Bonnie H. Cordon

Palesiteni Lahi ʻo e Kau Finemuí

ʻOku maʻu e veesi folofola ʻoku manako ai ʻa Sisitā Bonnie H. Cordon ʻi he Tokāteline mo e Ngaahi Fuakava 123:17: “Ke tau fai ʻi he loto-fiefia ʻa e ngaahi meʻa kotoa pē ʻoku tau maʻu ʻa e mālohi ke faí; pea te tau toki lava ʻo tuʻu maʻu ʻi he loto-fakapapau, ke mamata ki he fakamoʻui ʻa e ʻOtuá, pea ke fakahā mai ʻa hono toʻukupú.”

Kiate iá, ʻoku tanumaki ʻe he veesi ko ʻení ʻa e ngaahi lēsoni kuó ne ako ʻi he kotoa ʻene moʻuí. Naʻe pehē ʻe Sisitā Cordon, naʻe hikinimaʻi ʻi he ʻaho 31 ʻo Māʻasi, 2018, ko e Palesiteni Lahi foʻou ʻo e Finemuí, “Te tau lava ʻo fai ʻa e ngaahi meʻa ʻoku faingataʻá, ka te tau toe lava foki ʻo fai ia ʻi he fiefia.”

Naʻe fakatōkakano e ʻilo ko iá lolotonga ʻene “kei siʻí” ʻi he ngaahi ngāue ʻi ha ngoueʻanga ʻi he fakatonga hahake ʻo ʻAitahoó pea ʻi heʻene fai feinga ke ako ha lea fakafonua foʻou ʻi heʻene ngāue fakafaifekau ʻi Potukalí. Ko ha pōpoaki ia naʻá ne faʻa lea ʻaki ki he kau faifekaú lolotonga ʻene ngāue mo hono husepānití ʻi heʻene tokangaʻi ʻa e Misiona Brazil Curitiba. Pea ko ha meʻa ia ʻokú ne palani he taimí ni ke vahevahe mo e kau finemuí ʻi he funga ʻo e māmaní.

Naʻá ne pehē, kuo kolea e kau finemui ʻo e ʻaho ní, ke nau tuʻu hake pea ʻunuakiʻi e ngāue ʻa e ʻEikí ki muʻa. Naʻá ne toe pehē, “Pea te tau lavaʻi ia.”

Naʻe fāʻeleʻi ʻa Bonnie Hillam Cordon ʻi he ʻaho 11 ʻo Māʻasi, 1964, kia Harold mo Carol Rasmussen Hillan ʻi Idaho Falls, USA. Hili ʻene ngāue fakafaifekaú naʻe maʻu hono mataʻitohi B.A. ʻi ha ako fakafaiakó mei he ʻUnivēsiti Pilikihami ʻIongí, ʻa ia naʻá ne fetaulaki ai mo Derek Lane Cordon. Naʻá na mali ʻi he ʻaho 25 ʻo ʻEpeleli, 1986, ʻi he Temipale Salt Lake. ʻOkú na maʻu ha fānau ʻe toko fā mo ha makapuna tangata ʻe toko fā.

Kuo kau ʻi heʻene ngāue he Siasí ʻene hoko ko ha taki ʻi he nesilií mo ha faiako semineli. Kimuʻa pea uiuiʻi ia ʻi he taʻu ʻe ua kimuʻá ke hoko ko ha tokoni ʻi he Kau Palesitenisī Lahi ʻo e Palaimelí, naʻe saiʻia ʻa Sisitā Cordon ʻi heʻene ngāue ko ha palesiteni Kau Finemui ʻi hono siteikí. Neongo ne ʻosi tukuange ia mei he fatongia ko iá, naʻá ne pehē, “Ne ʻikai teitei tuku ai ʻeku lotua e kau finemuí.”

Ko e pōpoaki ʻokú ne fiefia ke vahevahe mo e kau finemui ʻi he funga ʻo e māmaní ko ʻene ʻofa ʻiate kinautolú, kae mahulu angé, ko e ʻofa ʻa e ʻOtuá ʻiate kinautolú.