ʻEletā Terence M. Vinson
Kau Palesitenisī ʻo e Kau Fitungofulú
ʻOku tui ʻa ʻEletā Terence M. Vinson ʻoku ʻikai teitei mamaʻo ʻa e Fakamoʻuí. Naʻá ne fakamoʻoni ʻi he konifelenisi lahi ʻo ʻOkatopa 2013 ʻo pehē, “ʻOkú Ne ofi maʻu pē, tautautefito ʻi he ngaahi potu toputapú pea ʻi he taimi faingataʻá. Taimi ʻe niʻihi, ʻi he ʻikai ke u ʻamanaki ki aí, hangē pē ʻokú Ne kiʻi tātaaʻi hoku umá ke u ʻilo ʻokú Ne ʻofa ʻiate au.”
ʻI ha taimi ʻe taha ne lue fakataha ai ʻa ʻEletā Vinson mo ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe lī hake ʻe ʻEletā Holland hono nimá ʻi he uma ʻo ʻEletā Vinson mo ne talaange ʻokú ne ʻofa ʻiate ia. Naʻe pehe, ʻe ʻEletā Vinson, “ʻOku ou tui kapau ne tau maʻu e faingamālie ke fononga mo e Fakamoʻuí, te tau ongoʻi e hili mai Hono toʻukupu ʻi hotau umá ʻo pehē pē.”
Naʻe pehē ʻe ʻEletā Vinson, naʻe hikinimaʻi ko ha mēmipa ʻo e Kau Palesitenisī ʻo e Kau Fitungofulú ʻi he ʻaho 31 ʻo Māʻasi, 2018, ko e ʻofa ʻa e ʻOtuá ʻa e “ongo fakamāfana tahá.”
Naʻe hikinimaʻi ʻa ʻEletā Vinson, ʻa ia ʻe hoko atu ki hono uiuiʻi foʻoú ʻi he ʻaho 1 ʻo ʻAokosi, 2018, ko ha Fitungofulu Taki Māʻolunga ʻo e Siasí ʻi he ʻaho 6 ʻo ʻEpeleli, 2013. ʻI he taimi ko iá, naʻá ne lolotonga hoko ko ha mēmipa ʻo e Kōlomu Valu ʻo e Kau Fitungofulú ʻi he ʻĒlia Pasifikí. ʻOkú ne lolotonga hoko ko e Palesiteni ʻo e ʻĒlia ʻAfilika Hihifó.
Naʻe maʻu ʻe ʻEletā Vinson ha mataʻitohi B.A. ʻi he fiká mo e sitētisitiká, maʻu ha tipiloma ʻi he ako fakafaiakó, pea mo ha mataʻitohi M.A. ʻi he ngaahi meʻa fakapaʻangá. Kuo kau ʻi heʻene ngāue maʻuʻanga moʻuí ʻa e faiakó, akoʻí, mo e faiako ʻi he ngaahi ʻunivēsití. Kuó ne ngāue lahi ko ha fai faleʻi fakapaʻanga mo ha pule tokoni fakapaʻanga.
Lolotonga hono kei vakavakaiʻi ʻe ʻEletā Vinson e Siasí heʻene kei talavoú, naʻá ne maʻu ha ueʻi fakalaumālie mālohi. Naʻá ne ongoʻi pau ʻoku totonu ke kau ki he Siasí kae lava ke fakalakalaka mo maʻu e ngaahi tali ki he toenga ʻo ʻene ngaahi fehuʻí. Naʻe papitaiso ia mo hilifakinima ʻi he uike pē ʻe tahá.
Talu mei ai, “Naʻá ku ʻilo e meʻa ʻoku finangalo e ʻEikí ke u faí peá u ʻiloʻi ʻoku ʻi ai ha ngaahi tali ki heʻeku ngaahi fehuʻí kotoa.”
Talu mei hono papitaiso ʻo ʻEletā Vinson ʻi he 1974, kuó ne ngāue ko ha tokoni ki ha kau pīsopeliki, pīsope, aleaʻanga māʻolunga, tokoni ʻi ha kau palesitenisī fakasiteiki, fakafofonga fakavahe lahi, tokoni ʻi ha kau palesitenisī fakamisiona, tokotaha ngāue fai ouau ʻi he temipalé, mo ha Fitungofulu Fakaʻēlia.
Naʻe fāʻeleʻi ia ʻi Senē ʻAositelēlia ʻi he ʻaho 12 ʻo Māʻasi, 1951. Naʻá ne mali mo Kay Anne Carden ʻi Mē ʻo e 1974. ʻOku ʻi ai ʻena fānau ʻe toko ono.