“ʻOku Moʻoni Ia, ʻOku Moʻoni Ia”
ʻOku nofo ʻa e tokotaha naʻá ne faʻú ʻi he Lepāpulika Fakatemokalati ʻo Kongokoó.
ʻI he taimi ne u lotua ai ha fakamoʻoni ki he Tohi ʻa Molomoná, naʻe ʻikai ha meʻa ʻe hoko—kae ʻoua leva kuó u kamata lau e Tohi Tapú.
ʻI hoku taʻu 12 nai, naʻá ku fie ʻilo pe naʻe moʻoni nai e Tohi ʻa Molomoná. Naʻá ku lava ʻo fakamoʻoni ʻi ha malanga ko e Tohi ʻa Molomoná ko e folofola ia ʻa e ʻOtuá he naʻe lea ʻaki ia heʻeku faiako Palaimelí. Ka naʻe ʻikai mahino fakafoʻituitui kiate au ʻa hono ʻuhingá.
Naʻá ku ʻiloʻi ʻa e talaʻofa ʻa Molonai kapau te u lau, fakalaulauloto mo lotua ia, te u lava foki ʻo ʻiloʻi (vakai, Molonai 10:3–4). Naʻá ku lau ia ʻi ha ngaahi uike peá u ongoʻi ha loto-nonga, ka naʻe ʻikai ke hoko ha meʻa fakaofo ia—ne ʻikai ha maama, ne ʻikai ha ʻāngelo, ne ʻikai ha leʻo. Ne faifai peá u tuku hono lau e Tohi ʻa Molomoná.
ʻI ha ʻaho ʻe taha lolotonga ʻeku ako e tohi ʻEkesōtosí, naʻá ku lau ai ko e taimi naʻe hala ai e kau ʻIsilelí ha meʻakaí, naʻe ʻomi ʻe he ʻOtuá ha mana kiate kinautolu. Naʻe pau ke toʻo ʻe he tokotaha kotoa pē ʻa e mana fakafeʻunga ki he ʻaho takitaha. Naʻá Ne foaki maʻanautolu ha meʻakai, ka naʻe pau ke nau fakakaukauʻi e founga te nau tānaki ai iá.
Naʻe ongo mai e ngaahi lea ʻa Nīfaí: “ʻOku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7). Ne mahino kiate au mei he meʻá ni naʻe fekauʻi ʻe he ʻOtuá ʻa e kau ʻIsilelí ke nau mavahe mei ʻIsipite pea naʻá Ne palani ke fafanga ʻenau fiekaiá. Naʻe fakamaama ʻe he potufolofola ko ʻeni mei he Tohi ʻa Molomoná ʻa e mahino ne u maʻu ki he Tohi Tapú, pea ne u aofangatuku ai ko e Tohi ʻa Molomoná ko e folofola ia ʻa e ʻOtuá.
Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku faitatau ʻa e fakahā fakatāutahá mo e hopo māmālie hake ʻa e laʻaá kae ʻikai ko e maama ʻoku tupukoso ʻene uló mei hano lomiʻi ha meʻa-kamosi.1 Naʻe kamata ke u mamata ki he Tohi ʻa Molomoná ʻi ha founga kehe.
ʻI he ngaahi māhina ne hoko aí, ne u ʻiloʻi fakapapau ai ko e Tohi ʻa Molomoná ko e folofola ia ʻa e ʻOtuá. Ko e ongo naʻe toutou haʻu kiate au ʻo fakafou ʻi he leʻo ʻo e Laumālié ko e “ʻOku moʻoni ia, ʻoku moʻoni ia, ʻoku moʻoni ia.”
ʻOku ou kei lau pē ʻa e Tohi ʻa Molomoná he meimei ʻaho kotoa pē, pea ʻi he taimi kotoa pē ʻoku ou lau aí, ʻoku ou fanongo ki he ngaahi lea ko ʻení: “ʻOku moʻoni ia.”