Ko e Fakaangaanga ki he Konifelenisí
ʻOku hoko ia he ʻEpeleli mo e ʻOkatopa kotoa pē. Mahalo pē kuó ke anga ʻaki ʻa e ʻekitivitī fakavaeuataʻú. Ka te ke fakapapauʻi fēfē ko ha konga moʻoni ia hoʻo moʻuí—ʻi he toenga hoʻo moʻuí?
ʻI he kahaʻú, ʻi he taimi te ke moʻui ai pē ʻiate koé, ko e hā nai hoʻo meʻa ʻe fai he māhina ʻe ono kotoa pē he taimi ʻoku fai ai e konifelenisí? Fili he taimí ni ke ke mateuteu ki he mālohi ʻo e polokalama fakavaeuataʻu ko ʻení ʻaki haʻo kau mai. ʻOua te ke lea ʻaki pē, “Te u toki sio ai he ʻinitanetí ha taimi.” ʻAi ia ke hoko ko ha meʻa mahuʻinga mo ha tōʻonga moʻui ʻi hoʻo moʻuí.
Ko e ngaahi meʻa ʻeni ʻe niʻihi te ke lava ʻo fai ke ke anga ʻaki ki hono mamataʻi e konifelenisi lahí:
-
Fokotuʻu ha taumuʻa.
Ko e fanongoa ko ia ʻo e kau palōfita mo e kau ʻaposetolo moʻuí ko e taha ia ʻo e ngaahi meʻa mahuʻinga taha te ke lava ʻo faí. ʻI he taimi pē te ke lava aí, feinga ke ke mamata he sēsini kotoa pē. Feinga ke ke fokotuʻu ha ʻaho mo ha taimi pau ke ʻosi ki ai hoʻo mamataʻi e sēsini kotoa ʻo e konifelenisí.
-
Fakaʻataʻatā e ʻaho ko iá.
Tuku haʻo taimi ki he lahi taha te ke lavá ke ke aʻusia ai e konifelenisí pea fakaʻataʻatā hoʻo tohi māhiná mei ha faʻahinga sipoti, ʻekitivitī mo e kaungāmeʻá, pe ngaahi meʻa kehé. Kapau he ʻikai te ke lava ʻo fanongo ki he konifelenisi lahí ʻi heʻene fakamafola fakahangatonú, te ke kei lava pē ʻo ʻai ia ke hoko ko ha ngāue ke fai mo fokotuʻu ha ʻaho ke ke mamataʻi ai.
-
Fokotuʻu ia ke hoko ko ha tukufakaholo.
ʻE lava ke kau he ngaahi tukufakaholo ʻuhingamālié ʻa e fealeaʻaki mo e fāmilí ki he ngaahi lea ne mou manako taha aí, lotu fakafāmili kimuʻa pea fai ha sēsiní, pe ko hano fakatahatahaʻi ha ʻū kupuʻi lea fakatāutahá. ʻE lava ke kau he ngaahi tukufakaholo fakamānakó ʻa e meʻakaí—fakahingoa e meʻakaí pe meʻakai maʻamaʻá ʻaki ha hingoa fakaoli, ngaahi hingoa fekauʻaki mo e konifelenisí (keke konifelenisí, nachos grandes de conferencia, ʻaisi kilimi fakalavelotó, pe kāloti konifelenisí).
-
Fokotuʻu haʻo palani ki he hili ʻa e konifelenisí.
ʻAi ʻa e ngaahi lea ʻo e konifelenisí ke hoko ko ha konga hoʻo ako ʻo e ongoongoleleí. Te ke lava ʻo lau ha lea mei he konifelenisí he Sāpate kotoa pē ʻi he māhina ʻe ono ka hoko maí, fanongo ki ha lea ʻe taha ʻi hoʻo heka he pasí pe ʻi he kaá ʻo feʻunga mo ha uike ʻe ua, pe fekumi ki he ngaahi potufolofola kotoa pē mei he konifelenisí lolotonga hoʻo ako folofola fakatāutahá. Ko e hā pē hoʻo filí, faʻu ha palani ke ke fai ia.