Mālohi ʻo e Lotú
Ko hai ha taha te ke lotua he ʻahó ni?
“Felotuaʻaki ʻa kimoutolu” (Sēmisi 5:16).
Naʻe ui ʻe he Tangataʻeikí ʻa e tokotaha kotoa pē ke nau omi ki he komipiutá. Naʻe lī ʻe Lusi ʻa e sīlafe tamapua naʻá ne vaʻinga ʻakí ka ne fakatovave mai. Ko e hā e meʻa ʻoku hokó? Kuo taimi nai ke tā ki he Kui Fefiné he ʻinitanetí?
Naʻe tuhu e Tangataʻeikí ki he komipiutá. “Naʻá ku fie fakaʻaliʻali atu ha konga lea mei he konifelenisi lahí.”
Naʻe fakahila ʻa Lusi. Naʻe ʻikai ko e Kui Fefiné ia. Ko Palesiteni ʻAealingi ia! Naʻá ne kau ʻi he Kau Palesitenisī ʻUluakí.
Naʻe lomiʻi he Tangataʻeikí ʻo kamata ʻa e vitioó. Naʻe akonaki ʻa Palesiteni ʻAealingi fekauʻaki mo hono poupouʻi hoʻo kau taki ʻi he Siasí. Naʻá ne fakamatalaʻi ʻa e fie maʻu ʻe he kau taki ʻo e Siasí ke tau lotua kinautolú.
Naʻe ʻeke ange ʻe he tuongaʻane siʻisiʻi ʻo Lusi ko Tēvitá, “Ko e ʻuhinga ia ʻoku tau lotua ai e palōfitá, ʻikai ko ia Tangataʻeiki?” Naʻe kamo ʻa e Tangataʻeikí mo e Fineʻeikí fakatouʻosi.
Naʻe pehē ange ʻe he Tangataʻeikí, “ʻIo, ko ia. Ka ʻoku ou fakakaukau foki ki heʻetau kau palesitenisī fakakoló. ʻOku ou tui ʻoku fie maʻu foki ʻe Palesiteni ʻAvalisi mo hono ongo tokoní ʻetau lotú.”
Naʻe ʻofa ʻa Lusi ʻia Palesiteni ʻAvalisi mo hono ongo tokoní. Naʻa nau angalelei maʻu pē kiate ia. Naʻá ne fie tokoni kiate kinautolu!
Naʻe pehē ange ʻe Lusi, “Te u lotua kinautolu. Pea te tau lava foki mo kitautolu ʻo lotua kinautolu ʻi heʻetau lotu fakafāmilí!”
Naʻe pehē ange ʻe he Fineʻeikí, “ʻOku ou tui ko ha fakakaukau lelei ia. Tau fai ia.”
ʻI he ngaahi ʻaho ne hoko aí, naʻe feinga mālohi ʻa Lusi ke ne manatuʻi ke lotua e kau palesitenisī fakakoló ʻi he taimi kotoa pē naʻá ne lotu aí. Naʻe fuoloa ʻaki pē ha ngaahi lau sekoni. Ne faingofua pē!
ʻI he Sāpate hono hokó, naʻe tuʻu hake ʻa Palesiteni ʻAvalisi ʻi he houalotu sākalamēnití he hili ʻa e hivá. Naʻe ʻohovale lahi ʻa Lusi ʻi he meʻa naʻá ne lea ʻakí.
Naʻá ne pehē, “ʻI heʻemau hoko ko e kau palesitenisī fakakoló, ʻoku mau fie fakamālō atu ʻi homou lotua kimautolú. Kuo mau ongoʻi ha ivi mālohi moʻoni mei he ngaahi lotu ko iá. ʻOku mau fuʻu fie maʻu lahi homou tuí mo e lotú ke fua ʻaki homau fatongiá. Mālō ʻaupito!”
Naʻe malimali ʻa Lusi. Naʻá ne fakasio hake kia Tēvita. Naʻá ne malimali foki mo ia. Ne ʻikai ke ne tui ki he meʻa ne hokó! Naʻá ne fuʻu fiefia naʻe ʻikai ai ke ne kei lava ʻo tangutu maʻu. Naʻá ne ʻunuʻunu atu ʻo fusiʻi e tapaʻi kofu ʻo e Fineʻeikí.
Naʻá ne fanafana ange, “Fineʻeiki! Naʻá ke fanongo ki he meʻa naʻe lea ʻaki ʻe Palesiteni ʻAvalisí?!” Naʻá ne fakaʻamu ke hopohopo fiefia. “Naʻe ʻaonga pē! Naʻe ʻaonga pē ʻetau lotú!”
ʻI he tuku e lotú, naʻe lue fakataha ʻa Lusi mo hono fāmilí ki ʻapi.
Naʻe pehē ange he Fineʻeikí, “Ko e moʻoni pē ʻoku fanongo mai e ʻOtuá ki heʻetau lotú. Hono ʻikai fakaofo ke tau sio ki he mālohi hono lotua ʻe ha falukunga kakai ha taha kehe?”
Naʻe ongoʻi loto-māfana mo loto-fiefia ʻa Lusi. Naʻá ne hopo fiefia mo Tēvita ʻi heʻena lue he veʻehalá kae lue muimui mai ʻa e Fineʻeikí mo e Tangataʻeikí ʻi hona tuʻá. Naʻá ne ʻilo ne ongona ʻe he Tamai Hēvaní ʻa e ngaahi lotu ʻa hono fāmilí. Naʻa nau fakahoko moʻoni ha lelei. ʻAki pē ʻenau lotú!
Naʻe teuteu ʻa Lusi he pō ko iá ke ne fai ha lotu. Naʻá ne fakakaukau ki heʻene faiako Palaimelí mo e kau taki kehe ʻi he Siasí ʻa ia te nau fie maʻu ha ngaahi tāpuaki makehe. Mahalo te ne lotua foki mo kinautolu! Naʻe kūnima ʻa Lusi pea punou hono ʻulú. Naʻá ne ʻiloʻi pau ʻa e meʻa ke ne lea ʻakí. ●