Michelle D. Craig

Tokoni ʻUluaki ʻi he Kau Palesitenisī Lahi ʻo e Kau Finemuí

ʻI heʻene kei taʻu 16, naʻe ʻilo ʻe Sisitā Michelle D. Craig ʻe hiki hono fāmilí mei Polovo, ʻIutā, USA, ki Hēlisipeki, Penisilivēnia, USA, kae lava ke kamata ngāue ʻene tangataʻeikí ko ha palesiteni fakamisiona.

Naʻá ne fiefia ke fakataha mo hono fāmilí, ka naʻe tupu mei he hikí ha ongoʻi “tuenoa fakasōsiale” ʻa Michelle ʻi he ongo taʻu ʻe ua fakamuimui ʻo ʻene ʻi he akoʻanga māʻolungá.

Naʻe pehē ʻe Sisitā Craig, “Ko ha ngaahi taʻu fakatupulaki ia.” “Makehe mei heʻeku fakafalala ki hoku ngaahi kaungāmeʻá, naʻá ku fakafalala ki hoku fāmilí mo ʻeku fakamoʻoní, pea hoko e siasí ko ha hūfangaʻanga.” Naʻá ne fakamahuʻingaʻi hono vā fetuʻutaki mo e Tamai Hēvaní mo e Fakamoʻuí.

Naʻe fāʻeleʻi ʻa Michelle Daines Craig ʻi he ʻaho 13 ʻo Siulai, 1963, ʻi Polovo, ʻIutā, pea ko e lahi taha ia ʻi ha fānau ʻe toko fitu ne fānauʻi kia Janet Lundgren mo Robert Henry Daines lll. Naʻá ne nofo ʻi Polovo ʻo aʻu ki he taimi naʻe hiki ai mo hono fāmilí ki Penisilivēniá. Hili ha taʻu ʻe ua, naʻe foki ʻa Sisitā Craig ki Polovo ke ako ʻi he ʻUnivēsiti Pilikihami ʻIongí, ʻa ia naʻá ne maʻu ai hono mataʻitohi B.A. ʻi he ako fakafaiako ki he akoʻanga lautohí. ʻI he 1984, naʻá ne tali ha uiuiʻi ke ngaūe ʻi he Misiona Dominican Republic Santo Domingo.

Naʻe pehē ʻe Sisitā Craig, naʻe hikinimaʻi ko e Tokoni ʻUluaki ʻi he Kau Palesiteni Lahi ʻo e Finemuʻí ʻi he ʻaho 31 ʻo Māʻasi, 2018, “Kuó u hoko maʻu pē ko ha tokotaha tui. Ne u ʻilo mei heʻeku kei siʻí ko ha ʻofefine au ʻo e ʻOtuá. Ka ʻoku ou manatuʻi [ʻi heʻeku ngāue fakafaifekaú] ko e taimi kotoa pē ne u vahevahe ai ʻeku fakamoʻoní ki he Palōfita ko Siosefa Sāmitá, ne u ongoʻi ʻa e Laumālié. Ne u maʻu ha fakapapau maʻongoʻonga naʻá ne fakamālohia ʻeku fakamoʻoní.”

Hili ha ngaahi ʻaho mei he foki mai ʻa Sisitā Craig, naʻe talaange ʻe hono tuongaʻané ʻoku fie maʻu ke ʻalu ʻi ha teiti mo Boyd Craig, ko hano kaungāmeʻa mei heʻene misioná. Hili ha māhina ʻe valu ne na fakamaʻu leva. Naʻá na mali ʻi he ʻaho 19 ʻo Tīsema 1986, ʻi he Temipale Salt Lake. Ko ha mātuʻa kinaua ki ha fānau ʻe toko tolu, pea ʻokú na maʻu ha makapuna ʻe toko ono.

Kuó ne fua ha ngaahi fatongia lahi, kau ai ʻene hoko ko ha tokotaha ngāue ouau fakatemipale ʻi he Temipale Provo Utah mo ha faiako ʻo e Tokāteline ʻo e Ongoongoleleí. ʻI he taimi naʻe uiuiʻi ai ia ki he Kau Palesitenisī ʻo e Kau Finemuí, naʻá ne lolotonga ngāue ʻi he poate lahi ʻa e Palaimelí.