Ko Ha Lēsoni mei Heʻeku Ongomātuʻá

Fai ʻe ʻEletā Massimo De Feo

ʻO e Kau Fitungofulú

Ne u tupu hake ʻi ha kiʻi kolo ʻi he fakatonga ʻo ʻĪtalí. Ne ʻikai kau hoku fāmilí ki he Siasí. ʻI ha ʻaho ʻe taha ʻi hoku taʻu hivá, naʻe tukituki mai ha ongo faifekau ʻi homau matapaá.

Naʻe ʻikai fie fanongo ʻeku ongomātuʻá ki he pōpoaki ʻa e ongo faifekaú, ka naʻá ku fie fanongo au. Kae pehē foki ki hoku tokoua ko ʻAlipaté. Naʻe tuku pē heʻema ongomātuʻá ke ma toutou fakataha pē mo e ongo faifekaú. Naʻe papitaiso mo hilifakinima kimaua kimui. Naʻá ku taʻu 10 kae taʻu 11 ʻa ʻAlipate.

ʻI hoku taʻu 18, ne u kole ki heʻeku tamaí ke tokoni mai ki hono totongi ʻeku ngāue fakafaifekaú. Naʻá ne ʻuluaki talamai, “He ʻikai. Ko e fuʻu paʻanga lahi ia.” Ka ʻi he hili ha ngaahi ʻaho mei ai, naʻá ne ʻeke mai, “ʻOkú ke fie ʻalu moʻoni ʻo ngāue fakafaifekau?” Pea ne u talaange, “ʻIo. ʻAki hoku lotó kotoa.” Naʻe talamai heʻeku tamaí te ne tokoniʻi au.

Naʻe ʻikai mahino kiate au ʻa e ʻuhinga ʻe fie totongi ai heʻeku tamaí ha paʻanga lahi pehē maʻakú. Naʻe toki mahino kiate au ʻa hono ʻuhingá he naʻá ne ʻofa ʻiate au. Naʻe tupu ai ʻeku fakakaukau ki he feilaulau ʻa Sīsū Kalaisi maʻatautolú. Naʻá Ne totongi e mahuʻinga mamafa tahá he naʻá Ne ʻofa ʻiate kitautolu.

ʻI heʻeku foki mai mei he ngāue fakafaifekaú, naʻe puke lahi ʻeku faʻeé he kanisaá. ʻI ha ʻaho ʻe taha naʻá ne kole mai ke u akoʻi ange ʻa e lotú. Naʻá ne fakaʻamu ke ne lotu maʻaku. Neongo ʻene mamahí, ka naʻá ne fakakaukau ki he niʻihi kehé. Naʻá ne fakamanatu foki kiate au ʻa Sīsū. ʻI he taimi naʻá Ne fakalelei ai maʻatautolú, naʻá Ne mamahi lahi. Ka naʻá Ne lotu maʻatautolu.

Neongo naʻe ʻikai teitei kau ʻeku ongomātuʻá ki he Siasí ʻi he moʻui ko ʻení, ka naʻá na hoko ko ha ongo faʻifaʻitakiʻanga lelei kiate au. ʻOku ou houngaʻia ʻi he ngaahi lēsoni kuó u ako meiate kinauá. ʻE lava ke tau ako ha ngaahi meʻa lahi mei heʻetau mātuʻá, kau faiakó mo e kau takí kapau te tau ongongofua ke tali e meʻa ʻoku nau akoʻi kiate kitautolú. ●

Ako mei Heʻetau Ongomātuʻá

ʻI he taimi ʻoku tau fili ai ke fakaʻapaʻapa ki heʻetau mātuʻá, ʻoku faitāpuekina kitautolu (vakai, ʻEkesōtosi 20:12). Valivali e fakatātaá pea siakaleʻi e ngaahi meʻa kuo akoʻi atu ʻe ha mātuʻa pe tauhi fānau kiate koe. Ko e hā mo ha toe meʻa te ke lava ʻo fakakaukau ki ai? Tā ia ʻi he konga ʻoku fakaʻatā atú!

• Lotu

• Fakamāʻopoʻopo e moveuveú

• Fakaʻaongaʻi e ngaahi lea lelei

• Teuteuʻi ha meʻatokoni

• Lautohi

• Tokoniʻi e niʻihi kehé