Fakamamafaʻi ʻo e Fatongia Fakaetauhí

Naʻe fanongonongo ʻe Palesiteni Russell M. Nelson ʻi he fakataha hoʻatā Sāpate ʻo e konifelenisi lahí ke fakamālōlooʻi e faiako fakaʻapí mo e faiako ʻaʻahí. ʻE ʻomi ʻe he “Fatongia Fakaetauhí,” ʻa ia ko ha “founga foʻou mo lelei ange” ki he tokoni faka-Kalaisi ki he niʻihi kehé, ha ngāue faaitaha ke tokoni ke feau e ngaahi fie maʻu fakalaumālie mo fakatuʻasino ʻa e kau mēmipá.

Naʻe lea ʻa Sisitā Jean B. Bingham, Palesiteni Lahi ʻo e Fineʻofá, mo ʻEletā Jeffery R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e founga ʻe lelei ange ai ʻetau tokangá ʻi he founga foʻou ko ʻení ki he feinga ʻa e ngaahi kōlomu ʻo e Lakanga Taualaʻeiki Faka-Melekisētekí mo e Fineʻofá ke fakahoko ʻa e fatongia fakaetauhí ʻo hangē ko ia naʻe fai ʻe he Fakamoʻuí (vakai ki he peesi 101 mo e104).

ʻE lava e Loumailé mo e Maea Meití he taimí ni ʻo hoko ko e ngaahi hoa fatongia Fakaetauhí ʻo e kau Fineʻofá. ʻI ha ʻinitaviu fakakuata, ʻe alēlea ai e kau houʻeiki tangata mo e fafine ʻi he fatongia fakaetauhí mo ʻenau kau takí, fekauʻaki mo e ngaahi fie maʻu mo e mālohinga ʻo kinautolu kuo vahe angé. Ko e meʻa pē ʻe hā ʻi he lipōtí ko e lahi ʻo e ngaahi initaviu ne fai ʻe he kau takí lolotonga ʻo ha kuata. ʻOku mahuʻinga ʻa e ngaahi ʻaʻahí ʻi he taimi ʻe malava aí, ka ʻoku ʻikai ha founga pau ia ʻi he fatongia fakaetauhí fekauʻaki mo hoʻo fakafetuʻutaki kiate kinautolu ʻi he māhina takitaha.

Naʻe pehē ʻe Sisitā Bingham, “ʻE lava ke vahevahe ʻe he toʻu tupú ʻenau ngaahi meʻafoaki makehé pea nau tupulaki fakalaumālie ʻi heʻenau ngāue fakataha mo e kakai lalahí ʻi he ngāue ʻo e fakamoʻuí.” ʻE hanga foki ʻe hono fakakau e toʻu tupú ʻo hiki hake e tokolahi ʻo e kau mēmipa ʻoku nau tokoni ki he niʻihi kehé pea tokoni ki he toʻu tupú “ke nau mateuteu lelei ange ke fakahoko honau ngaahi fatongia ko e kau taki ʻi he Siasí mo e komiunitií pea mo nau tokoni ki honau ngaahi fāmilí.”

Naʻe pehē ʻe ʻEletā Holland, “ʻOku ʻikai fie maʻu ke ʻilo ʻe kimautolu ia ʻi he hetikuota ʻo e Siasí ʻa e founga pe feituʻu pe taimi ʻokú ke fetuʻutaki ai mo homou kakaí; ko e meʻa pē ʻoku mau tokanga ki aí ke ke fakahoko ia pea ke ke faitāpuekina kinautolu ʻi he founga kotoa pē te ke lavá.”

Fakatatau mo ha tohi mei he Kau Palesitenisī ʻUluakí, mahalo naʻa kiʻi fuoloa ʻa e fakaangaanga ki he fatongia fakaetauhí, ka ʻoku totonu ke fai leva ia he vave tahá. ʻE maʻu ʻi he Ministering.lds.org ha ngaahi fakamatala lahi ange, kau ai ha ngaahi tali ki he ngaahi fehuʻi ʻoku lahi hono faí. ʻE tānaki atu ha ngaahi vitiō ako mo ha ngaahi maʻuʻanga tokoni kehe ki he saiti ko iá he ngaahi uike ka hokó.

ʻE kamata ʻi Sune, hono fakakau atu ʻi he Liahoná ha ngaahi fakamatala fakamāhina ʻe ui ko e “Ngaahi Tefitoʻi Moʻoni ʻo e Fatongia Fakaetauhí” ke tokoni ki he kau mēmipá ke toe mahino ange kiate kinautolu e founga ke nau ngāue fakaetauhi ai ki he niʻihi kehé ʻi ha founga ʻoku faka-Kalaisi angé.