Kakai Lalahi Kei Talavoú
Toe Sio ki he Temipale Māʻoniʻoní
ʻOku nofo e taha naʻá ne faʻú ʻi ʻAnitila Palatesi, ʻInitia.
Ne u fakatokangaʻi naʻe fie maʻu ke u toe foki ki he temipalé ke u maʻu ai ha mahino mo ha manatu lelei ange ki he ngaahi fuakava kuó u faí.
ʻI he taʻu ʻe fā kuohilí, naʻe fehuʻi heʻeku faiako ʻinisititiuti ko Misa Suliasi Natalasaní ki he kalasí ʻo pehē, “Ko e toko fiha nai ʻiate kimoutolu kuo mou ʻalu ki he temipalé?” Koeʻuhí naʻá ku ʻoku ʻosi fononga mo hoku uaifi ko ʻAnanitaá ʻi ha houa ʻe 10 ke ma fuofua hū he Temipale Hongo Kongo Siainá ʻi he taʻu kimuʻá, ne u hiki fiefia ai hoku nimá. Naʻá ne ʻeke mai leva ha fehuʻi ʻe taha: “ʻOkú ke manatuʻi e ngaahi fuakava naʻá ke fai he temipalé?”
Naʻe fakatupu fakakaukau ʻene fehuʻí. Naʻe lahi fau e meʻa ke ako ʻi he fuofua taimi ne u hū ai ki he temipalé. Neongo naʻá ku feinga ke u tokanga, ka naʻe ʻosi ange meʻá ne u fakatokangaʻi kuo ngalo ʻiate au e ngaahi fuakava ne u fai he temipalé. ʻI he taimi pē ko iá, naʻá ku fakakaukau ai ke u toe foki ki he temipalé ko hono tuʻo uá, pea ko e taimi ko ʻení te u tokanga mo manatuʻi e ngaahi fuakava ne u faí mo e ngaahi meʻa kehe ʻoku mahuʻinga ki hoku fakamoʻuí.
Ne fakalau atu e taimí. Ne u fehangahangai mo ha ngaahi faingataʻa fakamamahi ʻi heʻeku moʻuí. Ka naʻá ku kau ki ha kalasi ʻinisititiuti, pea ʻi ha ʻaho ʻe taha naʻa mau ako ai ki he palōfita ko Sioná. Naʻe ʻikai fai ʻe Siona e meʻa naʻe fekauʻi ʻe he ʻEikí ke ne faí. Ko e taha e ngaahi veesi naʻá ne maʻu ʻeku tokangá ko e Siona 2:4: “Ko ia ne u pehē ai, kuo liʻaki atu au mei ho ʻaó; ka neongo iá, te u toe sio ki ho fale tapu māʻoniʻoní.”
Naʻe ongo ʻa e potufolofola ko ʻení ki hoku lotó, pea naʻá ku lotu ki he Tamai Hēvaní ke Ne ʻomi kiate au mo hoku uaifí ha toe faingamālie ke ma ʻaʻahi ai ki he temipalé.
Ne hili ha taʻu ʻe fā naʻe tāpuekina kimaua ʻe he Tamai Hēvaní ke ma toe hū ki Hono falé, ka naʻá ma hū ʻeni he Temipale Taipei Taiuaní.
Ko Mahesi mo ʻAnanitā Vetulupaka ʻi muʻa ʻi he Temipale Taipei Taiuaní.
Lolotonga ʻema ʻi aí, ne u maʻu ai ha faingamālie ke fakahoko ha ngaahi ouau ki heʻeku faʻētangata naʻe mālōlō ʻi he kanisaá. ʻI he taimi naʻe papitaiso ai au ko hano fakafofongaʻi iá, ne u fakakaukau ai ki he ngaahi tāpuaki te ne maʻu ʻo fakafou ʻi he ouau fakatemipale ko ʻení. Naʻá ku fiefia lahi, pea naʻá ku fakatokangaʻi ʻa e meʻa naʻe talamai ʻe he palesiteni temipalé ʻi he taimi ne u fuofua haʻu ai ki he temipalé peá u kiʻi puputuʻu aí. Naʻá ne pehē mai, “ʻE tokoua, mahalo he ʻikai mahino kiate koe ʻa e meʻa kotoa ʻokú ke fai he taimi ní, ka ʻe ʻi ai e ʻaho te ke ongoʻi ai kuó ke fai ha ngaahi meʻa maʻongoʻonga heni.”
Naʻe maʻu ʻeku talí. Kuo lava ʻeni ha taʻu ʻe fā pea toki mahino kiate au ʻi heʻeku ʻaʻahi ki he temipalé ko hono tuʻo uá.
ʻI heʻeku maʻu ko ʻeni ʻa e sākalamēnití he uike kotoa peé, ʻoku ou manatuʻi ai e mālohi ʻo e Fakalelei ʻa Sīsū Kalaisí pea mo e toputapu ʻo e ngaahi fuakava kuó u fai he temipalé.
ʻOkú ma fakamanatu mo hoku uaifí he taʻú ni ʻa e taʻu ʻe 10 ʻo ʻema nofo-malí. ʻOku ou fie fakamanatu ia ʻi he temipalé mo fakahoko ha ngaahi ouau sila maʻa ʻeku ngaahi kuí. Ke fai ʻení, kuó u ngāue ai ha ngāue ʻe taha makehe mei heʻeku ngāue maʻuʻanga moʻui angamahení, ko ha ngāue ʻoku ʻikai ke ne uesia ʻeku taimi mo hoku fāmilí.
ʻOku ou ʻiloʻi pea ʻoku ou ongoʻi ʻoku moʻoni ʻa e ngāue fakatemipalé. ʻOku ʻikai ha meʻa te ne lava ʻo fetongi ia, pea ʻoku ʻaonga ʻa e feilaulau kotoa pē ke ʻalu ki he temipalé ke fakahoko e ngāue ʻa e Tamai Hēvaní maʻatautolu mo e ngaahi laumālie ʻoku nau ʻi he tafaʻaki ʻe taha ʻo e veilí.