu ia te Ia. O le a Ia le faamalosia i tatou i soo se mea lava. O le sao tonu tatou te tausia ai a tatou feagaiga, e faaali atu ai ia te Ia le tele o lo tatou manao e toe foi atu e nonofo faatasi ma Ia. O aso taitasi e aumaia ai i tatou ia latalata atili atu po o le mamao atili ese mai lo tatou avanoa matagofie o le ola e faavavau. E manaomia e i tatou uma taitoatasi ona tausia a tatou feagaiga, salamo i aso uma, ma saili ia avea atili e pei o lo tatou Faaola. Ma e nao le pau lava lena o le mea e mafai ai ona faatasi o tatou aiga e faavavau.
Sister Nelson: Ou te molimau atu, po o le a lava le matagofie o i ai lou olaga i le taimi nei, po o le a foi le lotovaivai ma le lotonutimomoia atonu o i ai, o lou aafia ai i le galuega o malumalu ma talafaasolopito o aiga o le a faaleleia atili ai. O le a le mea o loo e manaomia i lou olaga i le taimi nei? Faateleina o le alofa? Faateleina o le olioli? Faateleina o le loto pulea? Faateleina o le toafilemu? Faateleina o taimi anoa? Faateleina o se lagona o loo e faia se eseesega? Faateleina o mea e fiafia ai? Faateleina o tali i au fesili loloto? Faateleina o ni fesootaiga faamaoni ma isi? Faateleina o le malamalama i mea o loo e faitauina i tusitusiga paia? Faateleina o le gafatia e alofa ma faamagalo atu ai? Faateleina o le gafatia e tatalo ai ma le mana? Faateleina o musumusuga ma manatu fatufatuai mo lau galuega ma isi galuega faatino? Faateleina o le taimi mo mea e taua moni?
Ou te talosagaina outou e fai se osigataulaga o le taimi i le Alii e ala i le faateleina o le taimi e te faaaluina i le faia o galuega o malumalu ma talafaasolopito o aiga, ona e maitau lea o le mea e tupu. O lau molimau, a tatou faaali atu i le Alii tatou te manatu mamafa i le fesoasoani atu i o tatou tuaa, o le a matala le lagi ma o le a tatou maua mea uma tatou te manaomia.
Peresitene Nelson: E mafai ona musuia i tatou i le aso atoa e uiga i aafiaga o le malumalu ma talafaasolopito o aiga na maua e isi. Ae e tatau ona tatou faia se mea ina ia tatou maua moni ai e i tatou lava le olioli. Ou te fia faalautele atu se lui ia i tatou uma taitoatasi, ina ia faaauau pea ma faateleina pea le lagona matagofie o lenei galuega. Ou te valaaulia outou ina ia mafaufau ma le agaga tatalo po o le a le ituaiga ositaulaga—ma e talosia o se ositaulaga o le taimi—e mafai ona e faia ai galuega se tele o malumalu ma talafaasolopito o aiga i lenei tausaga.”
O loo tatou i ai i le galuega a le Atua Silisili Ese. O loo soifua o Ia. O Iesu o le Keriso. O Lana Ekalesia lenei. O i tatou o Ana fanau o le feagaiga. E mafai ona Ia faalagolago mai ia i tatou.