ʻOkú Ke Pehē Te Ke Toe Sio Ki Ho Tuongaʻané?
Uenitī Sēningi (ʻo hangē ko hono fakamatalaʻi kia Lia Peitoní)
ʻIutā, USA
Tā fakatātā ʻa Allen Garns
Naʻe fuoloa ʻa e poʻulí, ko au pē ʻa e fai fakatau naʻe kei ngāué, pea ne ʻikai mo ha toe taha kehe ʻi he falekoloá kotoa. ʻI heʻeku holo hifo e funga kānita fai fakataú, ne kamata ke u ngūngū.
Naʻe fetongi vave ʻeku ngūnguú ʻo u hiva. Ne u kamata hivaʻi ʻa e “Haʻu Kāinga ʻOua Manavahē” (Ngaahi Himí, fika 18). ʻOku ʻikai ke u faʻa hiva e ngaahi himí ke u fiefia ai, ka ne u hiva ia ʻi he loto-mālohi kae ʻoua kuo taʻofi au ʻi haʻaku sio ki ha tokotaha.
Naʻe fakafetaulaki mai ha tangata mātuʻotuʻa ange.
Naʻá ne pehē mai, “ʻoku ou ʻilo e foʻi hiva ko iá.” “Anga fēfē hoʻo ʻilo iá?”
Ne u pehē ange, “Ko ha himi ia ʻoku mau hiva ʻi heʻemau lotú.”
“Ko ha Māmonga koe?”
Ne u tali ange ʻio.
Naʻá ne talamai naʻe hoko hono uaifí ko ha mēmipa ʻo e Siasí pea naʻá ne mālōlō he 2011 ʻi he kanisaá. Naʻá ne pehē naʻe hivaʻi ʻa e “Haʻu Kāinga ʻOua ʻe Manavaheé” ʻi hono meʻafakaʻeikí. Ne u fakahā ange ʻeku fie kaungāmamahí mo talaange naʻe mālōlō mo hoku tuongaʻané ʻi he 2011 lolotonga haʻane ngāue fakafaifekau ʻi ha misiona ʻi Silei. Ne mau hiva foki e foʻi himi ko iá ʻi hono meʻafakaʻeikí. Naʻe ueʻi ʻe he Laumālié homa lotó ʻi heʻema ofo he tūkunga “tupukoso” ko ʻení.
Naʻá ne fehuʻi mai, “ʻokú ke pehē te ke toe sio ki ho tuongaʻané?”
Kuo tā liuliunga ʻeku ʻeke kiate au pē ʻa e fehuʻi tatau. ʻI he ngaahi māhina faingataʻa hili e mālōlō hoku tuongaʻané, ne u fefaʻuhi mo e loto veiveiuá. Naʻe faifai pea tāpuekina au ʻe he Tamai Hēvaní ʻaki ha ʻilo ʻoku taʻengata ʻa e ngaahi fāmilí. Naʻe kei ʻi ai pē haʻaku ngaahi fehuʻi, ka ne u sio hangatonu ki he fofonga ʻo e tangatá mo pehē ange, “ʻIo, ʻoku ou tui ki ai!”
Naʻe pehē mai ʻe he tangatá, “ʻokú ke maʻu ha tui mālohi.” “Naʻe faʻa pehē ʻe hoku uaifí ʻoku totonu ke tau maʻu ‘ha ʻamanaki ʻoku mālohi haohaoa.’” Ne u poupou ki ai peá u lau ange e toenga ʻo e 2 Nīfai 31:20, ʻoku totonu ke tau ʻofa ki he ʻOtuá mo e kakai fulipē, vilitaki atu ki muʻa, keinanga ʻi he folofola ʻa Kalaisí, mo kātaki ki he ngataʻangá.
Naʻe pehē mai ʻe he tangatá mo fakapetepete tangi, “Ko ia!” “Ko e meʻa ia naʻá ne mei talamaí! Naʻá ke ʻilo fēfē ia?”
Ne u talaange ki ai naʻe ʻi he Tohi ʻa Molomoná. Naʻá ne ʻeke mai pe ʻe anga fēfē haʻane maʻu ha tatau ʻo e tohí. Ne u talaange ki ai e founga ke maʻu ai ʻi he ʻinitanetí. Naʻe lulululu mai ʻa e tangatá, fakamālō mai mo ui hoku hingoá, peá ne ʻalu.
ʻOku ʻuhinga ʻetau maʻu e tuí ʻoku tau falala ki he ʻOtuá naʻa mo e taimi ʻoku ʻikai ke tau maʻu ai e ngaahi talí kotoa. ʻOku ou houngaʻia ne fili au ke u tali e fehuʻi ʻa e tangata ko iá, ne u lava ʻo falala ki he tui ʻoku ou maʻu ki he ngaahi moʻoni ʻoku ou ʻiloʻí. Naʻe ʻikai haohaoa ʻeku tuí, ka ne u ʻilo ne feʻunga ia ʻi he ʻao ʻo e ʻEikí.