ʻEletā Matthew L. Carpenter
Fitungofulu Taki Māʻolungá
ʻOku manatuʻi ʻe ʻEletā Matthew L. Carpenter ʻa e fuofua taimi naʻá ne fakatokangaʻi ai ʻene ongoʻi e Laumālie Māʻoniʻoní. Naʻá ne kei siʻi, ko hono taʻu fitú nai ia, ʻi heʻene tangutu ʻi he Palaimelí. Naʻe huhulu mai ha maama ki he loto lokí, pea naʻá ne maʻu ha ongo māfana naʻe teʻeki ke ne maʻu kimuʻa.
Naʻá ne pehē, “Ne u maʻu ha ngaahi ongo ʻi hoku lotó—pea ʻikai koeʻuhí naʻá ku māfana.” “Naʻá ku ʻiloʻi ʻoku moʻoni ʻa e ʻOtuá; naʻá ku ongoʻi ia.”
ʻI heʻene taʻu 11, naʻá ne ʻalu ki ha fakataha konifelenisi lahi ʻi he Tāpanekale Sōlekí mo ʻene tamaí. Ko e fuofua taimi ia naʻá ne ʻi ha loki tatau ai mo ha palōfita, Palesiteni Joseph Fielding Smith.
Naʻá ne pehē, “ʻI heʻeku mamata kiate iá, naʻe fakamoʻoniʻi mai ʻe he Laumālié ko ha palōfita ia.”
Naʻe tokoni e fanga kiʻi fakapapau fakalaumālie ko ʻení ʻi heʻene kei siʻí ke ne vakai ki he Laumālié ko ha ivi tākiekina ʻi heʻene moʻuí kotoa.
Naʻe pehē ʻe he Fitungofulu Taki Māʻolungá, ʻa ia naʻe hikinimaʻi ʻi he ʻaho 31 ʻo Māʻasi, 2018, “Ko ʻeku fakamoʻoní ʻoku ʻikai ko ha aʻusia fakalangi pē ʻe taha, ka kuo fakalakalaka ia mo tupulaki ʻi he fakalau ʻa e taimí.”
Naʻe fāʻeleʻi ʻa Matthew Leslie Carpenter ʻi Sōleki Siti, ʻIutā, USA, ʻi he ʻaho 21 ʻo ʻOkatopa, 1959, kia Leone Erekson mo Robert Allred Carpenter. Ko e siʻisiʻi taha ia ʻi he fānau ʻe toko valu ʻa e ongomātuʻá, pea naʻá ne tupu hake ʻi ha fāmili mo ha ngaahi tuofāfine ʻe toko nima.
ʻI hono māhina fakaʻosi he akoʻanga māʻolungá, naʻá ne fetaulaki mo Michelle “Shelly” Brown. Naʻe kamata ke na teiti ka naʻe fakatatali ʻena feohí ka ne ʻalu ʻo ngāue fakafaifekau ʻi he Misiona Swiss Geneva mei he 1979 ki he 1981. Hili ʻene foki maí, naʻá na mali ʻi he Temipale Salt Lake ʻi he ʻaho 9 ʻo Siulai, 1982. Ko e mātuʻa kinaua ki ha fānau ʻe toko nima.
Naʻe maʻu ʻe ʻEletā Carpenter ha mataʻitohi B.A. ʻi he meʻa fakapaʻangá mei he ʻUnivēsiti Pilikihami ʻIongí mo ha mataʻitohi M.A. ʻi he fakalele fakapisinisí mei he ʻApiako Pisinisi ʻa Hāvatí. Kimuí ni mai naʻá ne hoko ko e talēkita pule ʻo e Foundation Specialty Financing Fund.
Kuo hoko ʻa ʻEletā Carpenter ko ha pīsope, tokoni ʻi ha kau pīsopeliki, palesiteni Talavou fakasiteiki, aleaʻanga māʻolunga, palesiteni siteiki, mo ha Fitungofulu Fakaʻēlia.