ʻEletā Ulisses Soares

Kōlomu ʻo e Kau ʻAposetolo ʻe Toko Hongofulu Mā Uá

Naʻe fakamoʻoni ʻa ʻEletā Ulisses Soares ʻi heʻene fuofua lea ʻi he konifelenisi lahí ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku hoko ʻa e kau palōfita moʻuí, kau ai ʻa Palesiteni Russell M. Nelson, ko ha fakaʻilonga ʻo e ʻofa ʻa e ʻOtuá ʻi Heʻene fānaú.

“ʻIkai ko ha tāpuaki ia ke maʻu ha kau palōfita, kau tangata kikite, mo e kau tangata maʻu fakahā ʻi he māmaní ʻi he ngaahi ʻaho ko ʻeni ʻoku tau moʻui aí, ʻa ia ʻoku nau feinga ke ʻiloʻi e finangalo ʻo e ʻEikí pea muimui ki aí? Ko ha meʻa fakafiemālie ia ke ʻiloʻi ʻoku ʻikai ke tau tuenoa ʻi he māmaní, neongo e ngaahi faingataʻa ʻoku tau fehangahangai mo ia ʻi he moʻuí.”

Neongo naʻe ongoʻi matuʻaki taʻefeʻunga ʻa ʻEletā Soares ki hono uiuiʻi toputapu ko ha ʻAposetoló, naʻá ne pehē ne hanga ʻe Palesiteni Nalesoni ʻi heʻene “ngaahi leá mo e fofonga ʻofa ʻi heʻene fakahoko mai e fatongiá ni, [ʻo ʻai ke u ongoʻi] kuo ʻōʻōfaki au ʻi he ʻofa ʻa e Fakamoʻuí.

ʻI hono hikinimaʻi ʻa ʻEletā Soares ʻi he ʻaho 31 ʻo Māʻasi, 2018, kuó ne hoko ai ko e fuofua ʻAposetolo ʻAmelika Latina ʻi he Siasí. Kimuʻa pea ui iá, naʻá ne hoko ko ha mēmipa ʻo e Kau Palesitenisī ʻo e Kau Fitungofulú talu mei he ʻaho 6 ʻo Sānauali, 2013, pea naʻá ne ngāue ʻi ha fatongia makehe maʻá e Kau Pīsopeliki Pulé ʻi Sōleki Siti.

Naʻe ui ʻa ʻEletā Soares ko ha Fitungofulu Taki Māʻolunga ʻi he ʻaho 2 ʻo ʻEpeleli, 2005. ʻI he tuʻunga ko iá, naʻá ne hoko ai ko ha tokoni ʻi he ʻĒlia Afilika Tonga-Hahaké mo Palāsila Tonga pea mo ha Palesiteni ʻi he ʻĒlia Palāsilá.

Kuo ngāue ʻa ʻEletā Soares ʻi ha ngaahi fatongia faka-Siasi lahi. Kuó ne hoko ko ha faifekau taimi-kakato ʻi he Misiona Brazil Rio de Janeiro, palesiteni ʻi he kōlomu ʻo e kaumātuʻá, tokoni ʻi ha kau pīsopeliki, aleaʻanga māʻolunga, sekelitali pule fakasiteiki, fakafofonga uelofea fakaʻēlia, palesiteni siteiki, mo e palesiteni ʻo e Misiona Portugal Porto mei he 2000 ki he 2003.

Naʻá ne maʻu ha taha ʻo hono ngaahi fatongia mahuʻinga tahá ʻi heʻene taʻu 15, ʻi hono kole ange ʻe he pīsopé ke ne akoʻi fakataimi ha kalasi Lautohi Faka-Sāpaté maʻá e toʻu tupú. ʻI hono teuteuʻi ʻe Ulisses ha lēsoni ʻi he founga ke maʻu ai ha fakamoʻoní, naʻá ne fili ke lotua ha fakapapau ʻo e moʻoni ʻo e ongoongoleleí.

Naʻá ne manatuʻi, “ʻI heʻeku tūʻulutui hifo ʻo fehuʻi ki he ʻEikí pe ʻoku moʻoni ʻa e ongoongoleleí, naʻe haʻu ki hoku lotó ha faʻahinga ongo māfana, ha kiʻi leʻo siʻi naʻá ne fakapapauʻi mai kiate au ʻoku moʻoni ʻa e ongoongoleleí pea ke u kei hokohoko atu pē ai. Ne pehē fau hono mālohí ʻo ʻikai ha taimi ʻe faifai angé pea lava ke u pehē ai naʻe ʻikai ke u ʻiloʻi.”

ʻI he 1985, naʻá ne maʻu ha mataʻitohi B.A ʻi he ngāue fakatauhitohí mo e ʻekonōmiká mei he ʻApiako Ako ʻEkonōmika ʻa e Katoliká ko e ʻUnivēsti Sao Paulo Ponitifikoló. Hili ʻene maʻu ha mataʻitohi M.A. ʻi he fakalele pisinisí, naʻá ne ngāue fakatauhitohi mo hoko ko ha fai ʻātita ki ha ngaahi kautaha fakavahaʻapuleʻanga ʻi Palāsila pea mo ha talēkita ki he ngaahi meʻa fakatuʻasinó ʻi he ʻōfisi fakaʻēlia ʻo e Siasí ʻi Sao Pauló.

Naʻe fāʻeleʻi ʻa Ulisses Soares ʻi Sao Paulo, Palāsila, ʻi he ʻaho 2 ʻo ʻOkatopa, 1958. Naʻá ne mali mo Rosana Fernandes ʻi ʻOkatopa ʻo e 1982. ʻI he lea ʻa ʻEletā Soares ʻi he konifelenisi lahí, naʻá ne fakahoungaʻi hono uaifí heʻene ʻofá mo e poupoú.

“Kuó ne hoko ko ha faʻifaʻitakiʻanga kiate au pea mo hoku fāmilí, ʻo e leleí, ʻofá, mo e līʻoa kakato ki he ʻEikí.” Kau atu ki he fānau ʻe toko tolu ʻa e ongomātuʻá mo e makapuna ʻe toko tolú, naʻá ne pehē ʻi heʻene lea he konifelenisí. “ʻOku ou ʻofa ʻiate ia ʻaki e kotoa hoku lotó, pea ʻoku ou houngaʻia ʻi he ivi tākiekina lelei kuó ne maʻu kiate kimautolú.”