ʻEletā Jack N. Gerard

Fitungofulu Taki Māʻolungá

ʻI heʻene kei siʻí, naʻe ʻā hake ʻa ʻEletā Jack N. Gerard ʻi he ʻaho kotoa ʻi he 5:00 pongipongi ke tokoni hono tokangaʻi e fanga pulu tatau huʻakau ʻa e fāmilí. Naʻe akoʻi ia ʻi heʻene tupu hake ha kiʻi kolo faama siʻisiʻi ofi ki he Mud Lake, Idaho, USA, ke ʻikai ngata pē heʻene ngāue mālohi mo ʻiloʻi hono fatongiá, ka ke ne ʻiloʻi foki e mahuʻinga ʻo e tokotaha fakafoʻituitui kotoa pē ko e fānau ʻa e ʻOtuá.

Naʻe pehē ʻe ʻEleta Gerard, naʻe hikinimaʻi ʻi he ʻaho 31 ʻo Māʻasi, 2018, ko ha Fitungofulu Taki Māʻolungá, “Naʻe maʻu ʻe he tokotaha kotoa pē ha fatongia pea ʻoku ʻi heni ʻa e tokotaha kotoa pē ko ha taumuʻa, neongo pe ko e hā hotau tuʻunga ʻi he moʻuí.” Kuo hoko e lēsoni ko ʻení ko ha meʻaʻofa ʻi he kotoa ʻene moʻuí.

Kuó ne maʻu ʻi heʻene ngaahi ngāue maʻuʻanga moʻuí, ʻa ia ʻoku kau ai ha ngaahi fatongia fakataki mahuʻinga ki ha ngaahi kautaha lahi—hange ko e National Mining Association, ko e America Chemistry Council, pea kimuí ni mai ʻi he American Petroleum Institute—ha ngaahi faingamālie ke feohi ai mo ha kakai mei he tapa kotoa pē ʻo e moʻuí.

Naʻe fāʻeleʻi ʻa ʻEletā Gerard ʻi he 1957 kia James mo Cecil Gasser Gerard. Hili ʻene ngāue fakafaifekau ʻi he Misiona Sydney Australia, naʻe ako ʻa ʻEletā Gerard ʻi he University of Idaho, ʻa ia naʻá ne maʻu ai ha faingamālie ako ngāue pea mo ha ngāue taimi kakato ʻi he kau ngāue ʻa ha fakafofonga falealea ʻi ʻAitahō.

Lolotonga ʻene ngāue ʻi Uasingatoni, D. C., naʻá ne fetaulaki ai mo Claudette Neff, ʻa ia naʻe hoko ko ha ʻasisiteni kau ngāue ʻa ha fakafofonga senitoa ʻi ʻIutā. ʻI heʻenau fakatahá, naʻe pehē ʻe ʻEletā Gerard, “Naʻe huhulu meiate ia e maama ʻo e ongoongoleleí.” Naʻá na mali ʻi he ʻaho 4 ʻo ʻEpeleli, 1984, ʻi he Temipale Salt Lake. ʻOkú na maʻu ha fānau ʻe toko valu mo ha makapuna ʻe 4.

Naʻe maʻu ʻe ʻEletā Gerard ha mataʻitohi B.A. ʻi he politikí mo ha mataʻitohi toketā ʻi he laó mei he ʻUnivēsiti Siaosi Uāsingatoní.

Kuo hoko ʻa ʻEletā Gerard ko ha pīsope, palesiteni fakasiteiki, Fitungofulu Fakaʻēlia, faiako Tokāteline ʻo e Ongoongoleleí, mo ha palesiteni Lautohi Faka-Sāpate.

Naʻe pehē ʻe ʻEletā Gerard ʻokú na maʻu mo hono uaifí ha holi ke fakahoko e finangalo ʻo e ʻEikí. ʻI heʻetau hoko ko ha kakai fakamatelie vaivaí, ʻoku tau tukupā ai ke fai ha meʻa pē ʻe finangalo ʻa e ʻEikí ke tau fai, pea ʻoku tau loto fakatōkilalo ai mo langilangiʻia … ke fakatapui hotau taimí mo e iví ki he ngāue ʻa e ʻEikí.”