Ko e Ngāue Fakaetauhí
Fai ʻe Palesiteni Russell M. Nelson
Te tau kamata ha founga foʻou mo lelei ange ki hono tokangaekina mo ngāue fakaetauhi ki he niʻihi kehé.
Mālō ʻaupito ʻEletā Gong mo ʻEletā Soares, ʻi hono fakahaaʻi loto moʻoni hoʻomo tuí. ʻOku mau fakafetaʻi koeʻuhí ko kimoua mo homo ongo hoa ʻofaʻangá.
ʻE kāinga ʻofeina, ʻoku mau toutou fekumi maʻu pē ki ha fakahinohino mei he ʻEikí, ʻi he founga ʻe lava ke mau faitokonia ai hotau kāingalotú ke nau tauhi e ngaahi fekau ʻa e ʻOtuá, tautautefito ki he ongo fekau lalahí, ke ʻofa ki he ʻOtuá pea mo hotau kaungāʻapí.1
Kuo laui māhina ʻemau fekumi ki ha founga lelei ange ke tokoni fakaetauhi ai ki he ngaahi fie maʻu fakalaumālie mo fakatuʻasino hotau kakaí, ʻi he founga ʻa e Fakamoʻuí.
Kuo mau fai ha tuʻutuʻuni ke fakapekia atu e faiako fakaʻapí mo e faiako ʻaʻahí, ʻo hangē ko ia ne tau ui ʻaki kinauá. Ka te tau kamata ha founga foʻou mo lelei ange ki hono tokangaekina mo ngāue fakaetauhi ai ki he niʻihi kehé. Te tau ui e ngaahi feinga ko ʻení ko e “ngāue fakaetauhi.”
Ko e ngaahi ngāue fakaetauhi ʻoku ola leleí, ʻoku fakaivia ia ʻe he ngaahi meʻafoaki fakanatula ʻa e houʻeiki fafiné pea mo e mālohi taʻefakatataua ʻo e lakanga fakataulaʻeikí. ʻOku tau fie maʻu kotoa ha maluʻi pehē mei he ngaahi ʻahiʻahi olopoto ʻa e filí.
ʻE hanga ʻe ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, pea mo Sisitā Jean B. Bingham, ko e Palesiteni Lahi ʻo e Fineʻofá, ʻo fakamatalaʻi atu e founga ʻe ngāue fakataha ai he taimí ni e kau tangata ʻe vahe ki ai he lakanga fakataulaʻeikí mo e kau fafine ʻe vahe ki ai he Fineʻofá mo e Kau Finemuí, ke faitokonia mo tokangaekina e kāingalotu ʻo e Siasí he funga ʻo e māmaní.
ʻOku faaitaha e Kau Palesitenisī ʻUluakí mo e Toko Hongofulu Mā Uá ʻi hono poupouʻi ʻena pōpoakí. ʻOku tau fakaava e ʻēpoki foʻou ko ʻeni ʻi he hisitōlia ʻo e Siasí, ʻi he loto houngaʻia moʻoni mo e faʻa lotu. ʻI he huafa ʻo Sīsū Kalaisí, ʻēmeni.