Ko e Mahuʻinga Fau ʻo e Akó
Ngaahi Meʻafoki Fakalaumālié mo e Fili ʻo ha Ngāue Maʻuʻanga Moʻuí
Ne u maʻu ʻa e misiona ki heʻeku moʻuí lolotonga ʻeku ngāue fakafaifekau maʻá e ʻEikí.
Ne ʻikai sai hoku maaka he ako māʻolungá. ʻI heʻeku tupu haké ne toutou fakamamafaʻi mai ʻe heʻeku ongomātuʻá ʻa e mālohi ʻoku maʻu mei he akó ke liliu ʻemau moʻuí ki ha tuʻunga lelei ange, ka naʻe ʻikai ke u fuʻu tokanga ki ai.
ʻOku ou haʻu mei ha fāmili tokolahi ʻoku ʻi ai ha fānau ʻe toko nima; ua tangata pea tolu fefine. Ne akoʻi kimautolu ke fakamuʻomuʻa maʻu pē ʻa e akó. Ne u ako ʻi ha ʻapiako kehekehe ʻi Hēmilitoni pea mo ʻOkalani ka naʻe ʻikai pē ke u maʻu ʻa e vīsoné.
Ne u ʻalu leva ʻo fakahoko ʻa e ngāue fakafaifekaú pea palani ke hoko atu ʻa e akó ʻi heʻeku foki ki ʻapí. Naʻá ku fie muimui ki he akonaki ʻa e kau palōfitá, ka naʻe ʻikai haʻaku palani pe ko e hā ʻa e meʻa te u akó pea ne ʻikai haʻaku fie ako ki ha faʻahinga ngāue.
Naʻe liliu ʻe he ngāue fakafaifekaú ʻeku moʻuí. ʻOku ʻikai ha ʻaho te u taʻe fakakaukau ai ki heʻeku ngāue fakafaifekaú pea mo ʻene tokoni lahi ki heʻeku moʻuí. Ne u toki ʻiloʻi pē ʻi heʻeku ongoʻi ha fiefia lahi ʻi heʻeku fakaʻaongaʻi ʻa e ʻaho kotoa pē ke tokoni ki ha fānau tokolahi ʻa e ʻOtuá, ʻa ʻeku fie maʻu ke fai iá, pea ne u ʻiloʻi ai ha ngaahi meʻafoaki fakalaumālie ne ʻikai ke u ʻiloʻi ʻoku ou maʻu. Ne talamai ʻe he kakaí ʻoku ou maʻu ʻa e meʻafoaki ʻo e feohi lelei mo e kakaí. Ne hanga ʻe heʻeku anga noaʻiá ʻo fakafaingofuaʻi ʻeku feohi mo e kakaí. Ne u feinga ke fakaʻaongaʻi ʻa e ngaahi meʻafoaki fakalaumālie ko ʻení ke vahevahe ʻaki ʻa e ongoongolelei ʻo Sīsū Kalaisí.
Ne u vakai ki ha ngaahi tūkunga fakaʻofa ʻo e moʻuí ʻi heʻeku ngāue fakafaifekaú, ngaahi fāmili ne movete, niʻihi fakafoʻituitui ne fepaki mo e ongoʻi loto mafasiá pea mo ha niʻihi ko e nunuʻa ʻo e maʻunimā ʻe he faʻitoʻo konatapú. ʻI heʻeku hoko ko e faifekaú ne u lava ʻo talatalaifale mo kinautolu ʻo fakaʻaongaʻi ʻa e folofolá, pea ne u vakai ko hono faitāpuekina ʻe he ongoongoleleí ʻenau moʻuí ʻi heʻenau feinga honau lelei tahá ke moʻui ʻaki e meʻa ne nau akó. Neongo ne u saiʻia hono vahevahe mo kinautolu e ongoongoleleí ka ne u fie fakahoko ha meʻa lahi ange.
Ko e lahi ange ko ia e kakai ne u tokoniʻí, ko e lahi ange ia ʻeku vakai kiate kinautolu ʻi he fofonga ʻo e Tamai Hēvaní. Ne u maʻu leva ha ʻofa taʻe faituʻungaʻá pea mo e manavaʻofá. Ne u fakatokangaʻi leva ko e meʻa naʻá ne ʻomi ʻa e fiefiá ko e ngāué, pea mo e kakaí. Ko e meʻa ia ne u fie fakahoko ʻi heʻeku moʻuí.
ʻOku ʻi ai faitatau ʻaupito e ngāue fakafaifekaú pea mo e hoko ko ha taha ngāue mo e kakaí (social worker). Ko ʻena tefitoʻi kaveingá ke liliu e moʻuí ki ha tuʻunga ʻoku lelei angé. ʻI heʻeku hoko ko ia ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tāpuekina au ʻaki ha mahino ki he Fakalelei ʻa Sīsū Kalaisí. ʻOku ou tui moʻoni ʻe lava ʻa e kakaí ʻo liliu, pea maʻu ha ngāue maʻuʻanga moʻui ʻi hono tokoniʻi e kakaí ke nau liliu pea ko ha tāpuaki ia kiate au.
ʻOku ou saiʻia he akó he taimí ni. ʻOku ou lolotonga ako ʻi BYU ke maʻu hoku mataʻitohi Bachelor ʻi he Social Work. ʻOku ou saiʻia he meʻa ʻoku ou akó pea ʻoku ou ngāue mālohi ki he lahi taha te u malavá. Kuo hoko atu e ako ia ha konga lahi hoku ongo tokouá mo e tuongaʻané pea kuo mau vakai tonu ki he ngaahi tāpuaki ne akoʻi mai ʻe heʻemau ongomātuʻá ʻe hoko mai ʻi heʻemau muimui ki heʻena ngaahi akonakí.
ʻI heʻeku ako ko ia ki hoku mataʻitohí (degree), ʻoku ʻi ai tonu pē e ngaahi tokāteline ʻo e ongoongoleleí, ʻokú ne fakaloloto ʻeku ʻilo fakaako ki he māmaní pea mo fakatupulaki ʻeku malava ke hoko ko ha taha ngāue lelei mo e kakaí (social worker).
ʻI heʻeku kei siʻí, ne ʻikai ke u sio au ki he mahuʻinga ʻo e ʻi ai ha taumuʻá pe misiona he moʻuí. ʻOku ʻi ai ha taumuʻa ʻa e ʻEikí maʻaku pea ne u ʻiloʻi ia ʻi heʻeku lolotonga ngāue fakafaifekaú. Ne ʻikai ke u ʻalu ki he ngāue fakafaifekaú ke ʻiloʻi pe ko hai au. Naʻá ku ʻalú ke vahevahe ʻa e ongoongoleleí ki he tokolahi taha te u malavá, ka ʻi heʻeku fakaʻutumauku ko ia hono fai e ngāue ʻa e ʻEikí, ne u ʻiloʻi ai au mo ʻeku taumuʻá.