Te u ʻAlu ki he Lotú ʻApongipongi
Harmin Toledo Gonzalez
Chiloé, Chile
Tā fakatātaaʻi ʻe Christiane Beauregard
Hili ha taʻu ʻe ua mei hono papitaiso mo hilifakinima au mo hoku uaifi ko Metiliné, ne u māmālohi ʻi he Siasí pea ʻikai ke u toe ʻalu ki he lotú. ʻI he pongipongi Sāpate kotoa pē, te ne fakalotolahiʻi au ke u tuʻu ki ʻolunga pea ma ō mo ia, ka ne u talaange pē ʻikai.
Te u talaange, “ʻOku ou helaʻia. Tuku ke u mohe.” Peá u ʻalu au ʻo vaʻinga soka ʻamui ange.
ʻE ʻā hake ʻa Metiline ʻiate ia pē pea ʻalu ki he lotú mo homa foha ko Lukasí. ʻI he ʻuhá mo e momokó, naʻá ne ʻalu maʻu pē.
ʻI heʻeku vakai atu ki aí, ʻoku ou ʻilo naʻe ʻohofi au ʻe Sētane. Naʻá ne fakalotoʻi au, ʻoku ou sai pē au ʻo ʻikai kau ai ʻa e Siasí. Naʻá ne talamai, “ʻOkú ke sai pē, ʻokú ke nonga, ʻokú ke fiemālie.” Ka ko hono moʻoní, ne mole meiate au ha ngaahi tāpuaki, ʻeku tupulakí, mo e fiefiá. Meʻamālié, naʻe tokonia au ʻe hoku uaifí mo ʻeku Tamai Hēvaní ke u vakai lelei ange ki he ngaahi meʻá.
ʻI ha pō Falaite ʻe taha hili ia ha taʻu nai ʻe taha ʻeku liʻaki lotú, ne u mohe ʻo misi. Naʻá ku mohe ʻo sio ʻoku ou ʻi ha feituʻu ʻuta fakaʻofoʻofa, ʻoku mau fetākinima mo hoku uaifí mo hoku fohá. Ne mau fuʻu fiefia ʻaupito.
Ka naʻe kamata ke fakapoʻuli. Naʻe fakaʻau ʻo fuʻu fakapoʻuli pea ʻikai ke u lava ʻo sio ki ha meʻa. Fakafokifā, ne u fakatokangaʻi kuo ʻikai ke u toe fetākinima au mo hoku uaifí mo e fohá. Ne u ui hona hingoá, mo ʻamanaki pē te na foki mai. Ne u fie maʻu ke na foki mai, pea ne u loto ke mole atu ʻa e fakapoʻulí.
ʻI he taimi ko iá, ne u aʻusia ʻa e meʻa ʻoku ui ko e mamahi moʻoní. Kuo pulia ʻa Metiline ia mo Lukasi. Kuó na hoko atu kinaua kae tuku tokotaha pē au, ʻo ʻākilotoa ʻe he fakapoʻulí.
ʻI heʻeku ʻā hake he pongipongi ʻe tahá, naʻá ku ʻiloʻi ne ʻomi ʻe heʻeku Tamai Hēvaní ha fakaʻilonga. Kapau ne ʻikai ke u foki ki he siasí pea silaʻi hoku uaifí mo e fohá he temipalé, te na mole meiate au. He ʻikai te u maʻu kinaua ʻi he moʻui ka hokó. Te u ʻi ha tuʻunga hē mo lotomamahi.
Ne u talaange kia Metiline, “Te u ʻalu ki he lotú ʻapongipongi.”
Talu mei ai mo ʻeku ʻalu he pongipongi Sāpate kotoa pē mo hoku fāmilí ki he lotú. Kuo teʻeki ke u liʻaki tuʻo taha talu mei he misi ko ia he taʻu ʻe nima kuohilí. Naʻe faifai pea mau sila ʻi he temipalé ʻi Sepitema 2016.
ʻOku ou houngaʻia ʻi hoku ngaahi tāpuaki kotoa pē. ʻOku tautautefito ʻeku loto houngaʻiá ʻi hoku fāmilí mo e loto-toʻa, mālohi, mo e faʻifaʻitakiʻanga hoku uaifí. ʻOku ou houngaʻia ʻi he ʻikai ke ne hanga mo e Tamai Hēvaní ʻo liʻaki aú. Kuó u aʻusia e tuʻunga ko ʻení he ʻahó ni koeʻuhí ko kinaua.