ʻEletā Kyle S. McKay

Fitungofulu Taki Māʻolungá

Makehe mei he fāmili ʻo ʻEletā Kyle S. McKay mo e Siasí, ko e meʻa ʻokú ne manako lahi taha aí ko e heka ʻi heʻene hōsí ʻi he ngaahi moʻungá.

Naʻá ne pehē, “ʻOku ʻikai ko ʻeku tui fakalotú, ka ʻoku ʻikai toe fehuʻia ʻene fakamālohia ʻeku [tuí]. ʻOku ou fetongitongi ʻi he ngaahi moʻunga ʻo e ʻEikí pea mo e moʻunga ʻo e fale ʻo e ʻEikí. ʻOkú ma fetaulaki ʻi he ongo feituʻú fakatouʻosi.”

ʻOku fakatatau ʻe ʻEletā McKay ʻa e ngaahi moʻunga ʻi ʻolunga ʻi Hanisivile, ʻIutā, USA, ki he ngaahi vai mo e vaotā ʻo Molomoná mo honau mahuʻinga ki he kakai ʻo ʻAlamaá—ko e ngaahi feituʻu ia, naʻá ne ʻilo ai ʻi heʻene kei talavoú, ʻa hono Huhuʻí.

Naʻe fāʻeleʻi ʻa ʻEletā McKay ʻi he ʻaho 14 ʻo Fēpueli, 1960 ʻi Sikākō, ʻIlinoisi, USA, kia Barrie Gunn McKay mo Elaine Stirland McKay, ʻa ia ʻokú ne fakahoungaʻi hono ohi hake ia ki he tuʻunga ʻokú ne ʻi ai he taimi ní.

Naʻá ne kiʻi mālōlō mei heʻene ako ʻi he ʻUnivēsti Pilikihami ʻIongí ʻi he 1979 ke ngāue fakafaifekau taimi kakato ʻi he misiona Kobe, Japan. Hili ha taimi nounou mei heʻene foki he ʻosi ʻene ngāue fakafaifekaú ke fakakakato hono mataʻitohi ʻi he lea faka-Pilitāniá, naʻe fetaulaki ʻa ʻEletā McKay mo Jennifer Stone, ʻa ia naʻe toki foki mai mei he Misiona England Bristol. Naʻá ne ako foki mo ia ki he lea faka-Pilitāniá. Naʻá na mali ʻi he Temipale Oakland California ʻi he ʻaho 12 ʻo Sune, 1984.

ʻI he hoko ʻa e fāmilí ko e uho ʻo e moʻui ʻa ʻEletā McKay, naʻá ne pehē, ko e meʻa ʻokú na fiefia taha ai mo Sisitā McKay ko hona hakó. Lolotonga e nofo ʻa e ongo McKays ʻi Keisivile, ʻIutā, USA, ʻokú na faʻa fakaʻaongaʻi ha taimi ke feohi ai mo ʻena fānau ʻe toko hivá ʻi Hanisivile, ʻa ia ne nofo ai ʻene fanga kuí ʻi he konga kimuʻa ʻo e 1860 tupú.

Naʻe fakaʻosi ako ʻa ʻEletā McKay mo ha mataʻitohi he laó ʻi he 1987 mei he ʻApiako Lao ʻa J. Reben Clark ʻi BYU, peá ne tali leva ha ngāue ʻi ha kautaha fakaʻēlia lahi ʻi Potilani, ʻOlikoni, USA. Naʻá ne foki kimui ange ki ʻIutā ko ha faingamālie ngāue mo ha kautaha lao ʻe taha kimuʻa peá ne tali ke ngāue ʻi he Kautaha Kroger. Naʻá ne hoko ko ha tokoni palesiteni ʻi he Smithʻs mo e Fryʻs fakatouʻosi, ko ha ongo kautaha movetevete ʻa e Kroger ʻi ʻIutā mo ʻAlisona, USA, mei he 2000 ki he 2017.

Kuo hoko ʻa ʻEletā McKay ko ha pīsope, aleaʻanga māʻolunga, palesiteni fakasiteiki, mo ha Fitungofulu Fakaʻēlia.