Loma, ʻĪtali

ʻĪmisi

Italy Rome Temple

ʻI he taimi ʻe fakatapui ai e Temipale Rome Italy he ʻaho 10–12 ʻo Māʻasi, 2019, ʻe fiefia e Kāingalotu kotoa pē ʻo e Siasí he funga ʻo e māmaní, tautautefito ki he Kāingalotu ʻi ʻĪtalí. Ko e hā mo ha toe fale mahuʻinga ange ʻe lava ke maʻu ʻe he “kolo taʻengatá” ka ko ha fale ʻo e ʻEikí?

ʻOku tuʻu e fuofua temipale ʻo ʻĪtalí ʻi he tafaʻaki fakatokelau-hahake ʻo Lomá. ʻOku hoko ia ko ha konga ʻo e senitā fakalotu mo fakafonua ʻa ia ʻoku kau ki ai ha fale fakatahaʻanga (mo ha holo fakafonua mo ha ngaahi fale ki he konifelenisí), ko ha senitā takimamata, senitā hisitōlia fakafāmili, mo ha nofoʻanga maʻá e kau pataloní, ʻoku takatakai kotoa ai ha ngaahi ngoue.

Naʻe kamata ʻa e ngāue fakafaifekau ʻi ʻĪtalí he taʻu 1850, ka naʻe taʻofi ʻene fakalakalaká ʻe ha ngāue fakafepaki ki he Siasí mo e ngaahi fie maʻu fakalao mamafá. Naʻe faifai pea fakangofua e Siasí ke hoko atu ʻenau ngāue fakafaifekaú ʻi he 1964. ʻI he 1993, naʻe foaki ʻe ʻĪtali ha ngofua fakalao ki he Siasí. ʻI he 2012, naʻe maʻu ʻe he Siasí ha totonu ke hoko ko ha “hoa ngāue ʻo e siteití,” ʻo fakangofua ai ke tauʻatāina ange e Siasí hono fai ha ngaahi lelei lahi ange ko ha siasi mo ha kautaha fakasōsiale fakatouʻosi.

ʻI he ʻaho ní, kuo ofi ki ha Kāingalotu ʻe toko 27,000 ʻi ʻĪtali ʻoku nau fakataha ki ha ngaahi haʻofanga lotu ʻe 101.
Naʻe puleʻi ʻe Palesiteni Tōmasi S. Monisoni (1927–2018) e polokalama tanupou ʻo e Temipale Rome Italy ʻi he 2010, ʻa ia naʻe kau foki ki ai mo e tokoni pule kolo ʻo Lomá.
ʻOku ʻi ai ha ongo misiona ʻe ua ʻi ʻĪtali, ko e Misiona Italy Milan mo e Misiona Italy Rome.