Kakai Lalahi Kei Talavoú
Holi ki ha Mahino Lahi Ange
Tā fakatātaaʻi ʻe Toni Demuro
ʻI ha taimi ʻe taha naʻá ku ʻalu ai ʻo fuofua teiti mo ha taʻahine homau uōtí. ʻI he pongipongi hono hokó ko kimaua pē ne ma ʻalu ki heʻemau temipale fakauōtí. Ne ma fie tokoni ki ha faʻahinga ouau pē ne fie maʻu ki ai ha kau pataloni … ʻa ia naʻe toki ʻiloʻi ange ko e ouau silá.
Naʻá ku ongoʻi lotosiʻi ʻaupito, ka naʻá ku ʻohovale he naʻe ʻikai ke loko ngali kehe fēfē ke te sila fakafofonga mo ha taʻahine naʻá te toki ʻosi fuofua teiti pē mo ia ʻi he houa ʻe 12 kuohilí ʻo hangē ko e meʻa ne u fakakaukau ki aí. Naʻe hoko ʻa e aʻusia ko iá ke u maʻu ai ha fakakaukau lahi ange ki he mahuʻinga ko ia ʻo e tafaʻaki kotoa pē ʻi he ngāue fakatemipalé—kau ai ʻa e silá (laukonga lahi ange ʻi he fakamatala fakaʻilekitulōniká).
ʻOku makehe hotau tūkunga kotoa pē, ka ʻo kapau te tau feinga ke maʻu ha mahino lelei ange ki he ngaahi fuakava ʻoku tau fai he temipalé, ʻe siʻisiʻi ange ʻa e hoko e ngaahi ouau ko iá ko ha ʻū meʻa ke tamateʻi mei heʻetau lisi vakaiʻi fakalaumālié, ka ʻe hoko ia ko e ngaahi maʻuʻanga tokoni ʻo e “vai moʻuí” ʻa ia te ne ala ʻomi e ivi fakalaumālié kiate kitautolu (vakai, Tokāteline mo e Ngaahi Fuakava 63:23). Pea ʻi he māmani moveuveu ko ʻeni ʻoku tau ʻi aí, te tau fie maʻu e ivi kotoa pē te tau ala maʻú!
ʻI he pulusinga ko ʻení, ʻoku vahevahe ʻe he kakai lalahi kei talavoú ʻenau ngaahi aʻusia he temipalé. ʻOku vahevahe ʻe Kealohilani ʻa e founga kuo faitāpuekina ai ʻene moʻuí ʻi hono tui faivelenga e kāmeni temipalé (vakai peesi 44). ʻI ha fakamatala fakaʻilekitulōnika, ʻoku vahevahe ai ʻe Selaia ʻene loto-tailiili ki he ʻikai ke ne ongoʻi taau feʻunga ke hū he temipalé. Kapau ʻokú ke teuteu foki mo koe ke ke fuofua hū he temipalé, kuo mau fokotuʻutuʻu ha Fehuʻi & Tali ʻe ala tokoni atu (ʻi he ʻinitanetí pē). Pea ʻoku talanoa ʻa Mahesi ki he founga naʻá ne toe foki ai ki he temipalé ke ne maʻu ha mahino lelei ange ki he ngaahi fuakava kuó ne fai ʻi aí (vakai peesi 48).
Neongo ʻoku ou feinga ke u toutou ʻalu ki he temipalé ke fakafonu fakalaumālie au, ka ko e meʻa ʻoku mahuʻinga tahá ko ʻeku tuku ki he Laumālié ʻi he temipalé ke ne akoʻi mo liliu au ʻi loto pea ʻi tuʻa he temipalé. Pea ʻe tokoni leva ʻa e “vai moʻui” ʻoku tafe mei he temipalé ʻo fou ʻi heʻeku ngaahi fuakavá ke ne fakanonga ʻeku fieinua he ʻaho kotoa pē.
Tuetuē!
Alex Hugie