Hisitōlia Fakafāmilí: Fekumi, Tānaki, Fakafehokotaki

Fakatatau mo e lea ʻa ʻEletā Bradley D. Foster, Fitungofulu Taki Māʻolunga mo e Tālekita Pule ʻo e Vaʻa Hisitōlia Fakafāmili ʻa e Siasí, ʻe lava ke tokoni e kau fai faleʻi ʻo e temipalé mo e hisitōlia fakafāmili fakalotofonuá ki he kau mēmipa ʻo e Siasí mo e niʻihi kehé ke nau fekumi ki he fiefia ʻoku maʻu mei he fekumí, tānakí mo e fakafehokotaki mo e ngaahi kuí.

ʻOku maʻu ʻe he tokotaha kotoa ha ngaahi talanoa mei heʻenau hisitōlia fakafāmilí. Pea ʻe lava ke hoko ha ngaahi meʻa fakaofo ʻi hoʻo kamata ke fekumi mo ʻiloʻi kinautolú.

Naʻe pehē ʻe ʻEletā Foster, “Ko e meʻa te tau fakamamafaʻi ʻi he taʻu ka hoko maí ko hono tokoniʻi ʻo e kau fai faleʻí ke nau ʻiloʻi honau fatongia ʻi hono tokoniʻi e kau mēmipá ke maʻu e aʻusia ko ʻení.” “Tau fakahoko tahataha ia. ʻOku tau ʻalu ki he [kakaí] ʻi ha feituʻu pē ʻoku nau ʻi ai, mo ha fakamamafa makehe kiate kinautolu ʻoku hoko honau taʻu 12 mo kinautolu ko ha kau papi ului foʻou.” ʻE tokoniʻi vave e ongo kulupu ko iá ʻi heʻenau mamata ki he founga ʻoku fakamālohia ai ʻe he ngāue fakatemipalé e ngaahi fāmilí ki he taʻengatá, pea ʻoku faʻa tupu mei ai ha loto vēkeveke ʻi honau ngaahi kaungāmeʻá mo e fāmilí.

ʻE lava foki ke maʻu ʻe kinautolu ʻoku ʻikai ke nau kau ki he Siasí ʻa e aʻusia ʻo e fekumi-tānaki-fakafehokotakí ʻi ha tokoni fakataautaha ʻi he FamilySearch ʻi ha taha pē ʻo e ngaahi senitā hisitōlia fakafāmili ʻe 5,000 tupu ʻi he māmaní.