Vakai ki he FAKALAKALAKAʻa e Temipale Loma
“Fie siofia ha temipale. Te u ʻi ai ha ʻaho” (Tohi Hiva ʻa e Fānaú, 99).
Naʻe moʻusioa ʻa Sioeli mo Mikele ʻi he langa fale ne fai he ʻapi ne hanga maí. Naʻe lahi e ʻū pou ukamea mo e ʻotu sima ne na sio ki aí.
Naʻe pehē ange ʻe Sioeli, “ʻOku teʻeki ke hangē mai ia ha temipalé.”
Naʻe tali ange ʻe Mikele, “Ka ʻe ʻi ai pē ʻaho ʻe ʻilonga ai.”
Ko e toki fuofua taimi ʻeni ke sio ai e ongo tautehiná ki he feituʻu ʻe langa ai e Temipale Loma ʻĪtalí. ʻI he taimi ko ʻení naʻe pau ke ʻalu hona fāmilí ki Suisalani ke ʻaʻahi ki he temipalé. Ka ko e temipale foʻou ko ʻení ne miniti ʻe 30 pē ʻene mamaʻo mei honau ʻapí!
Naʻe siofi ʻe Mikele mo Sioeli ʻa hono fetuku ʻe he ʻū loli engeenga lalahí ʻa e ʻū fokotuʻunga kelekelé.
Naʻe pehē ange ʻe Mikele ʻi heʻene tuhu ki ha feituʻu ʻi he konga kimuʻa ʻo e falé, “Mahalo ko e feituʻu ē ʻe tuʻu ai e taha e ngaahi foʻi tumuʻakí.”
Naʻe kamo pē ʻa Sioeli. “Sio ki hē! Ko Papa eni ʻoku haʻu,” ko ʻene leá ange ia. Naʻe tui ʻe heʻena tamaí ʻa hono vala ngāue angamahení—vala lotu mo ha tatā fefeka lanu hinehina. Naʻá ne hoko ko ha ʻenisinia ʻuhila ʻi he temipalé. Naʻá ne manako ke fanongo ki he ngāue ne fai ʻe heʻena tamaí he ʻaho kotoa pē. Hangē ko ʻení, ʻi ha ʻaho ʻe taha naʻá ne talanoa ange kuo aʻu mai e fakatātā ʻo Kalaisí. ʻI ha taimi ʻe taha naʻá ne talanoa fekauʻaki mo e faiʻanga papitaisó.
ʻI he pō ko iá, naʻe fakapapauʻi ʻe Mikele ke ne lotu ʻo fakamālō ki he Tamai Hēvaní koeʻuhí ko e temipalé. Naʻá ne ongoʻi fiefia he taimi kotoa pē naʻá ne lotu ai fekauʻaki [mo e temipalé].
Ne hili ha ngaahi uike. Naʻe langa ʻaki e holisi ngaofe ʻo e temipalé ha maka mālohi, pea naʻe fakaʻau ke māʻolunga ange ʻa e ongo tumuʻakí. Naʻe langa ha senitā maʻá e kau ʻaʻahí he tafaʻakí. Naʻe faʻa ʻalu ʻa Sioeli mo Mikele ki ai ke fakasiosio he matapā luvá ke na ʻiloʻi pe ko e hā ha ngaahi liliu.
Pea ʻi ha ʻaho ʻe taha ne ʻi ai ha fakaʻohovale fakafiefia.
“Te mo fie sio nai ki hono fokotuʻu e maka ʻo e ʻāngelo ko Molonaí ʻi he funga temipalé?” Ko e fineʻeikí ange ia. Naʻe fakaafeʻi e ngaahi fāmili kotoa pē ʻo e kau ngāue langá ke nau omi ʻo sio.
Ne ʻikai faʻa tui ki ai ʻa Sioeli mo Mikele. Naʻá na fuʻu fiefia ʻaupito!
ʻI he pongopongi hono hokó naʻá na tui hona sote hina mo e hēkesi. Naʻá na lue takai he temipalé mo e ngaahi fāmili kehé. Naʻe aʻu ʻo na faitā mo e ʻāngelo koula ko Molonaí. Naʻe lahi ʻaupito ia!
Hili iá naʻe kamata leva ke ʻunuki ʻe he kau ngāué ʻa e maká. Naʻe siofi ʻe Sioeli ʻa hono hiki māmālie ʻe he mīsini hikí ʻa e ʻāngelo ko Molonaí ki ʻolunga ki he taha ʻo e ongo tumuʻakí. Naʻe puna holo ha meʻafaitā he ʻataá ke hiki vitiooʻi ia. Naʻe mālie ʻaupito!
Naʻe fakakaukau ʻa Sioeli ki he kakai kotoa pē te nau ako kau ki he Siasí ʻi heʻenau ʻaʻahi mai ki he temipalé. Naʻá ne fakakaukau ki he kakai tokolahi te nau mali ʻi aí pea mo e founga ʻe papitaiso ai e kakaí maʻá e kakai kuo pekiá.
Naʻá ne pehē ange ki hono tokouá, “Ko ʻene toki hangē mai ʻeni ha temipalé.” Naʻe malimali ʻa Mikele mo kamo pē.
Naʻe fiefia ʻa e ongo tautehiná Naʻá na vēkeveke ke na hū he temipalé he kahaʻú! Naʻe tupu fakataha pē ʻena fakamoʻoní mo hono langa ʻo e [temipalé]. ●