Fanongonongo ha Temipale Foʻou ʻe Fitu

Naʻe fanongonongo ʻe Palesiteni Russell M. Nelson ʻi he fakaʻosinga ʻo e fakataha hoʻatā Sāpate ʻo e konifelenisi lahí, ʻe langa ha ngaahi temipale ʻi Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; pea mo ha kolo lahi ʻoku teʻeki ai fakapapauʻi ʻi Lūsia.

Kimuʻa he konifelenisí, naʻe fanongonongo ʻe he Kau Palesitenisī ʻUluakí ʻe fakatapui ʻa e Temipale Rome Italy ʻi he ʻaho Sāpate 10 ʻo Māʻasi, 2019, ki he ʻaho Sāpate 17 ʻo Māʻasi, 2019. Naʻe tuku atu foki ʻe he Siasí mo ha tā faka-ʻaati ʻo e Temipale Bangkok Thailand.

ʻI he ʻOkatopa ʻo e 2017, naʻe tāpuakiʻi ai e kelekele ki he Temipale Port-au-Prince Haiti; naʻe fakatapui e Temipale Meridian Idaho ʻi Nōvema ʻo e 2017; pea fakatapui mo e Temipale Cedar City Utah (USA) ʻi Tīsema ʻo e 2017.

ʻE vavé ni pē mo hono toe fakatapui ʻo ha temipale ʻe ua: ko e Temipale Houston Texas ʻi he ʻaho Sāpate 22 ʻo ʻEpeleli, 2018, hili ia ha ngaahi monomono naʻe fai koeʻuhí ko ha tāfea naʻe hoko; mo e Temipale Jordan River Utah ʻi he ʻaho Sāpate 20 ʻo Mē, 2018, hili hano toe fakaleleiʻi. ʻE fakatapui foki mo ha ongo temipale ʻe ua ʻi he konga kimui ʻo e taʻu ní: ko e Temipale Concepción Chile ʻi he ʻaho Sāpate ko e 28 ʻo ʻOkatopa, 2018; mo e Temipale Barranquilla Colombia ʻi he ʻaho Sāpate ko e 9 ʻo Tīsema, 2018.

ʻE tāpuni ʻa e Temipale Hamilton New Zealand ʻi Siulai ʻo e 2018 ke fakahoko ha ngāue fakalelei lahi ki ai pea ʻe toe fakatapui ʻi he 2021.

ʻOku lolotonga ʻi ai ha ngaahi temipale ʻe 159 ʻi he māmaní, mo ha temipale ʻe 30 naʻe fanongonongo pe ʻoku kei langa.