Ngaahi Tuʻutuʻuni Foʻoú, Ngaahi Foungá, mo e Olá
Toʻu tupú mo e ngāue fakatemipalé. Naʻe fanongonongo ʻe he Kau Palesitenisī ʻUluakí ha ngaahi liliu ʻi he ngaahi tuʻutuʻuni ʻo e temipalé ʻa ia ʻokú ne ʻoange ki he kau talavoú mo e kau finemuí ha ngaahi faingamālie lahi ange ʻi he ngāue fakatemipalé mo tokoniʻi e fānau Palaimelí ke nau toe mateuteu ange ke ngāue ʻi he temipalé.
Taʻofi, ʻiloʻi, mo e tali ki he ngaohikoviá. Naʻe tufaki ʻe he Kau Palesitenisī ʻUluakí ha tohi mo ha ngaahi tohi maʻuʻanga tokoni ki he kau taki ʻo e Siasí ʻi ʻAmelika mo Kānatá, ʻi ha feinga taʻetūkua ke faleʻi e kau takí ʻi he founga ki hono taʻofi, ʻiloʻi, mo tali ki he ngaohikoviá. ʻOku kau ʻi he ngaahi tohí ha ngaahi tuʻutuʻuni kuo toe fakatonutonu he founga ʻoku totonu ke faleʻi ai ʻe he kau pīsopé mo e kau palesitenisī fakasiteikí ha taha ʻoku ngaohikovia fakasekisuale, pea mo e founga ke nau fakahoko ai ha ʻinitaviu mo e kau mēmipa ʻo e Siasí.
Ngaahi liliu ki he kemi ʻa e Kau Finemuí. ʻE kau ʻi he ngaahi liliu ki he polokalama kemi ʻa e Kau Finemui ʻo e Siasí, ʻa ia ʻoku kau ʻi ha fakahinohino foʻou ki he kemí ʻe tuku atu ʻi he ngaahi māhina ka hokó, hono fakangata ʻo e polokalama maʻu fakaʻilongá mo hono fakamamafaʻi e tuʻunga fakataki ʻi he toʻu tupú.
ʻOku fakataumuʻa ia ke lava ʻo “ngāue ʻaki fakamāmani lahi” ʻe he kau finemui ʻi he funga ʻo e māmaní, ʻa e Fakahinohino [foʻou] ki he Kemi ʻa e Kau Finemuí ʻi he lea faka-Pilitāniá (pea ʻe toki liliu ki ha lea fakafonua ʻe 23) ko ha maʻuʻanga tokoni maʻá e kau palesitenisī ʻo e Kau Finemuí, kau mataotao fakakemí, mo e kau taki kemi ʻo e toʻu tupú ʻi he youngwomen.lds.org.
Fakahū ʻo e mūsiká. ʻOku hanga ʻe he ngaahi liliu ki he founga fakahū ʻo e Mūsika ʻa e Siasí ʻo fakavaveʻi mo fakafaingofuaʻi hono fakahū mai ʻe he kau mēmipá ha mūsika toputapu ki he Siasí. ʻE lava ke fakahū mai ʻa e mūsiká ki he apps.lds.org/artcomp.
Ko e polokalama vitiō “Ko e Founga Ki Hono.” Kuo fokotuʻu ʻe he Siasí ha polokalama foʻou ʻi he YouTube ʻoku ui “Ko e Founga Ki Hono” ʻa ia ʻokú ne ʻomi ha ngaahi tokoni faingofua fekauʻaki mo e ngaahi faingataʻa ʻo e moʻuí ni. Kuo faʻu ia ko ha “polokalama te ke maʻu ai e tokoni kotoa ʻokú ke fie maʻú ʻi he taimi te ke fie maʻu ai,” ʻoku lolotonga maʻu ʻi he polokalamá ha foʻi vitiō ʻoku laka hake ʻi he 600, ʻa ia kuo fokotuʻutuʻu ki ha ngaahi tafaʻaki ʻe 9, ʻoku takitaha ʻi ai pē hono ngaahi lisi vitiō ki ha ngaahi kaveinga kehekehe ʻi he lea faka-Pilitāniá, pea ʻasi ai ha ngaahi lea faka-Sipeini mo Potukali ʻe niʻihi. Vakaiʻi ia ʻi he HowTo.lds.org.
Ngaahi liliu lea ki he Folofolá. Kuo fanongonongo ʻe he Siasí ha fokotuʻutuʻu ngāue fakaliliu lea ʻe 34 ʻi ha ngaahi lea fakafonua kehe, kau ai mo ha founga ngāue te ne fakaʻatā e niʻihi fakafoʻituituí ke nau ako e ngaahi tatau fakaangaanga ʻo e ngaahi liliú kimuʻa pea toki pulusi e tatau fakaʻosí, ʻa ia ko hono ʻuhingá ʻe vave ange hano maʻu ʻe he kau mēmipá e folofolá ʻi heʻenau lea fakafonuá.