Ko ha Lēsoni Fakaʻuli
Julio Meza Michel
Chihuahua, Mexico
Ne u ongoʻi fiemālie mo nonga ʻi heʻeku fakaʻuli foki ki ʻapí. Naʻe fakafokifā pē, kuó u fanongo ki ha toutou hooni ha kā.
Tā fakatātāʻi ʻe Richard Mia
Ne u fakaʻuli foki ki ʻapi mei ha fakataha ʻa e kakai lalahi kei talavoú ʻi ha hoʻatā Sāpate fakaʻofoʻofa. Ne u ongoʻi fiemālie mo nonga ʻi heʻeku fakakaukau ki he ngaahi pōpoaki ne u fanongo ai fekauʻaki mo hono fakatupulaki e ngaahi meʻa ʻoku tau malavá ko ha fānau ʻa e ʻOtuá. Ne u fehuʻi loto pē pe ko e hā te u lava ʻo fai ke fakatupulaki ai e ngaahi meʻa te u malavá.
Ne u foki ki ʻapi ʻi ha hala fāsiʻi, leini ua hangatonu. Ne ʻi ai ha ʻotu meʻalele ne haʻu mei he tafaʻaki ʻe tahá, ka ne ʻikai ha taha ia ʻi mui ʻiate au. Naʻe fakafokifā pē, kuó u fanongo ki ha toutou hooni ha kā. Kuo ʻi ai ʻeni ha tokotaha fakaʻuli ʻi hoku tuʻá. Naʻá ne toutou kamosi ʻene māmá mo kaila mai ke u ʻunu ki he tafaʻakí. Ne hangē naʻá ne loto ke fakaʻuli vave angé.
Ne u pehē ʻoku fie maʻu ke ako ʻe he tokotaha ko ʻení ʻa e faʻa kātakí mo e fakaʻapaʻapa ki he niʻihi kehé, ko ia ne u toe māmālie hifo. ʻI heʻemau fakalaka mai ha ngaahi hala lahi, naʻá ne kei hooni mai pē mo toutou kamosi mai ʻene māmá. Naʻá ne afe leva ki he tafaʻaki ʻo e halá ʻo tuʻu. Ne u sio atu he sioʻota ki muí ke vakai ki he meʻa te ne fai ʻi he ʻikai ke ne lava ʻo lele oma angé. Ne u ongoʻi leleiʻia ʻi heʻeku akoʻi ange ha lēsoní.
Fakafokifā, naʻe hopo ki tuʻa ʻa e fakaʻulí mei heʻene kaá ʻo fakaava ʻa e matapā ʻo e pāsesé. Naʻe hopo fakavave mai mei ai ha fefine mo ha kiʻi pēpē ʻi hono umá. Ne u sio atu ke vakai pe ko ʻenau ʻalú ki fē. Naʻá ku sio atu mei he mamaʻó ki he ngaahi mataʻi tohi maama ʻoku pehē: “Loki Tokoni Fakavavevave ʻo e Falemahakí.”
“Ko e hā kuó u faí?” Ne u fehuʻi loto hifo kiate au. Ne u aʻu ki ʻapi ʻo tūʻulutui, peá u tangi mo kole ki he ʻOtuá ke fakamolemoleʻi au.
Ne u ako ʻi he ʻaho ko iá ʻoku malava ke tupu e ngaahi ngāue ʻa e niʻihi kehe ʻi hotau ʻātakaí, mei ha ngaahi meʻa he ʻikai ke tau lava maʻu pē ʻo sio ki ai pe mahino kiate kitautolu. Ko e ʻaho ní, ʻi he taimi ʻoku ou sio ai ki ha taha ʻoku ngāue ʻi ha founga ʻoku ou pehē ʻoku hala, ʻoku ou loto ke u fakakaukau ʻoku ʻikai mahino kiate au ʻa e meʻa ʻoku nau fouá. ʻOku ou feinga ke fakahaaʻi ʻa e ʻofa mo e ʻaloʻofa kuo kole mai ʻe Sīsū Kalaisi ke tau fai ki he niʻihi kehé pea mo tokanga ke mahino mo tau tokoniʻi ʻa kinautolu ʻi hotau ʻātakaí.
ʻE anga fēfē haʻaku fakatupulaki ʻa e meʻa te u malava ko ha fānau ʻa e ʻOtuá? ʻE lava ke u tali e ngaahi ngāue ʻa e niʻihi kehé ʻi he ʻofa mo e loto mahino. Kuó u lava ʻi heʻeku fai iá ʻo ongoʻi lahi ange ai e ʻofa ʻa e Fakamoʻuí ʻi heʻeku moʻuí mo lava ke ongoʻi ʻe he niʻihi kehé ʻeku ʻofa ʻiate kinautolú.