ʻEletā Juan Pablo Villar

Fitungofulu Taki Māʻolungá

Naʻe fakafeʻiloaki ʻa ʻEletā Juan Pablo Villar ki he Siasí ʻi Senitiako, Silei, ʻi he taimi naʻe fakahā ai ʻe hono tokoua lahí, Ivan, ki he fāmilí kuó ne papitaiso taʻe maʻu ha ngofua mei heʻene ongomātuʻá peá ne fakahā kimui ange ʻene palani ke ngāue fakafaifekaú. ʻI he taimi ne ʻeke ai hono ʻuhingá, naʻe vahevahe ʻe Ivan ʻene fakamoʻoní mo ʻene holi ke ngāué.

Naʻe manatuʻi ʻe ʻEletā Villar, ko ʻene taʻu 17 ia, “Naʻe ʻikai mahino kiate au kotoa hono ʻuhingá.” “Ka ʻi he mōmeniti ko iá, naʻá ne tō ha tenga ʻi hoku lotó.”

Naʻe maʻu ʻe he tenga ko iá ha faingamālie ke tupulaki ʻi he taimi naʻe fakafeʻiloaki ai ia ʻe hono tokouá ki he ongo faifekaú. ʻI fuofua lēsoni ʻa ʻEletā Villar, naʻá ne maʻu ha fakamoʻoni tonu ki he moʻoni ʻo e Tohi ʻa Molomoná.

Naʻá ne pehē, “Kiate au, naʻe ʻikai fie maʻu ia ke u tūʻulutui ʻo lotu, koeʻuhí ne u ʻilo ʻi hoku lotó ʻi he mōmeniti ne na vahevahe ai ʻena fakamoʻoní, ʻoku moʻoni.” “ʻI heʻeku ʻilo iá, ne moʻoni e toenga ʻo e meʻa kotoa pē.”

Naʻe maʻu ʻe Ivan, ne ngāue ʻi ha mīsiona ofi mai pē, ha ngofua ke ne papitaiso ʻa ʻEletā Villar ʻi he 1988. Kimui ange, ne kau foki mo ʻena faʻeé mo hona tokoua ʻe taha, Claudio, ki he Siasí.

Hili ha taʻu ʻe taha mei heʻene papitaisó, naʻe kamata ke ngāue ʻa ʻEletā Villar ʻi he Misiona Chile Viña del Mar, ko e kamata ia ʻa ha moʻui tokoni ne kau ki ai ʻene hoko ko ha palesiteni fakasiteiki, pīsope, tokoni ʻi ha pīsopeliki, tokoni ʻi he Misiona Chile Santiago East, mo ha Fitungofulu Fakaʻēlia ʻi he ʻĒlia ʻAmelika Saute Tongá. Naʻe hikinimaʻi ia ʻi he ʻaho 31 ʻo Māʻasi, 2018, ko ha Fitungofulu Taki Māʻolunga.

Naʻe fāʻeleʻi ʻa ʻEletā Villar ʻi he ʻaho 11 ʻo Sepitema, 1969, ʻi Valapalaiso, Silei, kia Sergio Villar Vera mo Genoveva Saaverdra. Naʻá ne mali mo Carola Cristina Barrios ʻi he ʻaho 31 ʻo Māʻasi, 1994, ʻi he Temipale Santiage Chile. Ko e mātuʻa kinaua ki ha fānau ʻe toko tolu.

Hili e maʻu hono mataʻitohi B.A. ʻi he fetuʻutaki fakasōsialé mo e vā fetuʻutaki mo e kakaí mo ha mataʻitohi M.A. ʻi he māketí, naʻá ne ngāue ʻi ha fale ngaohiʻanga meʻangāue fakafaitoʻo. ʻI he 2007, naʻá ne maʻu mo ha mataʻitohi M.A. ʻi he fakalele pisinisí mei he ʻUnivēsiti Pilikihami ʻIongí. Naʻá ne foki leva ki Silei ke ngāue ki he Orica, ko ha kautaha keli lalofonua, pea hoko kimuí ni mai ko ha pule lahi.