ʻEletā Steven R. Bangerter

Fitungofulu Taki Māʻolungá

Lolotonga ha kemi ʻi he kei siʻi ʻa ʻEletā Steven R. Bangerter, naʻá ne heka mo hono fāmilí ʻi ha ngaahi motopaiki ki he tumuʻaki ʻo ha moʻunga. ʻI heʻenau hifó, naʻá ne hē pea māvahevahe ai mei he toengá.

ʻI heʻene tūʻulutui ʻi he efiafi ko iá ʻo tautapa ki heʻene Tamai ʻi he Langí ki ha tokoní, ʻi heʻene fakakaukaú naʻá ne mamata ki he halanga naʻe hē mei aí. ʻI he kamata ke ne muimui aí, “naʻe aʻu hake hoku tokouá ki he tumuʻaki ʻo e foʻi halá ʻi heʻene paikí, fakafetaulaki mai kiate au, mo taki hifo au ʻi he fakapoʻulí ki he faiʻanga kemí, ʻa ia ne lau houa hono mamaʻó.”

Ko ha taha ia ʻo e ngaahi tuʻunga kuó ne ongoʻi ai hono ʻofeina ia ʻi heʻene kei siʻí. Naʻe pehē ʻe ʻEletā Bangerter, “Naʻe teʻeki ʻi ai ha mōmeniti ʻi heʻeku moʻuí ne u fifili ai pe ʻoku ʻofaʻi nai au pe tokangaʻi lelei.”

Naʻe fāʻeleʻi ʻa ʻEletā Bangerter ʻi Sōleki Siti, ʻIutā, USA, kia Max E. mo Thelma R. Bangerter ʻi he ʻaho 29 ʻo Siulai, 1961. Naʻá ne tupu hake ʻi Kulenisā, ʻIutā.

Hili ha ngaahi uike mei he foki mai ʻa ʻEletā Bangerter mei heʻene ngāue fakafaifekau he Misiona Canada Vancouver, naʻá ne fetaulaki mo Susann Alexis Hughes. ʻI heʻena fuofua teití, naʻá ne ʻiloʻi ʻokú ne maʻu ha ongo fakatōkilalo ke fakahoko ʻa ia naʻá ne ongoʻí ke kole mali kia Susanna ʻi heʻena teiti hono uá. Naʻe silaʻi kinaua ʻi he Temipale Sōlekí ʻi he ʻaho 17 ʻo Māʻasi 1983. Ko ha ongomātuʻa kinaua ʻo ha ngaahi foha ʻe toko ono.

Naʻe maʻu ʻe ʻEletā Bangerter hono mataʻitohi B.A. mei he ʻUnivēsiti ʻo e Siteiti ʻAlisoná ʻi he ako fakalotú mo ha mataʻitohi toketā he laó mei he ʻApiako Lao ʻa e ʻUnivēsiti ʻo e Siteiti Uēsité. ʻI he taʻu ʻe 25 kuo hilí, kuo fakafofongaʻi ʻe ʻEletā Bangerter e ngaahi siasí mo e ngaahi potungāue tui fakalotú ʻi ha ngaahi ngāue fakalao ʻi Kalefōnia Saute mo e feituʻu fakatonga ʻo ʻIutaá. Naʻá ne hoko ko ha hoa ngāue ʻi he Cooksey, Toolen, Gage, Duggy, mo Woog mei he 1993 ki he 2003 pea hoko ko ha hoa pule ʻo Bangerter, Grazier, mo Graff ʻi he 2004.

Kuo hoko ʻa ʻEletā Bangerter ko ha Fitungofulu Fakaʻēlia, palesiteni fakasiteiki, tokoni ʻi ha kau palesitenisī fakasiteiki, pīsope, palesiteni ʻi he kōlomu ʻo e kaumātuʻá, mo ha palesiteni Talavou fakauooti.