Lea Fakafeʻiloakí
Fai ʻe Palesiteni Russell M. Nelson
ʻOku mau fanongonongo atu hano fokotuʻutuʻu foʻou ʻaupito ʻo ʻetau ongo kōlomu ʻo e Lakanga Taulaʻeiki Faka-Melekisētekí, ke fakahoko lelei ange ai e ngāue ʻa e ʻEikí.
Fakamālō atu Brother Holmes, ʻi hoʻo pōpoaki mahuʻingá.
ʻE ngaahi tokoua, ʻoku tau manatu kia Palesiteni Thomas S. Monson mo Elder Robert D. Hales. Ka ʻoku tau kei “fai mālohi pē ʻi he ngāue” ʻa e ʻEikí.”1
ʻOku ou fakafetaʻi koeʻuhí ko e tangata takitaha ʻokú ne fuesia hono lakanga fakataulaʻeiki māʻoniʻoní. Ko kimoutolu ʻa e ʻamanakileleiʻanga hotau Huhuʻí, naʻe finangalo “ke lava ʻa e tangata takitaha ʻo lea ʻi he huafa ʻo e ʻOtua ko e ʻEikí, ʻio ko e Fakamoʻui ʻo e māmaní.”2 ʻOkú Ne finangalo ke fakafofongaʻi Ia ʻe Hono ngaahi foha kotoa pē kuo fakanofó, ke nau lea Maʻana, ngāue Maʻana mo faitāpuekina e moʻui ʻa e fānau ʻa e ʻOtuá ʻi he funga ʻo e māmaní ki he ngataʻangá, koeʻuhí “ke lava ʻa e tuí ʻo tupulaki ʻi he māmaní.”3
ʻOku ngāue hamou niʻihi ʻi ha ngaahi feituʻu kuo laui toʻu tangata e tuʻu ai ʻa e Siasí. ʻOku ngāue ha niʻihi ʻi ha feituʻu ʻoku foʻou ʻaupito ai e Siasí. ʻOku ʻi ai ha niʻihi ʻoku mou kau ki ha uooti tokolahi. ʻOku ʻi ai ha niʻihi ia, ʻoku siʻisiʻi homou koló kae fuʻu nofo vāmamaʻó. Neongo pe ko e hā ho ngaahi tūkunga fakatāutahá, ʻoku mou takitaha hoko ko ha mēmipa ʻo e kōlomu lakanga fakataulaʻeiki ʻoku ʻi ai hano tufakanga fakalangi ke ako mo faiako; ke ʻofa mo tokoni ki he niʻihi kehé.
ʻI he pōní, ʻOku mau fanongonongo atu hano fokotuʻutuʻu foʻou ʻaupito ʻo ʻetau ongo kōlomu ʻo e Lakanga Taulaʻeiki Faka-Melekisētekí, ke fakahoko lelei ange ai e ngāue ʻa e ʻEikí. ʻE fakatahaʻi he taimí ni ʻi he uooti kotoa pē ʻa e taulaʻeiki lahí mo e kaumātuʻá ʻo hoko ko ha kōlomu pē ʻe taha ʻo e kaumātuʻá. ʻE hanga ʻe he liliú ni ʻo fakalahi ange ai ʻa e ivi mo e malava ko ia ʻa e kau tangatá ke fuesia e lakanga fakataulaʻeikí ke faitokonia e niʻihi kehé. ʻE hanga ʻe he kōlomu ko iá ʻo talitali lelei mo fakafeohi ki he kau teuteu kaumātuʻá. ʻI he siteiki takitaha, ʻe kei hokohoko atu pē hono tokangaʻi ai ʻe he kau palesitenisī fakasiteikí e kōlomu taulaʻeiki lahí ʻi he siteikí. Ka ko e faʻunga ʻo e kōlomu ko iá ʻe makatuʻunga ia ʻi he ngaahi uiuiʻi fakataulaʻeiki lolotongá, ʻo hangē ko ia ʻe fakamatalaʻi atu ʻamuiangé.
ʻE hanga he taimí ni ʻe Elder D. Todd Christofferson mo Elder Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo akoʻi lahi ange kitautolu ki he ngaahi liliu mahuʻingá ni.
Kuo laui māhina hono saveaʻi e ngaahi liliu ko ʻení. Kuo mau ongoʻi ʻa e fie maʻu vivili ke fakaleleiʻi e founga ʻoku tau tokangaekina ai hotau kāingalotú mo lipooti ʻetau fetuʻutaki mo kinautolú. Ke toe fakahoko lelei ange iá, ʻoku fie maʻu ke tau fakamālohia hotau ngaahi kōlomu lakanga fakataulaʻeikí, ke tataki lelei ange ʻ e ngāue fakaetauhi ʻi he ʻofá mo e poupou ʻoku fakataumuʻa ʻe he ʻEikí maʻa Hono kāingalotú.
Naʻe ueʻi fakalaumālie ʻe he ʻEikí e ngaahi liliu ko ʻení. ʻI heʻetau kamata fakahoko kinautolú, ʻe toe lelei ange ai ʻetau ngāué, ʻo laka ia ʻi ha faʻahinga taimi kimuʻa.
ʻOku tau ki he ngāue ʻa e ʻOtua Māfimafí. Ko e Kalaisí ʻa Sīsū! Ko ʻEne kau tamaioʻeiki loto fakatōkilalo kitautolu! ʻE ngaahi tokoua, ʻoku ou lotua ʻe tāpuakiʻi kimoutolu ʻe he ʻOtuá ʻi heʻetau ako ke fai hotau fatongiá, ʻi he huafa ʻo Sīsū Kalaisí, ʻĒmeni.ʻ