Ngaahi Peesi Fakalotofonuá
Fakalotolahiʻi ʻe he Kau Taki ʻo e Siasí e Kāingalotu ʻi Tongá
Ne toki ʻaʻahi atu kimuí ni ʻa ʻEletā Ian S. Ardern, Tokoni ʻUluaki ʻi he Kau Palesitenisī ʻo e ʻĒlia Pasifikí ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea mo hono uaifí ko Paula Ardern, ʻi ha ʻaho ʻe ono ʻo ʻaʻahi holo ʻi he Misiona Tonga Nukuʻalofá, mo fai ha fakalotolahi mo ha talatalaifale ki he kau faifekaú mo e kāingalotu ʻo e Siasí.
Naʻe pehē ʻe ʻEletā Ardern ʻi heʻene talanoa ʻo kau ki he tokoni ʻa e Siasí hili e Saikolone ko Gita: “Kuo tau alanima kotoa ʻo tokoni ʻi hono fakaakeake ʻa Tonga hili ʻa e saikoloné. Naʻe ʻikai ke tau tokoni pē ki he kāingalotu hotau Siasí, ka ne tau tokoni ki he Tonga kotoa. ʻIkai ngata aí, ko e meʻa ne ongo lahi tahá ko e vakai ki he fetokoniʻaki ʻa e kakai Tongá.”
Naʻá ne pehē ne ʻomi ʻe he Siasí ha mīsini fahi papa ke fakaʻaongaʻi ki he ʻulu niu holó ke maʻu ha naunau langa ke tokoni ki hono monomono pe toe langa e ngaahi ʻapi ne maumau pe holó. “ʻOku mau akoʻi e kakaí, ki he taukei ʻoku fie maʻu ke nau moʻui fakafalala pē kiate kinautolú.”
Naʻe fokotuʻu ʻe Sisitā Ardern ʻoku fie maʻu ke tau fetokoniʻaki mo e niʻihi kehé ʻi hotau ngaahi ʻapí kae ako ʻetau fānaú mei heʻenau mātuʻá pea nau lava ʻo tokoni ki he niʻihi kehé.
Naʻá ne pehē, “ko e ngāue fakaetauhi ʻi ʻapí, ko e feʻofoʻofani, lau folofola, lotu mo ngāue fakataha, pea ako ke manako hono fai iá.”
ʻI heʻenau ʻaʻahi holo ʻi he Misiona Nukuʻalofa Tongá fakataha mo e Palesiteni Fakamisioná ko Sione Tuione mo hono uaifí ko Sisitā Lupe Sika Tuione, naʻe vakai ʻa ʻEletā mo Sisitā Ardern ʻo pehē: “ʻOku lelei ʻaupito e kau faifekaú, ʻoku nau hā fakaʻofoʻofa, lelei ʻenau ngāué pea ʻoku nau fai e ngāue maʻongoʻonga! Te ke lava ʻo falala kiate kinautolu ke akoʻi ho kaungāmeʻa ʻoku teʻeki Siasí.
Naʻe ʻomi ʻe ʻEletā Ardern ʻa e fakalotolahi ko ʻení ki he niʻihi ʻoku kei faingataʻaʻiá: “Ko e taimi ʻoku haʻu ai ʻa e fakatamakí—pea ʻe hoko ia—kuo pau ke tau tafoki ki he ʻEikí. ʻI he taimi ʻo ʻetau faingataʻaʻiá, pea ʻi heʻetau tafoki kiate Iá, ʻe mole atu ʻa e mamahí pea te tau tupulaki ʻi heʻetau ʻiloʻi ʻokú Ne kau fakataha mo kitautolu.”