Toʻu Tupú

ʻOku Ou Saiʻia he Hisitōlia Fakafāmilí! Naʻe ʻikai ke u faʻa manako ke ngāue ki he hisitōlia fakafāmilí. Naʻe liliu ia ʻi heʻeku papitaiso fakafofonga maʻá e taha ʻo ʻeku ngaahi kuí ʻi he Temipale Sanitiako Sileí.

Naʻá ku hoko ko ha tīkoni he fuofua taimi ne u ʻalu ai ki he temipalé. ʻI he taimi ne ʻai ke u hifo ai ki he vai papitaisó, naʻá ku ongoʻi ʻoku ʻi ai ha taha ʻoku hū mai ki he lokí. Naʻá ku hanga hake peá u sio ki ha tangataʻeiki vaivai naʻá ne tui ha vala motuʻa. Naʻá ku ongoʻi ʻene ʻofa mo ʻene houngaʻia ʻiate au ʻi heʻeku fai ʻa e ngāue fakatemipalé maʻaná. Hili hono papitaiso au maʻaná peá u kaka hake mei he vaí, naʻá ku fakasio takai holo ia, ka naʻe ʻikai ke ne toe ʻiloa.

Naʻá ku faʻa fakakaukau ʻe ʻomi ʻe he temipalé ha ngaahi hingoa ke fai ki ai ha ngāue fakatemipale, pea naʻe ʻikai leva ke u fuʻu tokanga ke fai ha fekumi ki he hisitōlia fakafāmilí. Ka naʻe hoko ʻa e aʻusia ko ʻení ke u vēkeveke ai ke fekumi ki he ngaahi hingoa pē hoku fāmilí.

ʻI ha ʻaho ʻe taha naʻá ku tangutu ai he komipiutá peá u sio ne u maʻu ha ʻīmeili mei he Siasí fekauʻaki mo ha hingoa fakafāmili. Naʻá ku ongoʻi naʻe fie maʻu ke u fekumi ki ha ngaahi hingoa lahi ange, pea naʻá ku kole ki heʻeku faʻeé pe te u fekumi fēfē ki he ngaahi hingoá mo tānaki ha fakamatala lahi ange fekauʻaki mo ʻeku ngaahi kuí.

ʻI he taimi ní kuó u maʻu ʻeni ha ngaahi hingoa ʻe 11, pea ʻoku ou ʻiloʻi te u lava ke maʻu mo ha toe hingoa lahi ange. Naʻe ʻikai teitei maʻu ʻe he kakai ko ʻení ha faingamālie ke papitaiso kinautolu ʻi māmani, pea kuo fuoloa taimi ʻenau tatali ke fakahoko e ngāue fakatemipalé maʻanautolú. ʻOku ou fiefia heʻeku lava ʻo tokoniʻi kinautolu ʻi he ngāue fakatemipalé mo e hisitōlia fakafāmilí.

Lūkasi,16, Sanitiako, Silei