ʻEletā Takashi Wada

Fitungofulu Taki Māʻolungá

ʻI ha ʻaho momoko ʻi Nōvema, ne ongoʻi ʻohovale ʻa Takashi Wada ʻi hano ʻeke ʻe ha faifekau ʻAmelika e fakahinohino ki he ʻōfisi tānaki mo tufa meili fakalotofonuá.

Naʻe ʻosi fakatokanga ange e tamai ʻa e kiʻi tamasiʻi taʻu 15 ko ʻení ke fakaʻehiʻehi mei he kau Māmongá, ʻa ia ne nau ʻaʻahi ki he kakai ʻi he ngaahi hala ʻo Nakano, Siapaní, ko ha miniti pē ʻe tolu mei honau ʻapí. Ka naʻe ʻohovale ʻa Takashi ʻi he lea faka-Siapani ʻa e ʻeletā ʻAmeliká.

Hili ha ngaahi ʻaho mei ai, naʻe taʻofi ʻe ha faifekau kehe ʻa Takashi. Ne teʻeki fuoloa ʻene ʻi Siapaní. Naʻá ne faifeinga ke vahevahe e talanoa ʻo Siosefa Sāmitá ʻi ha lea faka-Siapani ne ʻikai fuʻu mahino.

Naʻe ʻikai mahino e meʻa kotoa pē kia Takashi, ka naʻá ne manatuʻi, “ne u ongoʻi ʻoku totonu ke u fanongo.”

Naʻe akoʻi ange ʻe he ongo faifekaú e ngaahi sitepu ʻo e lotú pea mo e ngaahi lēsoní. Naʻá ne ʻalu ki he ngaahi fakatahaʻanga ʻa e Siasí pea naʻe ueʻi ia ʻe he ngaahi fakamoʻoni ʻa e kau mēmipá. ʻI he ongoʻi faingataʻaʻia ʻa Takashi koeʻuhí ko e ngaahi fie maʻu ʻa hono fāmili lotu faka-Putá, naʻá ne toutou talaange pē ki he ongo faifekaú, “He ʻikai ke u lava ʻo kau ki he Siasí, ka ʻoku ou loto ke ako lahi ange.”

Hili ha taʻu ʻe ua, kimuʻa pea mavahe ʻa Takashi ke ako ʻi he ʻIunaiteti Siteití ko hono taʻu 17, naʻe loto lelei ʻene ongomātuʻá, pea naʻá ne kau ki he Siasí.

Naʻe maʻu ʻe ʻEletā Wada, naʻe fāʻeleʻi ʻi he ʻaho 5 ʻo Fēpuali, 1965, kia Kenzo mo Kazuko Wada, ha mataʻitohi B.A. ʻi he ako lea fakafonuá he 1990 mo ha mataʻitohi M.A. ʻi he fakalele pisinisí ʻi he 1996, mei he ʻUnivēsiti Pilikihami ʻIongí.

Naʻá ne ngāue fakafaifekau ʻi he Misiona Utah Salt Lake City North pea mali mo Naomi Ueno ʻi he ʻaho 18 ʻo Sune, 1994, ʻi he Temipale Tokyo Japan. ʻOkú na maʻu ha foha ʻe toko ua.

Naʻe kau ʻi he ngāue maʻuʻanga moʻui ʻa ʻEletā Wada ha ngaahi tuʻunga ʻi he ngaahi kautaha lahi fakavahaʻapuleʻanga ʻi he ʻIunaiteti Siteití mo Siapani, kae pehē foki ki he tuʻunga ʻo e talēkita ki he ngaahi ngāue fakatuʻasino ʻa e Siasí ʻi ʻAmelika Noate Hihifo, pea mo e ngaahi ʻĒlia ʻĒsia Noaté.

Ko ʻEletā Wada ko ha pīsope mālōlō ia, aleaʻanga māʻolunga, mo ha faiako semineli. Naʻá ne hoko ko ha palesiteni ʻi he Misiona Japan Tokyo South mei he 2013 ki he 2016. Naʻe hikinimaʻi ia ko ha Fitungofulu Taki Māʻolunga ʻi he ʻaho 31 ʻo Māʻasi, 2018.