Ko e ʻAʻahi ʻa ʻEletā ʻUkitofa ki Lūsiá

ʻOku fononga e Kau ʻAposetoló he funga ʻo e māmaní ke ngāue fakaetauhi ki he kakaí mo akoʻi kinautolu fekauʻaki mo Sīsū Kalaisi.

Naʻe ʻalu ʻa ʻEletā Tieta F. ʻUkitofa mo Sisitā Helieta ʻUkitofa ki Lūsia ke tokoni ki he kāingalotu ʻo e Siasí ʻi aí. Kimuʻa peá ne hoko ko ha ʻAposetoló, naʻe faʻa puna vakapuna ʻa ʻEletā ʻUkitofa ki Lūsia ʻi heʻene hoko ko ha pailaté. ●

Ko ha fonua lahi ʻa Lūsia, pea kuo teʻeki ke tuʻu ai ha temipale kimuʻa. Naʻe fanongonongo ʻe Palesiteni Nalesoni he taʻu kuo ʻosí ʻe langa ha temipale ai. ʻOku vēkeveke ʻa e tokotaha kotoa pē!

Naʻe ʻuluaki ʻalu ʻa ʻEletā ʻUkitofa ki Mosikou, ko e kolomuʻa ʻo Lūsiá. Naʻe saiʻia e kakai ʻi aí he fakataha mo iá mo fanongo ki heʻene akonakí. Naʻá ne pehē te tau lava ʻo tokoni ki he niʻihi kehé ke nau ʻiloʻi ʻa Sīsū ʻaki ʻetau tokoniʻi kinautolu.

Naʻá ne ʻalu leva mei ai ki ha kolo lahi ko Seni Pitasipeeki. ʻI Lūsiá, ʻoku ui ʻa e kau faifekaú ko e kau “ngāue ʻofa,” pea ʻoku nau fekumi ki ha kakai ke tokoniʻi he ʻaho kotoa pē. Te nau lava ʻo akoʻi e kakaí fekauʻaki mo e ongoongoleleí ʻi he taimi pē ʻoku nau ʻi loto ai ʻi ha fale ʻo e Siasí. Naʻe kai efiafi fakataha ʻa ʻEletā ʻUkitofa mo e niʻihi ʻo e kau ngāue ʻofa ne nau fakaʻosiʻosi ʻenau ngāue fakafaifekaú ka nau foki ki ʻapí.

Neongo ʻoku teʻeki ke tau ʻiloʻi e feituʻu pe taimi ʻe langa ai e temipale foʻoú, ka naʻe poupouʻi ʻe ʻEletā ʻUkitofa ʻa e kakai kotoa pē ʻi Lūsiá ke nau mateuteu ki he taimi ʻe tuʻu ai ha temipalé.

“Kuo pau ke mateuteu hotau lotó ki he temipalé.” —ʻEletā ʻUkitofa

Ko e Mateuteu ki he Temipalé

Ko e hā ha ngaahi founga te ke lava ai ʻo mateuteu ke ʻalu ki he temipalé ha ʻaho?

Fokotuʻu ha fakatātā ʻo e temipalé ʻi hoʻo loki mohé.

Fekumi ki ha taha ʻi hoʻo fuʻu ʻakau fakafāmilí ʻoku teʻeki ke papitaiso.

Talanoa mo ha taha kau ki he temipalé, ko ha taha kuo ʻosi hū ki loto.