Fakataha Alēlea ʻo e Sāpate ʻUluakí

ʻI he Sāpate ʻuluaki ʻo e māhina takitaha, ʻoku ʻikai akoʻi ʻe ha faiako ha lēsoni ʻi he fakataha ʻa e kōlomu kaumātuʻá mo e Fineʻofá. Ka ʻoku tataki ʻe he kau palesitenisī ʻo e kōlomu kaumātuʻá mo e Fineʻofá ha ongo fakataha alēlea. ʻI he ongo fakataha alēlea ko ʻeni he Sāpate ʻuluakí, ʻe takitaha fealēleaʻaki pē ai e kōlomu ʻo e kaumātuʻá mo e Fineʻofá ʻo kau ki he ngaahi fatongiá, faingamālié, mo e ngaahi faingataʻa ʻoku hoko honau feituʻú; feakoʻaki mei he ngaahi fakakaukaú mo e ngaahi aʻusiá; mo palani ha ngaahi founga ke nau ngāueʻi ai e ngaahi ueʻi ne nau maʻu mei he Laumālié. ʻOku totonu ke kau he ngaahi fealēleaʻaki ko ʻení ha ngaahi potu folofola mahuʻinga kae pehē ki he ngaahi lea ‘a e kau palōfita moʻuí.

He ʻikai tatau ʻa e fakataha alēlea kotoa pē. Ko ha ngaahi fakahinohino ʻeni ke tokoni ki he kau palesitenisií ʻi heʻenau tataki ha fakataha alēlea leleí.

Kimuʻa ʻi he fakataha alēleá

Fakahoko ʻeni:

Feinga ke ʻiloʻi e ngaahi fie maʻu, ngaahi faingamālié, mo e ngaahi faingataʻa fakafeituʻú.
Fili ʻi he faʻa lotu ha tefito ke aleaʻi.
Fakaafeʻi e kau mēmipa ʻo e kōlomú pe kau Fineʻofá ke nau omi mateuteu ke vahevahe ʻenau fakakaukaú mo e aʻusiá.

ʻOua:

Naʻa teuteu ha lēsoni.
ʻE haʻu mo ha founga pau ke fakaleleiʻi ʻaki pe ko ha palani ngāue kuo fakakaukauʻi.

Lolotonga e fakataha alēleá

Fakahoko ʻeni:

Fakaafeʻi e kau mēmipá ke vahevahe e ngaahi aʻusiá, ʻi heʻenau ngāueʻi e ngaahi ueʻi mo e palani mei he ngaahi fakataha ki muʻá.
Fakafeʻiloaki e tefito ʻo e fakatahá mo poupouʻi e kau mēmipá ke nau fealēleaʻaki fakataha ʻo kau ki ai, ʻo fekumi ki ha ngaahi founga ke fakaleleiʻi ʻaki mo maʻu ha fakahinohino mei he folofolá, ngaahi lea ʻa e kau palōfitá, pea mo e Laumālie Māʻoniʻoní.
Palani ke ngāueʻi e meʻa naʻe aleaʻí. ʻE lava ke kau heni ha ngaahi palani fakakulupu pe palani ʻe lava ke fai fakafoʻituitui.

ʻOua:

ʻE puleʻi e fetalanoaʻakí.
ʻE feinga ke fakalotoʻi e niʻihi kehé ki hoʻo ngaahi fakakaukaú.
ʻE aleaʻi ʻa e ngaahi meʻa pelepelengesi pe ʻikai fakahāhāholó.
ʻE akoʻi ha lēsoni.
ʻE fakamālohiʻi ha taha ke kau mai.

Hili ʻa e fakataha alēleá

Fakahoko ʻeni:

Muimuiʻi e ngaahi palaní mo e ngāue naʻe vahe lolotonga e fakataha alēleá.
Kumi ha ngaahi founga ke fakakau ai ʻa kinautolu ne ʻikai lava mai ki he fakatahá koeʻuhi ko honau ngaahi uiuiʻí pe ʻuhinga kehe. Tuku ke nau ʻilo ki he ngaahi palani naʻe faí.
ʻOange ha faingamālie ki he kau mēmipá ke nau vahevahe ʻenau ngaahi aʻusiá he ngaahi fakataha he kahaʻú.

Ngaahi Tefito ki he Fakataha Alēlea ʻo e Sāpate ʻUluakí

ʻE lava ke maʻu e ngaahi fakakaukau ke aleaʻi ʻi he fakataha alēleá mei he ngaahi fakataha fakapalesitenisií, ngaahi fakataha alēlea fakauōtí, palani fakaʻēliá, ngaahi ongo ʻoku maʻu ʻe he kau takí ʻi heʻenau ngāue fakaetauhi ki he kau mēmipá, pea mo e ngaahi ueʻi ʻa e Laumālie Māʻoniʻoní. Ko e ngaahi tefito ʻi laló ko ha ngaahi fokotuʻu fakakaukau pē. Mahalo ʻoku ʻosi ʻiloʻi ʻe he kau takí ia ha ngaahi fie maʻu kehe ʻoku nau ongoʻi ke tokangaekina.

Ko e hā te tau lava ʻo fai ʻi heʻetau ngāue fakaetauhi ki he niʻihi ʻoku tau feohí? (vakai, Mōsaia 23:18).
Ko e hā e founga te tau fakahokohoko ai hotau ngaahi fatongiá ʻo fakatatau mo e meʻa ke fakamuʻomuʻá?
Te tau vahevahe fēfē e ongoongoleleí ki hotau kaungāmeʻá mo e kaungāʻapí? (vakai, ʻAlamā 17).
Ko e hā ha founga te tau maluʻi ai kitautolu mo hotau fāmilí mei he mītia ʻoku taʻefeʻungá mo e ponokālafí?
Ko e hā te tau fai ke fakahinohinoʻi mo fakamālohia ai ʻetau fānaú mo e toʻu tupu ʻi hotau uōtí?
Ko e hā ha founga te tau kau lahi ange ai ki he ngāue hisitōlia fakafāmilí mo e mōihū ʻi he temipalé?
Ko e hā ha founga ʻoku tau fakaafeʻi mai ai e tokoni ʻa e ʻEikí, ʻi heʻetau fekumi ki ha ngaahi tali ki heʻetau ngaahi fehuʻi ʻi he ongoongoleleí mo maʻu ha mahino lahi ange ki he ongoongoleleí?
Ko e hā ha ngaahi founga ʻe lava ke tau fakamālohia ai ʻetau fakamoʻoni ki he ʻEikí mo ʻEne ongoongoleleí, mo tokoniʻi hotau ngaahi fāmilí ke nau moʻui fakafalala fakalaumālie pē kiate kinautolú?